1 King 6 - Bislama Bible Revised 2012

King Solomon i wokem haos blong Hae God

1Long namba fo handred eiti yia biaen long taem ya we ol olfala bubu blong yumi bifo oli kamaot long Ijip, long namba fo yia blong King Solomon we hem i rul long Isrel,* long manis ya Sif* we i seken manis blong yia ya, King Solomon i stat blong wokem haos* blong Hae God.

2Haos ya i bigwan, we insaed blong hem, longfala blong hem i kasem twanti seven meta, mo bigfala blong hem i kasem naen meta, mo hae blong hem i kasem totin meta haf.

3Rum blong hem long doa we oli pas long hem blong go insaed, longfala blong hem i kasem fo meta haf, mo bigfala blong hem i kasem naen meta. Bigfala blong hem i olsem bigfala blong rum ya we nem blong hem “Rum we i Tabu”.

4Ol wol blong haos ya i tik we i tik, mo ol windo blong hem, oli mekem we afsaed i smol be insaed i bigwan.

5Mo long afsaed blong wol ya, long tufala saed mo long biaen, i gat narafala haf blong haos ya bakegen we i joen long wol ya, mo i gat tri stori blong hem. Ol stori ya, hae blong olgeta wanwan i moa long tu meta.

6Long fas stori ya daon, bigfala blong ol rum i moa long tu meta. Long seken stori, bigfala blong olgeta i moa long tu meta haf, mo long namba tri stori, bigfala blong olgeta i moa long tri meta. Hemia from we ol wol blong haos ya, daon i tik we i tik, nao long seken stori i kam tin lelebet, mo long las stori antap i kam tin moa. Long fasin ya, i gat ples long wol we ol timba blong floa blong tufala stori ya antap i save slip gud long hem, we oli no go insaed long wol.

7Ol ston blong wokem haos ya, oli bin katemrere finis long ples ya we oli digim long hem. Oli mekem olsem, blong taem we oli stap wokem haos ya, bambae i no gat noes blong ol tul we oli wokem long aean, olsem hama mo akis mo ol samting olsem.

8Doa blong go insaed long fas stori ya daon, hem i stap long saed i go long saot, mo i gat lada we i go antap long namba tu stori mo long namba tri stori bakegen.

9Nao king i gohed blong finisim haos ya. Olgeta oli wokem siling blong hem long plang blong sida,

10mo oli tekem ol bigbigfala timba blong sida blong wokem narafala haf blong haos ya we i joen long afsaed blong bigfala wol blong hem. Narafala haf blong haos ya, hem i gat tri stori blong hem we hae blong olgeta wanwan i moa long tu meta.

11Nao Hae God i talem long hem se,

12“Sipos yu obei long ol loa mo ol tok blong mi, bambae mi mi mekem long yu olsem we mi promes* finis long papa blong yu, King Deved.

13Yufala ol laen* blong Isrel, yufala i man blong mi, mo mi no save lego yufala samtaem, oltaem bambae mi mi stap long medel blong yufala.”

Ol samting insaed long haos blong Hae God(2 Kronikel 3.8-14)

14Nao King Solomon i gohed blong finisimgud haos ya blong Hae God.

15Insaed long haos ya, long Rum ya we i Tabu, ol stonwol blong hem, oli blokem long plang blong sida, i stat long floa i go kasem siling antap. Mo floa blong hem, oli wokem long plang blong paentri.*

16Eks 26.33,34Mo insaed olgeta, biaen long Rum ya we i Tabu, oli wokem wan rum bakegen we nem blong hem “Rum we i Tabu we i Tabu”. Longfala blong rum ya i kasem naen meta, mo oli blokem ol wol blong hem long plang blong sida, i stat long floa, i go kasem siling antap.

17Mo bigfala rum ya, we Rum ya we i Tabu we i Tabu i stap biaen long hem, longfala blong hem i kasem eitin meta.

