Esikel 30 - Bislama Bible Revised 2012

Hae God bambae i panisim Ijip

1Nao Hae God i toktok long mi bakegen long vison ya,

2i talem se, “Man blong wol ya. Mi mi Hae God, mi Masta* blong yufala, mo yu mas krae bigwan, yu talemaot we mi mi talem se,

‘I gat dei i stap kam,

we mi bambae mi panisim ol man Ijip,

mi mekem olgeta oli fraet,

oli seksek.

3Dei ya i kam klosap finis.

Long dei ya,

klaod bambae i kavremap olgeta ples,

mo mi bambae mi sanem trabol i kam

blong flatemgud ol kantri.

4Bambae ol enemi

oli go mekem faet long Ijip,

mo ol man Itiopia

bambae oli harem nogud tumas.

Bambae plante man long Ijip

oli ded long faet ya,

mo bambae ol enemi oli kam karemaot

olgeta samting blong kantri ya,

oli karem i blong olgeta.

Mo bambae oli spolemgud

olgeta ples long kantri ya,

oli livim i stap nating nomo.

5“Nao bambae ol soldia blong ol kantri ya, Itiopia, mo Libia, mo Lidia, mo Arebia, mo Kub, mo ol man blong mi tu, olgeta ya evriwan, ol man Ijip oli pem olgeta blong oli kam faet, be bambae oli ded long faet ya.

6Bambae i stat long taon ya Migdol long not, i go kasem taon ya Aswan long saot, olgeta man we oli stap givhan long Ijip, olgeta evriwan bambae oli ded long faet ya. Mo ol nambawan soldia ya blong Ijip we ol man oli stap tok flas from olgeta, bambae oli ded evriwan. Mi mi Hae God, mi Masta blong yufala, mo hemia tok blong mi.

7“Kantri ya bambae i kam nogud olgeta, i winim ol narafala kantri long wol, we bambae i no moa gat man long hem nating. Ol taon blong hem, bambae ol enemi oli spolem olgeta we oli flatemgud olgeta.

8Taem mi putum faea long kantri ya, mo ol man ya we oli stap givhan long hem oli ded evriwan, bambae olgeta oli savegud we mi mi Hae God.

9“Taem dei ya i kam, mo ol enemi oli spolem Ijip, bambae mi sanem ol man blong karem tok oli pas long sip, oli go long kantri ya Itiopia. Ol man blong kantri ya oli no tingbaot se bambae trabol i kam, be bambae oli sek long nius ya, nao bambae oli fraet we i fraet. !Tru, dei ya i stap kam!

10“Ol man Ijip oli plante we plante, be bambae mi yusum King Nebukadnesa blong Babilonia blong flatemgud olgeta.

11Bambae king ya i kam wetem ol soldia blong hem we oli no gat sore long man nating, nao bambae oli spolemgud olgeta samting long kantri ya. Bambae oli kam kilim ol man Ijip long naef blong faet, mo kantri ya bambae i fulap gud long ol dedman.

12Bambae mi mekem Nael Reva i drae, mo bambae mi mekem ol man blong ples ya oli stap long han blong ol man nogud blong ol narafala kantri we bambae oli spolemgud olgeta ples long kantri ya, wetem olgeta samting we i stap long hem. Mi mi Hae God, mo hemia tok blong mi.”

13Mo hem i gohed, i talem se, “Bambae mi spolemgud olgeta aedol ya long Memfis. Bambae i no moa gat laen blong king we i save rul long kantri ya, nao bambae mi mekem ol man oli fraet we i fraet.

14Bambae mi mekem distrik ya Patros long saed i go long saot i stap nating nomo we bambae i no gat man long hem, mo bambae mi putum faea long taon ya Joan we i stap long saed i go long not. Mo bambae mi panisim taon ya Tebes we i kaptel blong olgeta.

15Taon ya Pelusium we i strong ples blong haed blong ol man Ijip, bambae mi mekem ol man blong hem oli haremsave fulpaoa blong kros blong mi. Mo bambae mi spolemgud ol man Tebes.

16Mi bambae mi putum faea long Ijip, nao ol man blong taon ya Pelusium bambae oli harem nogud we i nogud olgeta. Bambae mi brebrekem ol stonwol blong Tebes, mo ol man long taon ya Memfis, oltaem bambae oli stap harem nogud.

17Ol yang man blong tufala taon ya Heliopolis mo Bubastis bambae oli ded long faet, mo ol narafala man, bambae ol enemi oli karem olgeta oli go wok slef* long narafala kantri.

18Taem mi brekemdaon paoa blong Ijip, mo mi mekem paoa ya blong olgeta we oli stap flas long hem i finis olgeta, bambae tudak i kam kavremap taon ya Tafanes. Klaod bambae i kavremap kantri ya, nao ol enemi blong hem bambae oli holem ol man blong olgeta taon blong hem, oli karem olgeta oli go wok slef long narafala kantri.

19Nao taem mi panisim kantri ya long fasin ya, bambae olgeta man blong hem oli savegud we mi mi Hae God.”

King blong Ijip bambae i no moa gat paoa

20Nao long namba leven yia we yumi stap wok slef* long Babilonia, long fas manis,* long namba seven dei blong hem, Hae God we i Masta* blong yumi, hem i toktok long mi long wan vison bakegen,

21i talem se, “Man blong wol ya. King ya blong Ijip, hem i no moa gat paoa, i olsem we mi brekem han blong hem finis. Mo i no gat man i fasem long bandej, no i putum pis kaliko i goraon long hem blong hangem long nek blong hem blong i save kam gud bakegen. Nao han ya i no save kam strong blong i save holem naef blong faet bakegen.

22Nao from samting ya, mi mi enemi blong king blong Ijip. Bambae i olsem we mi brekem tufala han blong hem, mo naef ya blong faet blong hem bambae i foldaon.

23Bambae mi ronemaot ol man Ijip oli go wanwan olbaot long olgeta kantri long wol.

24Mo bambae mi mekem han blong king blong Babilonia i kam strong, nao bambae mi putum naef blong faet blong mi long han blong hem. Be bambae mi tekemaot olgeta paoa blong king blong Ijip, nao bambae hem i harem nogud, i krae we i krae, olsem man we i karekil we klosap i ded from.

25Bambae mi mekem hem i no moa gat paoa, be king blong Babilonia bambae mi mekem hem i kam strong moa. Nao taem mi mi givim naef blong faet blong mi long hem, mo hem i poen i go long Ijip blong i go faet long hem, bambae olgeta man oli savegud we mi mi Hae God.

26Bambae mi ronemaot ol man Ijip oli go wanwan olbaot long olgeta kantri long wol. Nao bambae oli savegud we mi mi Hae God.”