Jeremaea 50 - Bislama Bible Revised 2012

Ol enemi oli winim Babilonia

1 Aes 13.1—14.23; 47.1-15 Nao Hae God i givim tok blong hem long Profet Jeremaea we i tok agens long kantri ya Babilonia wetem taon blong hem Babilon, mo profet i talemaot we hem i talem se,

2“!Jeremaea!

!Yu wetem ol man blong yu,

yufala i go talemaot nius ya

long olgeta kantri!

!Yufala i no haedem!

!Yufala i mas talemaotgud!

Yufala i pulum flaeg i go antap,

blong soemaot

we naoia, Babilon i foldaon finis.

God ya Merodak,

we i god blong olgeta,

we narafala nem blong hem Bel,

hem i brobrok finis,

mo hem i sem tumas.

Ol pija blong hem oli nogud we i nogud,

i blong sem nomo.

Naoia oli smas olgeta,

mo ol man oli no moa ona long olgeta,

oli ting rabis nomo long olgeta.

3“Ol soldia blong not oli aot finis, oli stap wokbaot i kam blong faet agens long Babilonia. Bambae oli spolemgud kantri ya, oli mekem i kam olsem draeples nomo. Ol man mo ol anamol bambae oli ronronwe, nao bambae i no moa gat man i stap long ples ya.”

Ol laen blong Isrel bambae oli kambak bakegen long stret ples blong olgeta

4Nao Profet Jeremaea i talemaot we Hae God i talem se, “Ol man Isrel* mo ol man Juda.* Mi mi God blong yufala, mo taem dei ya i kamtru, bambae yufala i krae, bambae yufala i stap lukaot mi.

5Bambae yufala i stap asaskem rod ya we i go long Saeon,* mo bambae yufala i folem rod ya. Mo bambae yufala i mekem wan strong promes* wetem mi, we bambae yufala i holem olwe gogo i no save finis.

6“Yufala i man blong mi, be yufala i lus finis. Yufala i olsem ol sipsip we man blong lukaot long olgeta i lidim olgeta oli go lus long ol hil. Oli stap wokbaot olbaot antap long ol hil, gogo oli no moa save stret ples blong olgeta.

7Long fasin ya, taem ol enemi oli faenem yufala, oli stap faet agens long yufala. Ol enemi ya blong yufala oli stap talem se, ‘Olgeta ya oli mekem sin agens long Hae God, nao from samting ya, fasin ya we yumi mekem long olgeta i oraet nomo. Bifo, ol bubu blong olgeta oli trastem Hae God, mo i stret blong olgeta ya tu oli stap putum tingting blong olgeta i stap strong long hem oltaem, be oli no mekem.’

8 Rev 18.4 “Naoia, yufala i mas aot long Babilon, yufala i mas ronwe long kantri ya. Yufala nao i mas faswan blong aot long ples ya.

9Bambae mi mekem ol kantri long not oli girap, oli kam faet agens long ol man Babilonia. Bambae oli laenap, oli kam faet agens long kantri ya, mo bambae oli winim hem. Olgeta ya oli namba wan man blong sut long bonara, mo taem oli sutum samting, oli no save mestem.

10Taem ol enemi ya oli kam faet agens long Babilonia, bambae oli save tekemaot evri samting we oli wantem, oli karem i blong olgeta. Mi mi Hae God, mo hemia tok blong mi.”

Ol enemi bambae oli spolem taon ya Babilon

11Nao Profet Jeremaea i gohed i talemaot we Hae God i talem se, “Ol man Babilonia. Bifo, yufala i go faet agens long kantri ya blong mi, mo yufala i tektekemaot olgeta samting blong hem, yufala i karem i blong yufala. Mo taem yufala i mekem samting ya, yufala i glad, yufala i harem gud tumas, olsem yangfala woman buluk we i stap purumpurumbut long wit,* mo i harem gud, i wantem kakae, no olsem man hos we i harem gud tumas, i stap singsingaot from.

