1 Kronikel 4 - Bislama Bible Revised 2012

Ol narafala laen blong Juda

1Ol narafala laen* blong Juda,* nem blong olgeta, Peres, mo Hesron, mo Kami, mo Huru, mo Sobal.

2Sobal, hem i bonem Rehaea, mo Rehaea i bonem Jahat, mo Jahat i bonem Ahumae mo Lahad, we tufala i olfala bubu blong ol man we oli stap long taon ya Jora.

3-4Huru, hem i fasbon pikinini blong Keleb wetem Efrat, mo olgeta we oli kamaot biaen long hem, oli statem taon ya Betlehem. Hem i gat tri pikinini boe blong hem, we nem blong trifala, Etam, mo Penuel, mo Eja. Etam, hem i gat tri pikinini boe blong hem, we nem blong trifala, Jisrehel, mo Jismaha, mo Jidbas. Mo hem i gat wan dota blong hem, we nem blong hem, Hejelelponi. Penuel, hem i statem taon ya Gedoro, mo Eja i statem taon ya Husa.

5Asuru, we hem i statem taon ya Tekoa, hem i gat tu woman blong hem, we nem blong tufala, Helaha mo Naraha.

6Naraha i bonem fo pikinini boe blong tufala, we nem blong olgeta, Ahusam, mo Hefa, mo Temeni, mo Ahastari.

7Mo Helaha i bonem tri pikinini boe blong tufala, we nem blong trifala, Jeret, mo Ijara, mo Etnan.

8Mo i gat wan narafala man, we nem blong hem Koj. Hem i bonem Anub mo Jobeba, mo olgeta we oli kamaot biaen long Aharahel, we papa blong hem Harum oli makem hem se olfala stamba blong olgeta.

9Mo i gat wan narafala man we nem blong hem Jabes Mama blong hem i putum nem ya long hem, from we long taem ya we hem i bonem hem, hem i harem nogud tumas from. Ol man oli stap tinghae moa long man ya, i winim we oli tinghae long ol brata blong hem.

10Mo wan taem, man ya i prea, i talem se, “God, yu yu God blong mifala. Plis yu blesem mi, yu givim bigfala graon bakegen long mi. Plis yu stap wetem mi, mo yu tekemaot olgeta samting nogud we i save mekem mi mi harem nogud.” Mo God i givim ol samting ya long hem we hem i prea from.

Ol narafala laen blong olgeta

11Mo i gat wan narafala man, we nem blong hem Kelub, we i brata blong Suaha, mo hem i gat wan pikinini boe blong hem, we nem blong hem, Mehiri. Mehiri, hem i bonem Eston,

12mo Eston i gat tri pikinini boe blong hem, we nem blong trifala, Betrafa, mo Pasea, mo Tehinaha. Mo Tehinaha, hem i statem taon ya Nahas. Olgeta we oli kamaot biaen long olgeta ya oli stap long Rekaha.

13Mo i gat wan narafala man, we nem blong hem Kenas, mo hem i gat tu pikinini boe blong hem, we nem blong tufala, Otniel, mo Seraea. Mo Otniel tu i gat tu pikinini boe blong hem, we nem blong tufala, Hatat, mo Meonotae.

14Meonotae, hem i bonem Ofraha.

Mo Seraea, hem i bonem Joab we hem i statem ples ya Geharasim, wan bigfala levelples long medel blong ol hil, we ol man blong hem oli waes gud blong wokem ol samting long han blong olgeta.

15Mo i gat wan narafala man, we nem blong hem Keleb, we i pikinini blong Jefune, hem i gat tri pikinini boe blong hem, we nem blong trifala, Iru, mo Elaha, mo Naham. Mo Elaha, hem i bonem Kenas.

16Mo i gat wan narafala man, we nem blong hem Jehalelel, mo hem i gat fo pikinini boe blong hem, we nem blong olgeta, Sif, mo Sifaha, mo Tiria, mo Asarehel.

17-18Mo i gat wan narafala man, we nem blong hem Esraha, mo hem i gat fo pikinini boe blong hem, we nem blong olgeta, Jeta, mo Mered, mo Efa, mo Jalon. Mered i tekem wan gel, nem blong hem Bitia, we i dota blong king blong Ijip, mo tufala i gat wan dota blong tufala, we nem blong hem, Meriam, mo tu pikinini boe blong tufala, we nem blong tufala, Samae, mo Jisbaha. Mo Jisbaha ya i statem taon ya Estemoa. Mo Mered i tekem wan woman tu we i laen* blong Juda,* mo tufala i gat tri pikinini boe blong tufala, we nem blong trifala, Jered, we hem tu i statem wan taon we nem blong hem Gedoro bakegen, mo Heba, we i statem taon ya Soko, mo Jekutiel, we i statem taon ya Sanoa.

