2 Kronikel 8 - Bislama Bible Revised 2012

Ol wok we King Solomon i mekem(1 King 9.10-28)

1King Solomon i stap wok twanti yia blong wokem haos* blong Hae God mo haos blong hem.

2Mo hem i wokemgud bakegen tu ol taon ya we King Hiram blong Taea i givim long hem, mo i putum ol laen* blong Isrel* oli stap long olgeta.

3Hem i go mekem faet long tufala ples ya Hamat mo Joba long not, i winim ol man blong tufala, mo i holem tufala i blong hem.

4Mo i wokem bigfala stonwol i goraon long taon ya Tadmoro long not, long draeples, mo i wokemgud olgeta taon long ples ya Hamat we i stanemap olgeta finis blong putum ol kakae wetem ol samting blong faet i stap long olgeta.

5Mo hem i wokem plante narafala taon tu oli gud bakegen. Nem blong ol taon ya, i gat tufala taon ya Betoron Antap mo Betoron Daon, we tufala wanwan i gat bigfala stonwol i goraon long tufala, wetem ol doa we oli save lokem long longfala aean.

6Mo taon ya Bahalat, mo ol narafala taon we hem i wokem olgeta finis, i stap putum ol kakae wetem ol samting blong faet i stap long hem, mo ol taon ya we hem i stap putum ol kat blong faet blong hem oli stap long hem, mo ol taon we ol soldia blong hem we oli ron long hos oli stap long hem. Mo hem i stap wokem tu ol narafala samting we hem i wantem wokem long Jerusalem,* mo long Lebanon, mo long ol narafala ples olbaot long kingdom blong hem.

7-10Bifo, long taem ya we ol laen blong Isrel oli kam insaed long kantri ya blong holem i blong olgeta, oli no kilim olgeta man evriwan we oli stap long ples ya oli ded. Long olgeta ya, i gat ol laen blong Het, mo ol laen blong Amoro,* mo ol laen blong Perij, mo ol laen blong Hivi,* mo ol laen blong Jebus. Mo King Solomon i stap tekem olgeta we oli kamaot biaen long olgeta ya, i stap fosem olgeta blong oli wok slef* blong hem, we oli stap wok long ol naranarafala wok blong hem. Hem i putum tu handred fifti man blong hem oli bos long olgeta, mo olgeta we oli stap kamaot biaen long olgeta ya oli stap wok slef kam kasem tede. Be hem i no mekem ol laen blong Isrel oli wok slef, hem i putum olgeta oli soldia blong hem, mo oli kapten blong hem, mo oli komanda blong ol kat blong faet blong hem, mo oli soldia blong hem we oli ron long hos.

11Mo taem hem i finisim haos blong woman ya blong hem we i dota blong king blong Ijip, hem i tekem woman ya i aot long haf ya blong Jerusalem we nem blong hem “Taon* blong King Deved”, i kam putum hem long haos ya. Hem i talem se, “I no stret blong woman blong mi i stap long haos ya blong papa blong mi, from we ol ples we Bokis ya we i Saen blong Promes* blong Hae God i stap long hem, oli tabu.”

12Nao oltaem, hem i stap mekem sakrefaes long Hae God long olta ya we hem i wokem, we i stap long fran blong haos blong Hae God.

13Nam 28.9,10; Nam 28.11-15; Eks 23.14-17; 34.22,23; Nam 28.16—29.39; Dut 16.16Hem i stap mekem ol sakrefaes blong ol tabu dei olsem we Loa* blong Moses i talem. Hemia long Sabat* dei, mo long Lafet* blong Niumun,* mo long trifala lafet ya we oli wokem evri yia, we nem blong trifala, Lafet blong Kakae Bred* we i No Gat Is long hem, mo Lafet blong Tekemaot Kakae long Garen, mo Lafet blong Wokem ol Wansaed* Haos.

14Hem i putum ol pris long ol wok we oli mas wokem evri dei, folem ol rul we papa blong hem i bin putum, mo i putum ol Livaet* long ol wok blong olgeta. Olgeta ya oli stap givhan long ol pris, oli stap singsing long ol singsing blong presem God, mo oli stap mekem ol narafala wok blong olgeta. Mo hem i seraot ol gad blong haos blong Hae God long ol grup blong olgeta, mo i putum olgeta oli stap gad long ol doa blong haos ya evri dei, folem fasin we papa blong hem i bin talem bifo.

15Ol tok long fasin blong lukaot long ol storum mo ol narafala samting olsem, we papa blong hem i bin talem bifo, ol pris wetem ol Livaet oli folem evriwan.

16Nao long fasin ya, olgeta wok we king i stap mekem i finis olgeta, mo olgeta wok blong haos blong Hae God i go gud nomo, i stat long taem we oli putum fandesen blong hem, i kam kasem we ol wok blong hem i finis olgeta.

17Nao king i go visitim tufala taon ya Ejionkeba mo Elat, long solwota long Akaba Bei long Edom.

18Long taem ya, King Hiram blong Taea i sanem sam sip i kam long hem, wetem ol kapten blong olgeta mo ol boskru blong olgeta, we oli man blong solwota. Nao oli joen wetem ol kapten blong King Solomon, oli go long ples ya Ofiri, mo oli karem moa long fiftin tan gol i kam, oli givim long King Solomon.