Daniel 3 - Bislama Bible Revised 2012

King Nebukadnesa i wokem aedol, blong olgeta man oli mekem wosip long hem

1Nao King Nebukadnesa i wokem wan aedol long gol we longfala blong hem i kasem twanti seven meta, mo bigfala blong hem klosap i kasem tri meta. Hem i stanemap long levelples ya long Dura long distrik ya we bigfala taon ya Babilon i stap long hem.

2Nao hem i singaot olgeta haeman blong hem oli kam wanples blong mekem prea blong putumap aedol ya we hem i wokem. Nao ol praeminista blong ol kantri we hem i king blong olgeta wetem ol minista, mo ol fas sekretari blong olgeta, mo ol advaesa blong hem, mo ol man blong lukaot long mane, mo ol jaj, mo ol jif,* mo olgeta narafala haeman blong olgeta distrik, olgeta evriwan oli kam.

3Taem we olgeta ya oli kam stanap long fes blong aedol ya blong mekem prea,

4man blong talemaot tok blong king i singaot bigwan, i talem se, “Olgeta man blong olgeta kantri, mo blong olgeta kala, mo blong olgeta lanwis, yufala i harem tok blong mi.

5Bambae yufala i harem noes blong ol trampet,* mo ol bambu paep, mo ol gita mo ol narafala samting we i olsem gita, wetem ol narafala instramen. Mo taem yufala i harem noes blong ol instramen ya, bambae yumi mas bodaon blong mekem wosip long pija ya we oli wokem long gol we King Nebukadnesa i stanemap.

6Be man we i no bodaon blong mekem wosip long hem, wantaem nomo bambae mifala i sakem hem i go long bigfala faea ya we i laet we i laet.”

7Nao taem olgeta instramen ya oli krae, wantaem nomo olgeta man ya blong olgeta kantri, mo blong olgeta kala, mo blong olgeta lanwis oli bodaon, oli mekem wosip long aedol ya.

Olgeta oli ripotem trifala fren blong Daniel

8Long taem ya, sam waes man blong Babilonia oli gat janis blong tok agens long ol man Juda,*

9nao oli kam bodaon long fes blong King Nebukadnesa, oli talem se, “King. Yu yu hae we yu hae. Bambae yu yu stap longtaem.

10Yu yu putum wan strong tok, se taem ol instramen ya oli krae, mifala evriwan i mas bodaon blong mekem wosip long pija ya we yu wokem long gol.

11Mo yu talem se man we i no bodaon blong mekem wosip, bambae ol man blong wok blong yu oli sakem hem i go long bigfala faea we i laet we i laet.

12Be trifala man Juda ya, Sadrak, mo Mesak mo Abednego we yu yu putum trifala i stap lukaot long distrik ya blong yumi, trifala i no obei long tok ya blong yu nating. Trifala i no save mekem wosip long ol god blong yu, mo trifala i no bodaon long pija ya we yu yu stanemap.”

13Nao samting ya i mekem king i kros we i kros, mo i faerap i talem long ol man blong hem se, “Yufala i go tekem trifala ya i kam long mi.” Nao oli go tekem trifala i kam, oli putum trifala i stanap long fes blong king.

14Nao hem i tok long trifala, i talem se, “!Trifala! ?I tru we yutrifala i no stap mekem wosip long ol god blong mi, mo yutrifala i no bodaon long pija ya we mi mi stanemap?

15Naoia, mi wantem se taem yutrifala i harem ol instramen ya oli krae, yutrifala i mas bodaon blong mekem wosip long pija ya. Sipos yutrifala i no wantem, wantaem nomo bambae oli sakem yutrifala i go long bigfala faea we i laet we i laet. ?Yutrifala i ting se i gat wan god we i save sevem yutrifala?”

16Be trifala i talem se, “King. Bambae mitrifala i no traem blong talemaot poen blong mitrifala long bisnes ya.

