1Nao biaen long taem ya, King Deved i singaot ol nambawan soldia blong ol laen* blong Isrel* oli kam wanples, mo i gat toti taosen man olgeta oli kam.
2Eks 25.22Nao hem i lidim olgeta oli go long taon ya Bahala long Juda,* blong oli tekem Bokis ya we i Saen blong Promes* blong Hae God i kam. Hae God i gat olgeta paoa, mo hem i stap sidaon long ples blong hem antap long tufala jerubim* ya we i stap antap long Bokis ya, mo hem i stap rul, nao from samting ya, Bokis ya i karem nem blong hem.
31 Saml 7.1,2Olgeta oli go tekemaot Bokis ya long haos blong Abinadab, we i stap antap long hil long ples ya, nao oli putum long wan niufala kat we buluk i pulum, mo oli tekem i kam. Mo taem oli stap wokbaot, Usaha mo Ahio, we papa blong tufala Abinadab, tufala i stap lukaot long kat ya,
4we Ahio i holem rop blong buluk, i stap wokbaot fastaem.
5Mo king olgeta oli stap danis we oli meksave, mo oli stap singsing blong leftemap nem blong Hae God. Mo oli stap plei long ol gita, mo mandolin, mo tamborin, mo tamtam, mo simbol blong olgeta.
6Nao taem olgeta oli kam long graon blong Nakon, long ples blong klinim bale* blong hem, tufala buluk ya i stambol, nao Usaha i pusum han blong hem i go blong i holemtaet Bokis ya.
7Nao wantaem nomo, Hae God i kros long hem from we hem i no gat raet blong tajem Bokis ya, nao i kilim hem i ded. Hem i ded long saed blong Bokis ya nomo,
8mo i stat long taem ya kam kasem tede, oli stap talem nem blong ples ya, se Peres Usaha, we i min se “Panis blong Usaha”. Mo king i harem nogud tumas, from we Hae God i kros, i panisim man ya olsem.
9Nao king i fraet long Hae God, i talem se, “?Bambae mi tekem Bokis ya i kam stap wetem mi olsem wanem?”
10Nao hem i no moa wantem tekem i kam long Jerusalem.* Hem i tanem kat, i aot long rod ya, nao i tekem Bokis ya i go long haos blong Obededom, we i blong taon ya Gat.
111 Kron 26.4,5Nao Bokis ya i stap tri manis long ples ya, mo long taem ya, Hae God i stap blesemgud Obededom wetem ol famle blong hem.
Bokis ya i kamtru long Jerusalem12Nao King Deved i harem nius we Hae God i stap blesem Obededom wetem ol famle blong hem mo olgeta samting we hem i gat, from Bokis ya we i stap long haos blong hem. Nao hem i go tekemaot Bokis ya long hem bakegen, blong i tekem i kam long Jerusalem,* mo hem wetem ol man blong hem oli glad tumas, oli stap danis from.
13Nao taem ol man we oli karem Bokis ya oli jes stat blong wokbaot, king i blokem olgeta blong oli wet fastaem. Nao hem i kilim wan bul wetem wan smol buluk we i fatfat gud, blong mekem sakrefaes long Hae God.
14Long taem ya, hem i parpar nomo, nao i danis we i danis, i meksave, blong i leftemap nem blong Hae God.
15Nao long fasin ya, king wetem ol man blong hem oli karem Bokis ya i kam antap long Jerusalem. Oli glad tumas, nao oli stap singsingaot, mo oli stap blu pupu from.
16Nao long taem ya we oli stap karem Bokis ya i go insaed long taon, woman blong King Deved ya Mikal we i dota blong King Sol, hem i lukluk i kamtru long windo, mo i luk we king i stap jamjam, mo i stap danis bigwan blong leftemap nem blong Hae God, nao hem i harem nogud from.
17Olgeta oli karem Bokis ya i kam, oli go putum long ples blong hem insaed long haos tapolen ya we king i stanemap rere finis blong oli putum i go long hem. Nao king i kilim ol anamol blong mekem ol sakrefaes long Hae God, sam we oli bonem i bon evriwan, mo sam we oli bonem haf oli kakae haf, blong soemaot we oli stap fren gud wetem hem.
18Mo taem hem i finisim wok blong ol sakrefaes ya, hem i blesem ol man long nem blong Hae God we i gat olgeta paoa,
191 Kron 16.43mo i givimaot ol kakae ya long olgeta. Long olgeta man mo woman long Isrel* wanwan, hem i givim wan bred,* mo wan pis mit we oli rusum finis, mo sam frut ya grep* we i sandrae finis, nao olgeta evriwan oli aot, oli gohom.
20Nao biaen, taem king i kambak long haos blong hem blong luk ol pikinini blong hem, Mikal i kam blong mitim hem, nao i tok long hem, i talem se, “!Deved! !Yu yu king blong Isrel! !Be tede yu mekem wan samting we i no stret nating long hae nem ya blong yu! !Yu yu stap soemaot yu long fes blong ol haosgel blong ol haeman blong yu! !Yu stap mekem olsem man we i no save wan samting!”
21Be king i talem se, “Hae God i jusumaot mi blong mi tekem ples blong papa blong yu wetem ol pikinini blong hem, mo mi mi stap danis blong leftemap nem blong hem. Ol man ples blong yumi oli man blong hem nomo, mo hem nao i putumap mi blong mi lida blong olgeta. Mo bambae mi mi stap gohed blong danis blong leftemap nem blong hem,
22mo bambae mi mekem nem blong mi i kam nogud moa. Maet yu yu ting se mi mi wan olbaotman nomo, be ol gel ya bambae oli stap tinghae long mi.”
23Mikal ya, hem i dota blong King Sol, be hem i no bonem wan pikinini nating, gogo hem i ded.
Who We AreWhat We EelieveWhat We Do
2025 by iamachristian.org,Inc All rights reserved.
