1Nao King Ehab i go luk woman blong hem Kwin Jesebel, i talemaot long hem olgeta samting ya we Profet Elaeja i mekem. Hem i talemaot tu we profet ya i kilim olgeta profet blong Bal* oli ded evriwan.
2Nao kwin i sanem wan strong tok i go long profet ya, i talem se, “Sipos tumora long taem olsemia, mi mi no mekem sem fasin ya long yu we yu yu mekem long ol profet ya, i gud ol god blong mi oli kilim mi mi ded.”
3Taem profet i harem tok ya, hem i fraet tumas, nao i girap, i ronwe blong sevem laef blong hem. Hem i tekem man blong wok blong hem, tufala i go long Juda,* nao hem i livim man ya i stap long taon ya Bereseba,
4Jona 4.3nao i wokbaot wan ful dei, i go long draeples. Nao hem i luk wan smol tri, mo i go sidaon long sed blong hem, mo i stap tingting se, “Sipos mi mi ded nomo, bambae i moa gud.” Nao hem i prea, i talem se, “Hae God, mi mi harem nogud tumas. Plis yu tekemaot laef blong mi. I moa gud mi mi ded.”
5Nao hem i ledaon aninit long tri ya, i slip. Mo taem hem i stap slip, wantaem nomo, wan enjel blong Hae God i holem hem, i talem long hem se, “Yu girap, yu kakae.”
6Ale, hem i girap, i luklukraon, nao i luk wan bred we oli kukum long ston, wetem wan botel wota i stap klosap long hed blong hem. Nao hem i kakae mo i dring, mo biaen, hem i ledaon, i slip bakegen.
7Nao enjel ya i kam wekemap hem bakegen, i talem long hem se, “Yu girap, yu kakae. Sipos no, bambae yu no save kasem en blong rod blong yu.”
8Nao hem i girap, i kakae mo i dring, mo kakae ya i mekem hem i strong, nao i wokbaot foti dei, i go long bigfala hil ya Sinae. Hil ya i tabu, i blong Hae God,
9mo long naet, hem i go insaed long wan hol blong ston blong i slip long ples ya. Nao wantaem nomo, Hae God i toktok long hem, i talem se, “!Elaeja! ?Yu stap mekem wanem long ples ya?”
10 Rom 11.3 Nao hem i talem se, “Hae God, yu yu gat olgeta paoa. Oltaem mi mi stap wok blong yu nomo. Be olgeta man long Isrel* oli brekem promes* ya we yu yu mekem wetem mifala. Oli brekemdaon ol olta blong yu, mo oli kilim olgeta profet blong yu. Mi wan nomo mi stap, mo olgeta oli stap traem blong kilim mi mi ded.”
11Nao Hae God i talem long hem se, “Yu kam afsaed, yu kam mitim mi antap long hil ya.” Nao Hae God i kam pas long ples ya, mo i mekem wan bigfala win i kam we i strong we i strong, i olsem wan hariken, mo i kilim hil ya, i brebrekem ol ston, mo i sakem olgeta i go olbaot. Win ya i blu gogo i finis, be Hae God i no kamtru long win ya. Nao biaen, graon i seksek, be Hae God i no kamtru long samting ya.
12Nao biaen bakegen, i gat bigfala faea i laet, be Hae God i no kamtru long faea ya tu. Ale, biaen long faea ya, profet i harem we Hae God i stap tok smosmol long hem.
13Taem profet i harem samting ya, hem i kavremap fes blong hem long kot blong hem, nao i goaot, i stanap long maot blong hol ya, nao i harem we Hae God i stap tok smosmol long hem se, “!Elaeja! ?Yu stap mekem wanem long ples ya?”
14Nao hem i talem se, “Hae God, yu yu gat olgeta paoa. Oltaem mi mi stap wok blong yu nomo. Be olgeta man long Isrel oli brekem promes ya we yu yu mekem wetem mifala. Oli brekemdaon ol olta blong yu, mo oli kilim olgeta profet blong yu. Mi wan nomo mi stap, mo olgeta oli stap traem blong kilim mi mi ded.”
15 2 King 8.7-13 Nao Hae God i talem long hem se, “Yu gobak long draeples ya klosap long Damaskes, yu go insaed long taon ya, nao yu kafsaedem oel i go long hed blong Hasael, blong makemaot hem se bambae i kam king blong Siria.
162 King 9.1-6Mo yu kafsaedem oel i go long hed blong Jehu we bubu blong hem Nimsi, blong makemaot hem se bambae i kam king blong Isrel. Mo yu kafsaedem oel i go long hed blong Elisa we papa blong hem Safat, man Abelmehola, blong makemaot hem se bambae i tekem ples blong yu i kam profet.
17Nao trifala ya bambae i kilim ol enemi blong mi oli ded. Sipos man i ronwe long Hasael, Jehu bambae i kilim hem i ded. Mo sipos man i ronwe long Jehu, Elisa bambae i kilim hem i ded.
18Rom 11.4Be bambae mi letem seven taosen man i stap laef long Isrel. Hemia olgeta ya we oli stap ona long mi, we oli no bodaon long Bal, mo oli no kis long pija blong hem.”
Elisa i biaen long Profet Elaeja19Nao Profet Elaeja i aot long ples ya i go, nao i faenem Elisa we papa blong hem Safat. Hem i stap wokem garen blong hem, i stap brebrekem graon long plao we tufala buluk i pulum, mo i gat twelef plao olsem oli stap brebrekem graon long garen ya. I gat leven oli stap go fastaem long hem, mo hem i stap holem laswan, i kam biaen. Nao profet i tekemaot kot blong hem, i go putum long Elisa, blong mekem saen long hem se bambae i tekem ples blong hem.
20Nao Elisa i lego plao blong hem, i resis biaen long hem, i talem se, “Plis yu letem mi mi go talem tata long papa mo mama blong mi fastaem, nao bambae mi kam, mi biaen long yu.”
Nao Profet i talem long hem se, “I oraet nomo, yu gobak. Mi no blokem yu.”
21Nao Elisa i gobak long garen blong hem, i kilim tufala buluk ya blong hem, mo i brebrekem ol wud blong plao wetem yok, nao i yusum blong rusum mit blong tufala buluk ya long hem. Hem i givim mit ya long ol man blong hem, mo olgeta oli kakae. Nao hem i girap, i biaen long Profet Elaeja, i givhan long hem.
Who We AreWhat We EelieveWhat We Do
2025 by iamachristian.org,Inc All rights reserved.
