1Long taem we boe ya Samuel i stap wok blong Hae God aninit long pris* ya Ilae, i no gat plante man we Hae God i givim tok blong hem long olgeta, no we i soemaot vison* long olgeta.
2Long taem ya, pris ya i olfala we ae blong hem i stap kam nogud. Nao wan naet, hem i stap slip long rum blong hem,
3mo Samuel i stap slip long haos blong Hae God we Bokis ya we i Saen blong Promes* blong hem i stap long hem. Long hafnaet, taem we i no brok delaet yet, mo laet blong Rum ya we i Tabu i stap laet yet,
4Hae God i singaot Samuel. Nao Samuel i talem se, “!Yes!”
5Mo hem i resis i go luk pris ya, i talem se, “Yu yu stap singaot mi. Mi ya.”
Be pris i talem se, “Mi mi no singaot yu. Yu gobak yu slip.” Ale, hem i gobak, i slip.
6-7Nao Hae God i singaot hem bakegen. Be hem i no save se Hae God ya we i stap singaot hem, from we Hae God i no singaot hem samtaem. Nao hem i girap, i go luk pris bakegen, i talem se, “Yu yu stap singaot mi. Mi ya.”
Be hem i talem long hem se, “Pikinini blong mi, mi no singaot yu. Yu gobak, yu slip.”
8Nao Hae God i singaot hem bakegen, we i mekem tri taem blong hem. Nao hem i girap, i go luk pris, i talem se, “Yu yu stap singaot mi. Mi ya.”
Nao pris i luksave se hemia Hae God ya we i stap singaot boe ya.
9Nao hem i talem long hem se, “Yu gobak, yu slip. Mo sipos yu harem we hem i singaot yu bakegen, yu talem se, ‘Hae God, yu toktok. Mi mi man blong wok blong yu, mi stap harem yu ya.’ ” Nao hem i gobak, i slip.
10Nao Hae God i kambak, i stanap long ples ya, i singaot bakegen olsem fastaem, i talem se, “Samuel, Samuel.”
Mo Samuel i talem se, “Yu toktok. Mi mi man blong wok blong yu, mi stap harem yu ya.”
11Nao Hae God i talem long hem se, “Bambae i no longtaem, mi mi mekem wan samting we i nogud tumas long ol man blong kantri ya. Mo taem ol man oli harem samting ya, bambae oli sek we tingting blong olgeta i lus from.
12Long dei ya nao, bambae mi mekem olgeta samting we mi bin promes blong mekem long ol famle blong Ilae i kamtru, i stat long stat blong tok blong mi gogo kasem en blong hem.
13Mi talem long hem finis, se bambae mi givim panis long hem wetem ol famle blong hem we bambae i no save finis long olgeta samtaem, from we tufala pikinini blong hem i stap tok nogud long nem blong mi. Mo hem i save nomo we tufala i stap mekem ol samting ya, be hem i no traem blong blokem tufala.
14Oraet, naoia mi mekem wan strong promes bakegen long hem wetem olgeta ya we oli stap kamaot biaen long hem, se bambae i no gat wan sakrefaes nating i save blokem panis we bambae oli kasem from ol sin ya blong olgeta.”
15Samuel i stap nomo long bed blong hem kasem delaet, nao hem i go openem ol doa blong haos blong Hae God. Be hem i fraet blong talemaot tok ya long Ilae.
16Nao pris ya i singaot hem se, “!Samuel, pikinini blong mi!”
Mo hem i talem se, “!Yes, mi ya!”
17Nao pris i askem long hem se, “?Hae God i talem wanem long yu? Yu no haedem wan samting long mi. Sipos yu no talemaot olgeta samting ya long mi, we hem i talem long yu, hem bambae i panisimgud yu.”
18Nao Samuel i talemaot olgeta samting ya, we i no haedem wan samting nating. Nao pris i talem se, “Hem i Hae God. Hem bambae i mekem olsem we hem i luk se i stret.”
19Taem Samuel i stap kam bigwan, oltaem Hae God i stap wetem hem, mo i stap mekem we evri samting we boe ya i talem oli stap kamtru.
20Nao olgeta laen* blong Isrel* evriwan, i stat long Dan* long not, i go kasem Bereseba long saot, oli save we hem i wan profet tru blong Hae God.
21Mo oltaem, Hae God i stap kamtru long Samuel long ples ya Silo, blong talemaot tok blong hem long hem. Hemia ples ya we hem i kamtru long hem fastaem, blong givim tok blong hem long hem.
Who We AreWhat We EelieveWhat We Do
2025 by iamachristian.org,Inc All rights reserved.
