Maeka 7 - Bislama Bible Revised 2012

Profet Maeka i harem nogud from ol fasin nogud blong ol man

1Nao Profet Maeka i talem se, “!Naoia tingting blong mi i foldaon olgeta! Mi mi olsem man we i hanggri tumas, i stap go olbaot blong lukaot frut blong i kakae, be i no moa gat frut long ol figtri,* mo long ol rop blong grep* tu. Ol gudfala fig, mo ol grep, ol man oli tekem evriwan finis.

2Naoia, long kantri ya, i no moa gat man i stap we fasin blong hem i stret, mo we tingting blong hem i stap strong long God. Olgeta evriwan i stap lukaot rod blong kilim man i ded. Ol man oli stap ronem ol man ples blong olgeta bakegen blong kilim olgeta i ded.

3Ol man oli waes gud blong mekem ol rabis fasin. Oltaem long kot, ol haeman wetem ol jaj oli stap askem long man blong i pem olgeta, blong oli save haedem rong blong hem. Taem wan man we i gat paoa i wantem wan samting we i no stret, hem i save go talem long olgeta ya, nao wantaem nomo, olgeta oli stap joen wanples blong mekem.

4Nating we sam long olgeta ya, fasin blong olgeta i stret lelebet winim ol narawan, be olgeta tu oli no stret nating long fes blong God, oli olsem rabis gras nomo.”

Nao profet i talem long ol man se, “Olgeta. Ol profet ya bifo, we Hae God i sanem olgeta olsem wajman blong wekemap yumi, oli talem finis, se taem blong panis bambae i kam, mo taem ya i kamtru finis. Ol trabol ya we oli tokbaot, oli stap kamtru nao.

5Olgeta we oli stap raonabaot long yufala, be bambae yufala i no bilif long tok blong olgeta, mo ol fren blong yufala, bambae yufala i no trastem olgeta. Yufala i mas lukaot gud long ol tok we yufala i stap talem. Nating we yufala i stap toktok wetem woman blong yufala nomo, be yufala i mas lukaot gud.

6Mat 10.35,36; Luk 12.53Long taem ya, ol pikinini bambae oli stap ting rabis long ol papa blong olgeta, mo ol gel bambae oli stap girap agens long ol mama blong olgeta. Ol yang woman bambae oli stap rao long mama blong ol man blong olgeta. Olgeta we oli blong wan haos nomo bambae oli stap enemi long olgeta bakegen.

7“Be mi, Hae God i God blong mi, mo oltaem bambae mi putum tingting blong mi i stap strong long hem nomo, from we mi save se hem bambae i harem mi. Bambae mi stap wet long hem, from we hem nao bambae i kam sevem mi.”

Hae God bambae i sevem ol man blong hem

8Nao profet i talem se, “Nating we yumi foldaon finis, be ol enemi blong yumi oli no gat rod nating blong laf long yumi, from we bambae yumi girap bakegen yet. Naoia yumi stap long tudak, be Hae God bambae i givim laet long yumi.

9Yumi mekem sin agens long hem, yumi mekem hem i kros, nao from samting ya, yumi mas mekem tingting blong yumi i stap daon, blong karem kros ya blong hem gogo hem bambae i faet long saed blong yumi bakegen, mo bambae i stretem ol fasin nogud ya we ol enemi blong yumi oli mekem long yumi. Bambae hem i tekemaot yumi long tudak, yumi kam long delaet bakegen. Bambae yumi stap gogo, yumi luk we hem bambae i sevem yumi.

10Nao long taem ya, ol enemi blong yumi bambae oli luk samting ya, mo tingting blong olgeta bambae i foldaon, oli sem, from we bifo oli bin jikim yumi, oli talem se, ‘?Wehem Hae God ya we i God blong yufala?’ Bambae yumi luk we hem bambae i winim olgeta, i purumbut long olgeta, olsem we man i wokbaot long sofmad long rod.

11“Ol man Jerusalem.* I gat taem i stap kam we ol man blong taon ya bambae oli stanemap bigfala stonwol blong taon ya bakegen. Long taem ya, bambae ples blong yufala i kam bigwan moa.

12Long taem ya, olgeta we bambae oli kamaot biaen long yumi, we bambae oli stap olbaot long ol narafala kantri, bambae oli kambak long taon ya bakegen. Olgeta we oli stap long Asiria long is, wetem olgeta we oli stap long Ijip long saot, mo olgeta we oli stap olbaot klosap long Yufretes Reva, mo olgeta we oli stap long ol narafala ples daon long solwota, mo long ol ples antap long hil, olgeta evriwan bambae oli kambak, oli stap wanples bakegen.

13Be olgeta ples olbaot long wol ya, bambae oli kam draeples, from we ol man blong hem oli stap mekem ol fasin we i nogud.”

Hae God bambae i gat sore long ol man blong hem bakegen

14Nao Profet Maeka i prea, i talem se, “Hae God. Mifala i man blong yu. Mifala i olsem ol sipsip blong yu we yu nomo yu jusumaot mifala. Plis yu lukaot gud long mifala, olsem we man blong lukaot long sipsip i stap lukaot long ol sipsip blong hem. Ol sipsip ya blong yu oli stap wanwan olbaot long draeples, be olbaot long ples blong mifala, i gat ol gudfala gras i stap nating. Plis yu letem olgeta oli kam kakae long gudfala graon ya long Basan mo long Gilead, olsem we oli stap kakae long hem bifo.

15“Hae God, yu yu God blong mifala. Plis yu kam mekem ol merikel long medel blong mifala bakegen, olsem we yu mekem bifo, long medel blong ol olfala blong mifala, long taem ya we yu tekemaot olgeta long Ijip.

16Nating we ol man blong ol narafala kantri, oli strong mo oli gat paoa, be taem oli luk ol merikel ya, bambae oli harem nogud. Tingting blong olgeta bambae i foldaon, nao bambae oli satem maot blong olgeta, mo oli blokem sora blong olgeta.

17Bambae oli fraet tumas, oli seksek, nao oli stap kamkamaot long ol strong ples blong haed blong olgeta, we oli stap pulum bel blong olgeta long asis blong graon olsem snek. Mo from we oli fraet tumas, bambae oli tanem tingting blong olgeta blong ona long yu.

18“Hae God. I no gat wan narafala god we i olsem yu. Bambae yu save fogivim olgeta we oli stap kamaot biaen long mifala, yu save tekemaot ol sin blong olgeta. Taem yu yu kros, be kros blong yu i no save stap longtaem. Oltaem yu yu glad blong soemaot long mifala we yu stap lavem mifala tumas.

19Hae God. Mifala i save se yu bambae yu sore bakegen long mifala, yu tekemaot sin blong mifala i gowe long mifala, olsem we yu purumbut long hem i godaon long graon, yu sakem i godaon olgeta long medel solwota.

20Mifala evriwan i laen* blong Ebraham, mo Jekob,* mo bambae yu yu save soemaot long mifala we yu stap holemstrong ol promes blong yu, mo oltaem yu stap lavem man tumas, olsem we yu promes blong mekem long ol olfala bubu blong mifala bifo.”