Amos 9 - Bislama Bible Revised 2012

Ol panis we Hae God bambae i givim long ol man Isrel

1Nao bakegen, Profet Amos i talem se, “Mi mi luk wan vison* bakegen, we Masta* blong yumi i soemaot long mi, mo long vison ya, mi luk we hem i stap stanap klosap long olta ya long haos* blong hem. Nao mi harem we hem i talem se, ‘Yufala i go kilimstrong top blong tu bigfala pos ya long vranda blong haos ya, blong mekem fandesen blong hem i seksek evriwan. Bambae yufala i go kilimaot tufala pos ya, blong tufala i folfoldaon long hed blong ol man we i stap long ples ya. Ol narafala man we oli no ded long taem ya, mi bambae mi kilim olgeta long taem blong faet. Bambae i no gat wan long olgeta i save ronwe blong go haed. Bambae i no gat wan long olgeta nating i stap.

2Nating we sam long olgeta oli digim hol i godaon blong go haed long Hom* blong ol Dedman, be bambae mi tekemaot olgeta i kam antap bakegen. Mo nating we sam long olgeta oli ronwe i go antap i kasem long skae, be bambae mi tekemaot olgeta i kamdaon bakegen.

3Nating we sam long olgeta oli go haed olbaot long hil ya Kamel, be bambae mi go lukaot olgeta, mi holem olgeta, mi tekem olgeta i kambak bakegen. Mo nating we sam long olgeta oli go haed long solwota, oli godaon olgeta long botom blong hem, be bambae mi givim tok long bigfala samting ya Leviatan,* blong i kakae olgeta.

4Nating we ol enemi blong olgeta oli kam tekemaot olgeta i go wok slef,* be bambae mi givim tok long ol enemi ya blong oli kilim olgeta oli ded. Tingting blong mi i stap strong yet, se bambae mi no save givhan long ol man ya, mi mas kilim olgeta oli ded.’ ”

5Nao profet i talem se,

“Hae God i Masta blong yumi,

mo hem i gat olgeta paoa.

Taem hem i tajem wol ya,

wantaem nomo graon ya i seksek,

nao olgeta man we oli stap long hem

oli stap krae bigwan.

Long evri ples,

bambae graon i kam antap, i godaon,

i kam antap, i godaon,

olsem we long taem blong taedelwef,

solwota i stap kam antap, i godaon.

6Hae God ya,

hem i wokem ples blong hem

antap long skae ya,

mo i mekem wan samting olsem ruf,

i putum antap long wol ya.

Hem i gat paoa

blong singaot solwota i go antap,

i kam klaod,

mo blong mekem i kam ren,

i foldaon bakegen long wol ya.

!Nem blong hem, Hae God!”

7Mo profet i talemaot we Hae God i talem se, “Ol man Isrel.* ?Yufala i ting se mi mi stap tinghevi long yufala nomo? !Nogat! Ol man Itiopia, mi mi stap tinghevi long olgeta tu, olsem we mi stap tinghevi long yufala. I tru, bifo, taem we yufala i stap long kantri ya Ijip, mi mi tekem yufala i kam long ples ya. !Be yufala i luk! Ol man Filistia ya, fastaem oli stap long ples ya Krit, be mi nao mi tekem olgeta i kam stap long ples blong olgeta, we oli stap long hem naoia. Mo ol man Siria ya, fastaem oli stap long ples ya Kiri, be mi nao mi tekem olgeta i kam stap long ples blong olgeta, we oli stap long hem naoia.

8Ol man Isrel. Mi mi Hae God, mi Masta blong yufala, mo oltaem mi stap lukluk ol rabis fasin blong yufala. Bambae mi flatemgud yufala evriwan, we bambae i no moa gat wan long yufala i stap long wol ya. Be bambae mi no save kilim yufala evriwan we i laen* blong Jekob.*

9“Mi bambae mi talem wan tok, nao yufala we i stap long ol narafala kantri, bambae mi mekem long yufala, olsem we man i sevem sanbij long netwaea blong tekemaot ol ston long hem. Olsem we i no gat ston i save pastru long netwaea ya, long sem fasin, bambae i no gat wan long yufala we mi save mestem.

10Sam long yufala ol man blong mi, yufala i man nogud, mo yufala i stap talem se, ‘God bambae i no save letem wan samting nogud i kam spolem yumi ya.’ Be mi bambae mi kilim yufala evriwan i ded long taem blong faet.”

Hae God bambae i mekem kantri ya Isrel i kam gud bakegen

11 Wok 15.16-18 Nao Profet Amos i talemaot we Hae God i talem se, “I gat taem i stap kam we mi bambae mi mekem kantri ya blong yufala, we King Deved i stap rul long hem bifo, we i foldaon finis olsem haos we i kam nogud olgeta, hem i kam gud bakegen. Bambae mi mekem olsem we mi wokem ol wol blong haos ya oli kam niuwan bakegen olsem fastaem.

12Nao long taem ya, olgeta we bambae oli kamaot biaen long yufala, bambae oli winim kantri ya Edom, oli holem ol graon blong hem i blong olgeta, mo bambae oli winimbak ol narafala kantri ya tu, we fastaem yufala i holem olgeta long nem blong mi. Olgeta samting ya, mi bambae mi mekem i kamtru. Mi mi Hae God, mo hemia tok blong mi.”

13Nao profet i finisim tok blong hem, i talemaot we Hae God i talem se,

“I gat taem i stap kam

we bambae ol garen

oli stap gru kwiktaem nomo,

we ol kakae blong hem

bambae oli plante we plante,

ol man bambae oli no naf blong karem i kam.

Long taem ya,

ol rop ya grep*

bambae oli stap gru kwiktaem,

we ol frut blong hem

bambae oli plante we plante.

Bambae ol man oli no naf

blong wokem waen long hem.

Olbaot long ol hil,

long ol ples ya

we oli planem ol rop ya long hem,

wota blong ol grep ya

bambae i fulap we i fulap,

i mekem graon i sofsof,

nao i ron i kamdaon olsem bigfala reva.

14Long taem ya,

olgeta we bambae oli kamaot

biaen long yufala,

we oli stap olbaot

long ol narafala kantri,

mi bambae mi tekem olgeta

i kambak long ples ya,

we i stret ples blong yufala.

Nao bambae oli wokemgud

ol taon ya blong yufala

we oli folfoldaon,

mo bambae oli planem ol grep bakegen,

nao bambae oli stap dring waen

we oli wokem long ol frut blong hem.

Bambae oli wokem ol garen bakegen,

nao bambae oli stap kakae

ol kakae blong ol garen ya blong olgeta.

15Mi bambae mi putum olgeta

long kantri ya

we mi mi givim long yufala,

mo neva bambae mi letem ol man

oli tekemaot olgeta long kantri ya bakegen.

Mi mi Hae God,

mi God blong yufala,

mo hemia tok blong mi.”