Eksodas 25 - Bislama Bible Revised 2012

Ol presen blong wokem Haos Tapolen ya we i tabu, i blong Hae God(Eksodas 35.4-9)

1Nao Hae God i talem long Moses se,

2“Moses. Bambae yu talem long ol laen* ya blong Isrel,* se oli mas givim presen i kam long mi. Mo yu yu mas glad blong tekem presen we olgeta oli glad blong givim.

3Bambae oli save givim gol, no silva, no bras,

4no gudfala tred ya linen* we i waet, no tred we i blu no i pepol no i red, no kaliko ya we oli wokem long hea blong nani,

5no skin blong man sipsip we oli wokem i red, no nambawan leta ya we oli wokem long skin blong sikao, no wud ya kasis,*

6no olifoel* blong laet, no ol lif ya we i gat gudfala smel, we i blong putum long insens,* mo long tabu oel ya we i blong makemaot ol spesel man we mi mi jusumaot, se oli tabu, oli blong mi,

7no gudfala ston ya kanilian,* we i red, wetem ol narafala gudgudfala ston ya we i blong putum long efod* blong hae pris,* mo long spesel paos ya we hem i hangem long jes blong hem.

8Bambae yufala i mas wokem wan Haos Tapolen blong mi, blong mi save stap long medel blong yufala. Haos ya bambae i tabu,

9mo hem wetem olgeta samting we i stap insaed long hem, bambae yufala i mas wokem stret long plan blong hem we bambae mi mi talemaot long yu.”

Bokis ya we i Saen blong Promes blong Hae God(Eksodas 37.1-9)

10Mo Hae God i talem se, “Bambae yufala i mas wokem wan Bokis long wud ya kasis.* Longfala blong hem bambae i kasem wan handred fiftin sentemeta, mo bigfala blong hem bambae i kasem klosap seventi sentemeta mo hae blong hem tu bambae i kasem klosap seventi sentemeta.

11Long insaed blong hem mo long afsaed blong hem, bambae yufala i blokem ol wud blong hem long gol we i klin gud, i beswan, mo bambae yufala i wokem wan smol strap tu long gol, i goraon long hem bakegen long saed blong hem antap blong flasem.

12Bambae yufala i wokem fo ring blong hem long gol, mo bambae yufala i hangem olgeta long ol fo leg blong Bokis ya, tu long wan saed, tu long wan saed.

13Mo bambae yufala i wokem tu stik blong karem, long wud ya kasis, mo yufala i blokem tufala tu long gol,

14nao yufala i pusum tufala i gotru long ol fo ring ya, wan long wan saed, wan long wan saed.

15Mo taem yufala i pusum tufala stik ya i go, bambae yufala i no moa tekemaot tufala bakegen, bambae tufala i stap olwe long ol ring ya.

16Mo tufala flat ston ya we mi raetem ol tok blong mi long tufala finis mo we bambae mi givim long yu, bambae yu putum tufala insaed long Bokis ya.

17 Hib 9.5 “Lid blong Bokis ya, i Ples we bambae mi mi Tekemaot Sin blong yufala long hem. Bambae yufala i wokem long gol we i klin gud, i beswan. Longfala blong hem bambae i kasem wan handred fiftin sentemeta, mo bigfala blong hem bambae i kasem klosap seventi sentemeta.

18-19Bambae yufala i hamarem gol long tufala en blong Lid ya, blong wokem tu pija blong jerubim* long hem we tufala i stanap, wan long wan en, mo wan long nara en, we tufala i haf blong Lid ya nomo.

20Bambae yufala i mekem we tufala pija ya i stap lukluk i go long tufala, mo we tufala i pusum wing blong tufala i kam long tufala, nao wing blong tufala i kavremap Bokis ya antap.

21Bambae yu tekem tufala flat ston ya we bambae mi givim long yu, yu putum i go insaed, nao yu tekem Lid ya blong hem, yu satem.

22Bambae mi mi kam stap antap long Lid blong Bokis ya, long medel blong tufala jerubim ya, nao bambae mi stap mit wetem yu long ples ya, mo bambae mi givim ol tok ya blong mi long yu, we bambae yufala i mas folem.”