12Be bigfala taon ya blong yufala bambae i sem gud, mo ol man bambae oli lukluk rabis long hem. Kantri ya blong yufala bambae hem i no moa gat hae nem, bambae i daon moa, i winim ol narafala kantri. Bambae hem i kam draeples we i no gat wota nating long hem.

13Nao from we mi mi kros tumas long taon ya blong yufala, ol enemi bambae oli spolemgud ples ya, mo bambae hem i stap nating nomo, we bambae i no moa gat man i save stap long hem bakegen. Mo taem ol man we oli pas long ples ya oli luk, bambae oli seksek, mo oli sapraes tumas long hem.

14“Ol man blong sut long bonara. Yufala i mas go hivap raon long taon ya Babilon, yufala i laenap rere. Yufala i mas sutum ol ara blong yufala i go long hem, from we mi mi Hae God, mo ol man blong ples ya oli mekem sin agens long mi.

15Taem yufala i raonem taon ya finis, yufala i mas singsingaot bigwan, blong faet agens long olgeta. Babilonia i kam long han blong yufala finis. Stonwol blong hem, ol enemi oli brekem, nao oli go insaed, mo oli brebrekemdaon ol stonwol ya evriwan. Mi mi mas givim panis long ol man Babilonia, blong givimbak fasin ya we oli mekem agens long mi. Mo fasin ya we olgeta oli mekem long ol narafala man, yufala tu i mas givimbak long olgeta.

16Olbaot long ples ya, yufala i no mas letem man i go planem ol kakae, mo yufala i no mas letem man i go karemaot kakae long ples ya tu. Ol strenja we oli stap long ples ya, bambae oli fraet long ol soldia blong yufala, mo bambae oli ronwe i gobak long ples blong olgeta bakegen.”

Ol laen blong Isrel bambae oli gobak long ples blong olgeta bakegen

17Nao Profet Jeremaea i gohed, i talemaot we Hae God i talem se, “Ol laen* blong Isrel.* Fastaem, king blong Asiria i kam faet agens long yufala, mo biaen, King Nebukadnesa, king blong Babilonia i kam faet agens long yufala, we i meksave yufala. Fasin ya we yufala i kasem, i olsem ol sipsip we laeon i kam ronemaot olgeta i go olbaot, mo i kilim wan, i kakae, mo biaen, narawan i kamtru, i finisimgud, mo i brebrekem ol bun blong hem.

18Mi mi Hae God we mi gat olgeta paoa, mo mi mi God blong yufala. Mo mi bambae mi givim panis long King Nebukadnesa, wetem olgeta man long kantri blong hem, olsem we mi givim panis long king blong Asiria.

19Mi bambae mi tekem yufala i kambak long graon blong yufala bakegen. Bambae yufala i stap kakae ol kakae we oli stap gru long hil ya Kamel, mo long ol ples long Basan. Mo olgeta kakae we oli stap gru long tufala distrik ya Efrem* mo Gilead, bambae yufala i save kakae olsem we yufala i wantem.

20Mo i gat taem i stap kam we bambae mi no moa save luk ol sin blong yufala, from we yufala ya we bambae mi sevem yufala, bambae mi fogivim yufala evriwan, mi tekemaot ol sin blong yufala. Mi mi Hae God, mo hemia tok blong mi.”

Ol man Babilonia bambae oli mas kasem panis

21Mo bakegen Profet Jeremaea i talemaot we Hae God i talem se, “!Ol enemi blong Babilonia! !Yufala i go mekem faet long ol man Babilonia long distrik ya Merataem, mo long ol laen blong Pekod! !Yufala i mas kilim olgeta evriwan i ded! Bambae yufala i mas mekem olgeta samting ya we mi mi talem long yufala.

22Bambae i gat bigfala noes blong faet i stap kamaot long kantri ya. Bambae yufala i spolem evri samting long ples ya.

23Ol man Babilonia ya we bifo paoa blong olgeta i strong tumas, oli winim evri ples long wol, be paoa ya blong olgeta bambae i brokdaon olgeta. Mo taem olgeta kantri long wol oli harem nius blong ol samting we i kasem ol man Babilonia, bambae oli sek mo oli fraet nogud. Mi mi Hae God, mo hemia tok blong mi.