17Sipos i tru we bambae yu sakem mitrifala i go long bigfala faea ya, be God ya we mitrifala i wok blong hem, hem i save sevem mitrifala, mo i save tekemaot mitrifala long paoa blong yu.

18Be sipos hem i no sevem mitrifala, nating nomo. Be yu yu mas save se bambae mitrifala i no save mekem wosip long ol god blong yu, mo bambae mitrifala i no save bodaon long aedol ya we yu stanemap.”

Ol man oli sakem trifala man ya i go long bigfala faea

19Nao King Nebukadnesa i kros tumas long Sadrak, mo Mesak, mo Abednego, gogo ae blong hem i red we i red. Nao hem i talem long ol man blong hem blong oli sakem seven hip faeawud i go wantaem long hol ya blong faea, blong mekem faea ya i laet we i laet moa i go bitim mak olgeta.

20Nao hem i talem long ol soldia blong hem we oli strong moa blong oli fasem trifala ya, oli sakem trifala i go insaed long bigfala faea ya we i laet we i laet.

21Nao olgeta oli tekem rop, oli fasem trifala ya wetem olgeta klos blong trifala we trifala i stap werem, mo oli sakem trifala i go long bigfala faea ya.

22Be from we king i talem finis, se oli mas mekem faea ya i laet we i laet i go bitim mak, ol soldia ya we oli karem trifala man ya i go long hol blong faea ya, faea i bonem olgeta oli ded.

23Mo taem trifala i foldaon long medel blong bigfala faea ya, ol rop ya we oli fasem trifala long hem oli stap fasem trifala yet.

24Nao King Nebukadnesa i stap lukluk trifala, mo i sek bigwan, nao wantaem nomo i stanap, i singaot long ol haeman blong hem, i talem se, “!Ei olgeta! ?Mi mi ting se yumi fasem tri man nomo, yumi sakem trifala i go insaed long bigfala faea ya?”

Oli talem se, “Yes king. Yumi fasem tri man nomo ya.”

25Nao hem i talem se, “?Be olsem wanem mi luk fo man i stap wokbaot insaed long faea ya? I no gat rop i fasem olgeta, mo faea i no bonem olgeta nating. Mo namba fo man ya i olsem wan god nomo.”

King i tekemaot trifala man ya long faea i mekem trifala i gat hae nem

26Nao King Nebukadnesa i go klosap long hol ya blong faea, mo i singaot trifala i talem se, “!Sadrak! !Mesak! !Abednego! !Yutrifala i man blong wok blong God ya we i hae we i hae! !Yutrifala i kamaot!” Nao trifala i kamaot.

27Mo ol praeminista blong ol kantri we hem i king blong olgeta wetem ol minista, mo ol fas sekretari blong olgeta, mo ol advaesa blong hem, oli kam wanples, oli luk we faea ya i no bonem trifala ya nating. Faea i no bonem hea blong trifala, mo ol klos blong trifala i no bon, mo trifala i no smel nating long smok blong faea.

28Nao king i talem se, “!Yumi presem God blong Sadrak, mo Mesak mo Abednego! Hem i sanem enjel blong hem i kam, nao hem i sevem trifala ya we trifala i man blong wok blong hem, mo trifala i trastem hem. Trifala i no obei long tok blong mi, mo trifala i no save bodaon blong mekem wosip long ol narafala god, trifala i mekem wosip long God blong trifala nomo. Trifala i glad blong letem laef blong trifala blong trifala i ded from samting ya.

29Nao from samting ya, tok blong mi i olsem. ‘Sipos wan man i tok agens long God blong trifala ya, nating we hem i blong wanem kantri no wanem kala no wanem lanwis, be bambae mi pulumaot tufala han mo tufala leg blong hem blong kilim hem i ded. Mo mi bambae mi brebrekemdaon haos blong hem we mi spolemgud. I no gat wan narafala god nating we i save sevem man olsem we God ya i sevem trifala man ya.’ ”

30Nao king i leftemap Sadrak, mo Mesak mo Abednego trifala i kam hae moa long wok blong gavman long distrik ya we Babilon i stap long hem.