1Man we i laekem waestok, sipos hem i gorong, oltaem hem i wantem man i stretem hem, be man we i no wantem narafala man i stretem hem, hem i no gat hed.
2Hae God i glad blong givhan long ol stret man, be hem i agens long ol man we oli plan blong mekem ol samting nogud.
3Fasin nogud i no save mekem man i stanap strong, i stap gud. Man we fasin blong hem i stret, hem nomo i save stap gud olwe.
4Woman we i stap mekem i gud long man blong hem, man blong hem i harem gud long hem, i glad long hem, be woman we i stap mekem sem long man blong hem, hem i olsem wan rabis sik we i stap spolem bun blong man.
5Man we i no save giaman, hem i stap mekem i stret nomo long ol man, be man nogud i wantem nomo blong trikim ol man.
6Tok blong man nogud i blong kilim ol narafala man nomo, be tok blong stret man i save sevem olgeta.
7Ol man nogud bambae oli lus evriwan, we bambae i no moa gat pikinini blong olgeta i stap, be ol famle blong ol stret man bambae oli stap gud, mo oli kam plante we plante.
8Man we i gat gud hed, ol man bambae oli stap leftemap nem blong hem, be man we hed blong hem i fulap long ol krangke tingting, ol man bambae oli stap ting rabis long hem.
9Man we i no gat nem, we oltaem i stap hadwok blong kasem kakae blong hem, laef blong hem i moa gud, i winim laef blong man we i stap mekem olsem we i gat hae nem, be oltaem i stap hanggri.
10Gudfala man, hem i stap lukaot gud long ol anamol blong hem, be man nogud i stap mekem i strong tumas long ol anamol blong hem.
11Man we i stap wok had long garen blong hem, hem i gat plante kakae blong hem, be fasin ya we man i stap westem taem blong hem long ol wok we i no gat frut blong hem, hemia i krangke nomo.
12Namba wan samting we ol man nogud oli wantem, oli wantem wokem ol fasin nogud nomo, be ol stret man bambae oli stap stanap strong oltaem.
13Ol tok blong man nogud i stap kasem hem bakegen olsem trap, be man we fasin blong hem i stret, trabol i no save holem hem.
14Ol gudgudfala samting we man i stap kasem i frut blong ol tok blong hem, olsem we pei we hem i stap kasem i frut blong ol hadwok blong hem.
15Oltaem nomo, man we i no gat hed i stap ting se samting we hem i mekem i stret nomo, be man we i waes i stap lesin long ol advaes blong ol narafala man.
16Man we i no gat hed, taem hem i kros, hem i soemaot kwiktaem nomo, be man we i gat hed, hem i no save tingbaot ol rabis tok we man i sakem i kam long hem.
17Man we oltaem i stap talem ol trutok, sipos hem i pas long kot, hem i save talemaot ol tok we i tru nomo, be sipos man blong giaman i pas long kot, tok blong hem i blong giaman long ol man nomo.
18Ol tok nogud we man i sakem we i no tingbaot i save mekem narafala man i harem nogud, olsem we naef blong faet i stikim hem, be tok we i waes i save mekem man i harem gud bakegen.
19Giaman toktok bambae i no save stap longtaem, be trutok bambae i stap oltaem nomo.
20Man we i stap mekem plan blong mekem samting nogud, hem i stap giaman long hem bakegen nomo, bambae i sek nomo we trabol i kasem hem, be man we i stap wok blong mekem i gud long ol man bambae i save harem gud.
21Ol stret man, bambae i no gat samting nogud i kam long olgeta, be ol man nogud bambae oli stap kasem trabol oltaem nomo.
22Hae God i no laekem nating ol man we oli stap giaman, be hem i glad long olgeta we oli stap holem promes blong olgeta.
23Ol man we oli save samting, oli no save tok flas long save blong olgeta, be ol man we oli no gat hed, oltaem oli stap soemaot i klia nomo we oli no save wan samting.
24Man we i stap wok had, hem bambae i save rul, be man we i stap les bambae i kam slef nomo blong narafala man.
25Taem man i stap wari, fasin ya i stap mekem tingting blong hem i hevi, be gudfala tok blong fren blong hem i save leftemap tingting blong hem bakegen.
26Man we i stret, hem i lida blong ol fren blong hem, be ol man nogud, fasin blong olgeta i stap lidim olgeta i gorong.
27Man blong les i no save kasem ol samting we i stap tingting long hem, be man blong wok had bambae i save kasem plante gudgudfala samting.
28Fasin we i stret, hem i rod blong laef, be fasin we i nogud, hem i rod blong ded nomo.
Who We AreWhat We EelieveWhat We Do
2025 by iamachristian.org,Inc All rights reserved.
