Aesea 57 - Bislama Bible Revised 2012

Hae God i jajem ol man blong hem, from we oli stap mekem wosip long ol narafala god

1Bakegen, profet i talem long ol man blong hem se, “Olgeta. Sipos man we fasin blong hem i stret gud i ded, bambae i no gat man we i save talem se hem i ded from wanem, mo bambae i no gat man we i save trabol long samting ya. Be sipos man olsem i ded, bambae trabol i no moa save kasem hem,

2bambae hem i gat pis, mo i save spel gud.”

3Bakegen, profet i talemaot we Hae God i talem se, “!Yufala we i stap mekem ol fasin nogud, yufala i kam pas long kot, blong mi mi save jajem yufala! Yufala i olsem ol man blong wokem posen, mo ol man blong stilim woman, mo ol woman blong rod.

4!Yufala i man blong giaman ya! ?Yufala i stap tok nogud long hu ya? !Yufala i stap laf nogud long mi ya!

5Oltaem, taem yufala i stap go blong mekem wosip long ol rabis god ya blong yufala, yufala i stap go slip wetem ol woman pris blong olgeta, aninit long ol tri ya we oli tabu, oli blong ol god ya. Yufala i stap go long ol hol blong ston klosap long ol krik ya, nao yufala i kilim ol pikinini blong yufala blong mekem sakrefaes long ol god ya.

6Yufala i stap go pikimap ol raon ston long ples ya, nao yufala i stap mekem wosip long olgeta, se olgeta oli god blong yufala. Yufala i stap kafsaedem waen i go long fran blong ol ston ya, mo yufala i stap karem kakae i kam blong givim long olgeta. ?Weswe? ?Yufala i ting se mi mi glad blong luk ol samting ya?

7Yufala i stap go antap long ol bigbigfala hil blong mekem sakrefaes long ol god ya, mo blong slip wetem ol woman pris blong olgeta.

8Mo yufala i stap stanemap ol aedol blong yufala insaed long ol haos blong yufala, stret long ol doa blong yufala, be ol aedol ya oli samting blong sem nomo. Yufala i tanem baksaed long mi, nao yufala i tekemaot ol klos blong yufala, yufala i go jam long ol bigfala bed blong yufala wetem olgeta ya, we yufala i stap pem olgeta, blong oli kam slip wetem yufala. Yufala i wantem woman tumas, mo long fasin ya, yufala i stap talem se yufala i harem gud.

9Oltaem, yufala i stap putum ol senta mo pomad, mo yufala i go mekem wosip long god ya Molek. Mo yufala i stap sanem ol man blong yufala oli go lukaot ol narafala god bakegen, blong yufala i mekem wosip long olgeta. Ol man ya oli go olbaot long ol narafala kantri we i longwe, blong lukaot ol god ya. Nating we i Hom* blong ol Dedman, be oli go lukaot long ples ya tu.

10Yufala i hadwok tumas blong lukaot olgeta, gogo yufala i taed gud, be neva yufala i talem se, ‘I moa gud yumi lego fasin ya.’ Yufala i ting se ol god ya oli stap mekem yufala i strong, taswe neva yufala i kam slak long ol rabis fasin ya.

11“Ol god ya oli mekem yufala i fraet tumas, nao yufala i stap giaman long mi, mo yufala i stap fogetem mi olgeta. ?Be hu ol god ya? Ating yufala i stap ting se mi mi stap kwaet longtaem tumas, taswe yufala i no moa tinghevi long mi, yufala i no moa ona long mi.

12Naoia, yufala i ting se fasin ya we yufala i stap mekem, hem i gud nomo, be bambae mi tekem fasin ya blong yufala i kam long klia ples, nao ol samting ya bambae i no save givhan long yufala.

13Nao long taem ya, sipos yufala i singaot man blong givhan long yufala, bambae i moa gud ol god ya blong yufala we oli samting blong sem nomo, oli kam sevem yufala. !Ol god ya, smol win nomo bambae i naf blong karemaot olgeta i go lus olgeta! Be ol man ya we oli trastem mi, bambae oli stap olwe long kantri ya, mo bambae oli stap mekem wosip long mi long haos* blong mi.”

Hae God i promes blong givhan long ol man blong hem

14Bakegen, profet i talemaot long ol man blong hem we Hae God i talem se, “!Ol man blong mi! !Yufala i mas kambak long mi bakegen! !Ol samting we i stap blokem rod blong yufala, yufala i mas tekemaot. !Yufala i mas wokemgud rod ya, blong i kam gud bakegen!

15“!Mi mi God! Mi mi hae we mi hae, mo mi tabu, fasin blong mi i stret olgeta. Mi bambae mi save stap oltaem, gogo i no save finis. Ples blong mi i hae, mo i tabu, i klin we i klin, be mi save stap wetem ol man we tingting blong olgeta i stap daon, mo we oli tanem tingting blong olgeta from ol sin blong olgeta, blong mi save leftemap tingting blong olgeta, blong tingting blong olgeta i stap strong long mi.

16!Ol man blong mi! Mi nao mi mekem yufala i laef, mo mi no save gohed olwe blong talemaot ol poen agens long yufala. Bambae mi no save stap kros oltaem long yufala.

17Bifo, mi mi kros long yufala from we yufala i stap mekem sin, mo yufala i stap wantem tumas ol samting, nao mi mi panisim yufala, mo mi lego yufala. Be yufala i stronghed tumas, yufala i stap folem ol fasin blong yufala yet.

18“Mi mi luk fasin blong yufala finis, be bambae mi mekem yufala i gud bakegen. Bambae mi lidim yufala, mo bambae mi givhan long yufala. Naoia, yufala i stap harem nogud, yufala i stap krae, be bambae mi leftemap tingting blong yufala bakegen.

19Efes 2.17Nating we yufala i stap klosap nomo, no yufala i stap longwe, be mi mi wantem mekem we yufala i gat pis. Yufala i man blong mi, mo bambae mi mekem yufala i gud bakegen.

20Be ol man we fasin blong olgeta i nogud, oli olsem solwota nomo, we i no save stap kwaet, oltaem i stap kam brok long sanbij, mo i stap karem ol doti mo ol rabis i kam.

21Aes 48.22Ol man nogud oli no save kasem gudfala laef. Mi mi Hae God, mo hemia tok blong mi.”