24“Ol man Babilonia. Yufala i stap faet agens long mi, mo from samting ya, trap ya we mi putum blong kasem yufala, bambae i holem yufala, we bambae yufala i sek nomo long hem.

25Mi Hae God, mi Masta* blong olgeta man, mo mi gat olgeta paoa, mo mi mi gat wok blong mekem long kantri blong yufala. Ol haos we ol samting blong faet blong mi oli stap long hem, mi mi openem olgeta finis, mo mi tekemaot olgeta oli stap rere, from we mi mi kros we mi kros tumas long yufala.

26“Ol enemi blong Babilonia. Yufala i mas kamaot long evri saed, blong kam mekem faet long kantri ya. Yufala i mas brekem ol doa blong ol haos we oli stap putumgud ol kakae blong olgeta long hem. Mo yufala i mas karemaot olgeta samting blong olgeta, mo yufala i mas hivimap olgeta olsem we yufala i hivimap kakae we yufala i tekemaot long garen. Yufala i no mas livim wan samting nating i stap long kantri ya, yufala i mas spolem olgeta samting evriwan.

27Yufala i mas kilim ol soldia blong olgeta oli ded, olsem we man i kilim ol anamol. !Sore tumas long ol man Babilonia! Taem blong olgeta blong kasem panis i kamtru finis.”

28Nao profet i talem se, “Hae God i God blong yumi, mo ol man blong yumi we oli stap long Babilonia, bambae oli aot long ples ya, oli ronwe i kambak long Jerusalem.* Mo bambae oli talemaot ol samting we hem i mekem long ol man Babilonia, blong givimbak fasin ya we olgeta oli mekem long haos blong hem bifo.”

29 Rev 18.6 Nao profet i gohed, i talemaot we Hae God i talem se, “Ol enemi blong Babilonia. Mi mi Tabu God blong ol laen* blong Isrel.* Yufala i mas singaot ol man we oli waes blong sut long bonara, blong oli go faet agens long ol man Babilonia. Yufala evriwan i mas go hivap raon long taon ya, blong blokem ol man blong hem oli no save ronwe. Yufala i mas givimbak ol samting we oli bin mekem, mo yufala i mas mekem i strong long olgeta, olsem we oli mekem long ol narafala man. Yufala i mas mekem olsem, from we oli praod tumas long fes blong mi.

30Long taem ya, ol yang man blong olgeta we oli strong man blong faet, bambae yufala i kilim olgeta evriwan oli ded olbaot long ol rod blong taon ya. Mi mi Hae God, mo hemia tok blong mi.

31“Ol man Babilonia. Mi mi Hae God, mi Masta blong olgeta man, mo mi gat olgeta paoa. Yufala i praod tumas, mo from samting ya, mi mi agensem yufala. Taem i kam finis blong mi mi givim panis long yufala.

32Yufala i flas tumas, be bambae yufala i stambol, yufala i foldaon, mo bambae i no gat man blong givhan long yufala blong yufala i stanap bakegen. Bambae mi putum faea long ol taon blong yufala, we bambae i spolem olgeta samting we i stap raonabaot long yufala.”

33Mo profet i gohed, i talem se, “Hae God i gat olgeta paoa, mo hem i talem se, ‘Ol man Isrel mo ol man Juda.* Yufala i stap harem nogud tumas aninit long han blong ol enemi ya blong yufala. Ol enemi ya oli stap gad gud long yufala, we oli no save lego long yufala nating, blong yufala i save go fri.

34Be i gat wan man i stap we i strong we i strong, mo hem bambae i sevem yufala. Hemia mi ya, mo nem blong mi, Hae God we i Gat Olgeta Paoa. Mi nomo bambae mi stanap long saed blong yufala, mo bambae mi givim pis long olgeta man long wol ya. Be bambae mi mekem ol man Babilonia oli kasem trabol.’ ”

35Mo profet i gohed i talemaot we Hae God i talem se,

“!Ol man Babilonia!