19Mo i gat wan narafala man, we nem blong hem Hodia, mo hem i tekem wan sista blong Naham. Mo olgeta we oli kamaot biaen long tufala ya oli stamba blong laen blong Garam, we ol man blong hem oli stap long taon ya Kehila, mo oli stamba tu blong laen blong Mahakat we ol man blong hem oli stap long taon ya Estemoa.

20Mo i gat wan narafala man, we nem blong hem Simon, mo hem i gat fo pikinini boe blong hem, we nem blong olgeta, Amnon, mo Rinaha, mo Benanan, mo Tilon.

Mo i gat wan narafala man, we nem blong hem Jisi, mo hem i gat tu pikinini boe blong hem, we nem blong tufala, Sohet, mo Bensohet.

Ol laen blong Sela

21Sela, hem i wan pikinini blong Juda,* mo nem blong sam long olgeta we oli kamaot biaen long hem, i gat Ere, we i statem taon ya Leka, mo Lahada, we i statem taon ya Maresa, mo ol man blong taon ya Betasbea, we oli man blong wokem gudfala kaliko ya linen,*

22-23mo Jokim, mo ol man blong taon ya Koseba, mo Joas mo Saraf, we tufala i tekem tu woman Moab, mo oli kam stap long taon ya Betlehem. Olgeta we oli kamaot biaen long tufala ya oli man blong wok blong king, we oli stap wokem ol graonpot blong hem, mo oli stap long tufala taon ya Netaem mo Gederaha. Ol stori ya i blong bifo olgeta.

Ol laen blong Simeon

24Simeon,* i gat faef pikinini boe blong hem, we nem blong olgeta, Nemuel, mo Jamin, mo Jarib, mo Sera, mo Saol.

25Mo Saol i bonem Salum, mo Salum i bonem Mibsam, mo Mibsam i bonem Mismaha,

26mo Mismaha i bonem Hamuel, mo Hamuel i bonem Sakuru, mo Sakuru i bonem Simei.

27Simei, hem i gat sikistin pikinini boe blong hem mo sikis dota, be ol brata blong hem oli no gat plante pikinini olsem, mo laen* blong Simeon i no gru tumas olsem laen blong Juda.*

28 Jos 19.2-8 I kam kasem taem blong King Deved, ol laen blong Simeon oli stap long ol taon we nem blong olgeta, Bereseba, mo Molada, mo Hajasual,

29mo Bilhaha, mo Ejem, mo Tolad,

30mo Betuel, mo Homa, mo Jiklag,

31mo Betmakabot, mo Hajasusim, mo Betbiri, mo Saharaem.

32Mo oli stap long faef narafala taon tu, we nem blong olgeta, Etam, mo Aen, mo Rimon, mo Token, mo Asan,

33wetem ol vilej we oli stap raonabaot long olgeta go kasem taon ya Bahalat long saotwes. Hemia nao ol ripot blong ol famle blong laen ya, mo ol ples we oli stap long hem, we olgeta oli bin raetemdaon, oli holemgud i stap.

34-38Nem blong ol man ya we oli lida blong ol famle blong olgeta i gat Mesobab, mo Jamlek, mo Josa, we papa blong hem Amajia, mo Joel, mo Jehu, we papa blong hem Josibia, mo bubu blong hem Seraea, mo papa blong bubu blong hem Asiel, mo Elioenae, mo Jahakoba, mo Jesohaea, mo Asaea, mo Adiel, mo Jesimiel, mo Benaea, mo Sisa, we papa blong hem Sifi, mo bubu blong hem Alon, we i laen blong Jedaea, we i kamaot biaen long Simri, mo Simri i kamaot biaen long Semaea ya bifo.

Nao from we ol famle blong olgeta ya oli stap kam plante we plante,

39olgeta oli stap go mekem ples blong olgeta olbaot long bigfala levelples ya long medel blong ol hil, long saed i go long wes. Oli stap tekem ol sipsip blong olgeta oli go kakae long ples ya, gogo kasem klosap long taon ya Gerara saed i kam.

40Nao long ples ya, oli faenem wan bigfala graon we i gat plante gudfala gras long hem, we i wan sefples we i kwaet gud, mo oli kam stap long hem. Bifo, graon ya i graon blong ol laen blong Ham.

41Biaen, long taem blong King Hesekia blong Juda, ol man ya oli go long Gerara, nao oli spolem ol haos tapolen, mo ol haos blong olgeta man we oli stap long ples ya. Oli ronemaot ol man ya, mo oli mekem hom blong olgeta long ples ya, mo oli stap olwe long hem, from we i gat fulap kakae blong sipsip long hem.

42Mo i gat faef handred narafala man tu blong laen ya blong Simeon we oli muvaot i go long kantri ya Edom long saed i go long is. Mo i gat fo man oli lidim olgeta, we nem blong olgeta, Pelatia, mo Nearia, mo Refaea, mo Usiel. Papa blong olgeta ya, Jisi.

43Olgeta ya oli kilim ol laen blong Amalek we oli stap yet long ples ya, mo ol man we oli kamaot biaen long olgeta oli stap long ples ya kam kasem tede.