18Long evri ples insaed long rum ya, oli blokemgud ol stonwol blong hem long plang blong sida, mo oli katem ol pija blong flaoa mo melen long ol plang ya, blong flasem rum ya.

19Long rum ya we i insaed olgeta, we nem blong hem “Rum we i Tabu we i Tabu”, i gat ples blong putum Bokis ya we i Saen blong Promes* blong Hae God.

20Longfala blong rum ya i kasem naen meta, mo bigfala blong hem i kasem naen meta mo hae blong hem i kasem naen meta. Long evri ples insaed long rum ya, oli blokem ol plang blong hem long gol we i klin gud, mo Olta blong hem, oli mekem long plang blong sida.

21Insaed long bigfala Rum ya we i Tabu, oli blokem ol plang blong hem tu long gol we i beswan, mo ol jen we oli pulum i gokros long doa blong rum ya we i insaed olgeta, oli wokem olgeta long gol. Mo rum ya tu, oli blokem ol plang blong hem long gol.

22Eks 30.1-3Long evri ples insaed long haos ya, oli blokem ol plang blong hem long gol, mo Olta blong Rum ya we i Tabu we i Tabu, hem tu oli blokem long gol.

23-26 Eks 25.18-20 Mo i gat tu pija blong jerubim* we oli wokem long wud blong olif we longfala blong tufala wanwan klosap i kasem fo meta haf. Tufala jerubim ya, oli putum tufala insaed long Rum ya we i Tabu we i Tabu. Tufala i sem mak nomo, mo tufala i gat wing. Longfala blong wan wing i moa long tu meta, mo i stat long en blong wansaed wing i go kasem en blong narasaed wing i kasem klosap long fo meta haf.

27Oli stanemap tufala jerubim ya saedsaed insaed long rum ya, we en blong wansaed wing blong tufala i kasem tufala long medel blong rum, mo en blong narasaed wing blong tufala i kasem wol long saed blong tufala.

28Mo oli blokem wud blong tufala jerubim ya long gol, blong flasemgud tufala.

29Long olgeta wol insaed long haos ya, long bigfala rum wetem rum ya we i insaed olgeta, oli katem ol pija blong jerubim wetem ol pija blong pamtri mo ol pija blong flaoa.

30Mo ol plang blong floa tu, oli blokem olgeta long gol.

31Doa blong Rum ya we i Tabu we i Tabu, oli wokem we top blong hem i sap, mo oli hangem tu doa blong satem, we oli wokem tufala long plang blong olif.

32Long tufala doa ya, oli katem ol pija blong jerubim wetem ol pija blong pamtri mo ol pija blong flaoa. Mo tufala doa ya, we tufala i gat ol pija ya long tufala, oli blokem ol wud blong tufala long gol blong flasem tufala.

33Mo doa blong go insaed long haos ya, oli wokem frem blong hem long timba blong olif.

34Mo oli wokem tu doa blong hem long plang blong paentri, we taem oli openem, oli save foldem tufala bakegen.

35Mo long tufala doa ya tu, oli katem ol pija blong jerubim wetem ol pija blong pamtri mo ol pija blong flaoa, mo oli blokemgud ol wud blong tufala long gol blong flasem tufala.

36Afsaed, stret long doa blong haos ya, i gat wan yad blong hem i stap, mo wol blong hem, oli putum tri laen blong ston mo wan laen blong timba blong sida, mo oli mekem olsem, gogo oli finisim wol ya.

37Fandesen blong haos ya, oli wokem long namba fo yia blong King Solomon we hem i rul, long manis ya Sif, we i seken manis blong yia ya.

38Mo long namba leven yia blong king ya, long manis ya Bul* we i namba eit manis blong yia ya, oli finisim haos ya we oli finisimgud, stret olsem plan blong hem we oli bin wokem fastaem. King Solomon i tekem seven yia blong wokem haos ya blong Hae God.