!Naef blong faet bambae i kakae yufala!

!Bambae yufala evriwan i ded!

Ol lida blong yufala

wetem ol waes man blong yufala

bambae yufala evriwan i ded.

36Ol giaman profet blong yufala

oli no gat hed nating,

mo bambae oli ded.

Ol soldia blong yufala tu,

oli fraet we i fraet,

mo bambae oli ded.

37Ol hos wetem ol kat blong faet blong yufala,

ol enemi bambae oli flatemgud olgeta.

Ol soldia we yufala i stap pem olgeta

blong oli kam givhan long yufala,

oli olsem woman nomo,

mo bambae oli ded evriwan.

Ol gudgudfala samting blong yufala,

ol enemi bambae oli spolemgud,

mo bambae oli tekemaot plante samting we oli wantem,

oli karem i blong olgeta.

38Ren bambae i no moa foldaon

long kantri blong yufala,

mo ol reva blong yufala

bambae oli drae evriwan.

Kantri ya blong yufala,

hem i ples blong ol giaman god,

mo bambae oli stap mekem

yufala i kam krangke olgeta.

39 Rev 18.2 “Taon ya blong yufala, bambae i fulap long ol wael anamol, mo ol devel, mo ol hoknaet. Long ples ya, bambae i no moa gat man i save stap long hem bakegen samtaem.

40Jen 19.24,25Olsem we mi spolemgud Sodom mo Gomora bifo wetem ol taon we oli stap raonabaot long tufala, nao biaen man i no moa save stap long ol ples ya, long sem fasin bambae man i no moa save stap long bigfala taon ya blong yufala bakegen samtaem. Mi mi Hae God, mo hemia tok blong mi.

41“Ol man Babilonia.

I gat wan kantri long not

we i longwe tumas,

we long fiuja,

ol man blong hem bambae oli strong we i strong.

Mo bambae oli aot,

oli kam mekem faet long ples ya,

we bambae i gat plante king i stap lidim olgeta.

Olgeta ya bambae oli mekemrere

blong kam mekem faet long ples ya.

42Olgeta ya bambae oli man nogud

we taem oli faet,

bambae oli no gat sore nating.

Bambae oli mekemrere

ol bonara mo ol spia blong olgeta,

mo taem oli resis i kam long ol hos blong olgeta,

noes blong olgeta bambae i olsem noes blong bigfala solwota

we i stap brok long rif.

Bambae oli mekemrere blong kam faet

agens long kantri ya blong yufala.

43Bambae king blong yufala

i harem nius blong olgeta ya,

nao tufala han blong hem

bambae i slak we i slak,

i stap hang olsem we tufala i ded finis.

Bigfala trabol bambae i kasem hem,

nao bambae hem i harem nogud tumas

olsem woman we i harem nogud

long taem ya we i bonem pikinini blong hem.

44“Plante taem, laeon i aot long bus klosap long Jodan Reva, i wokbaot i kam long ples we ol sipsip oli stap kakae long hem, mo i ronem olgeta oli go wanwan. Mo long sem fasin, mi bambae mi kam, mo kwiktaem nomo, bambae mi mekem yufala i ronwe long kantri blong yufala. Nao biaen, man ya we mi mi jusumaot hem blong i lida, bambae hem i rul long kantri blong yufala. I no gat wan man nating we i sem mak wetem mi, mo i no gat man i save tekem mi mi go long kot. I no gat wan lida nating we i gat paoa blong faet agens long mi.

45Yufala i lesin gud long plan ya we mi mekem agens long bigfala taon ya blong yufala, mo long ol man blong hem. Bambae ol enemi oli kam pulumaot ol pikinini blong yufala, oli karem olgeta i go. Nao olgeta man we oli luk, bambae oli fraet tumas, oli harem nogud from.

46Taem ol enemi oli holem bigfala taon ya blong yufala, bigfala noes blong hem bambae i mekem graon i seksek, mo ol narafala kantri bambae oli save harem noes blong yufala we yufala i stap krae.”