Tebol blong Bred we pris bambae i stap givim i go long Hae God(Eksodas 37.10-16)

23Mo Hae God i talem se, “Bambae yufala i mas wokem wan Tebol long wud ya kasis.* Longfala blong hem bambae i ova long naenti sentemeta, mo bigfala blong hem bambae i kasem klosap fifti sentemeta, mo hae blong hem bambae i kasem klosap seventi sentemeta.

24Bambae yufala i blokem ol wud blong hem long gol we i klin gud, i beswan, mo bambae yufala i wokem wan smol strap i goraon long hem bakegen long saed blong hem antap blong flasem.

25Long top blong Tebol ya, bambae yufala i wokem wan rel i goraon long hem blong holem ol bred, we hae blong rel ya bambae i kasem seven sentemeta haf. Mo bambae yufala i wokem wan narafala smol strap tu long gol i goraon long rel ya blong flasem.

26Bambae yufala i wokem fo ring blong Tebol ya long gol, mo bambae yufala i hangem olgeta long ol fo kona blong hem, klosap long ol leg blong hem,

27-28long saed blong hem antap, klosap long rel ya we i blong holem bred. Mo bambae yufala i wokem tu stik blong karem Tebol ya long wud ya kasis, mo bambae yufala i blokem tufala tu long gol. Nao bambae yufala i pusum tufala i gotru long ol ring ya, wan long wan saed, wan long wan saed, mo oltaem, bambae yufala i stap karem Tebol ya long tufala stik ya.

29Mo bambae yufala i wokem olgeta samting blong yusum long Tebol ya long gol we i klin gud, i beswan. Hemia ol plet mo besin blong hem, wetem ol kap mo botel blong hem, we oli blong yusum blong kafsaedem waen blong givim i kam long mi.

30Lev 24.5-8Tebol ya, bambae yufala i putum i stap long fran blong Bokis ya we i Saen blong Promes* blong mi, mo oltaem bambae yufala i stap putum bred ya long hem we i tabu, i blong mi.”

Ples blong Putum Laet(Eksodas 37.17-24)

31-39Mo Hae God i talem se, “Bambae yufala i mas wokem wan Ples blong Putum Laet we bambae i gat ples blong putum seven laet long hem, mo blong wokem samting ya wetem ol seven laet blong hem, mo ol narafala samting blong hem, bambae yufala i tekem toti faef kilo gol we i klin gud, i beswan. Ples ya blong Putum Laet, bambae yufala i hamarem wan pis gol nomo blong wokem stamba blong hem wetem stik blong hem, mo ol han blong hem, mo ol pija blong flaoa wetem ol haf blong ol flaoa ya blong flasem. Stik blong samting ya bambae i gat sikis han blong hem, we bambae oli kamaot tutu long hem, tri long wan saed, tri long wan saed, mo stik ya bambae i gat fo pija blong flaoa blong tri ya amon,* wetem olgeta haf blong flaoa ya, blong flasem. Long stik ya, aninit long trifala ples we tufala han i kamaot, bambae i gat pija blong stamba blong flaoa blong tri ya amon, mo ol han ya wanwan bambae oli gat tri pija blong flaoa ya wetem ol haf blong hem, blong flasem olgeta. Evri haf blong samting ya, i stat long stamba blong hem, i go kasem ol han blong hem wetem ol haf blong flaoa ya we i blong flasem, be bambae yufala i hamarem long wan pis gol nomo. Nao bambae yufala i tekem haf gol ya we i stap, yufala i yusum blong wokem ol seven laet ya, mo bambae yufala i putum olgeta wanwan antap long stik blong samting ya, mo antap long ol sikis han blong hem, blong oli save saen i kam. Mo bambae yufala i yusum haf gol ya tu blong wokem ol pinses mo ol plet we ol pris* bambae oli yusum blong lukaot long ol laet ya.

40Wok 7.44; Hib 8.5Mo taem yufala i wokem samting ya, bambae yufala i mas folemgud plan ya we mi stap talemaot long yu naoia, antap long hil ya.”