Sam 34 - Bislama Bible Revised 2012

Sing blong presem Hae God from gudfala fasin blong hem(Sing ya, Deved i wokem, biaen long taem ya we i giaman long fes blong King Abimelek, i mekem olsem we hed blong hem i krangke, nao king ya i ronemaot hem.)(Tok i go long ol man.)

1Oltaem mi bambae mi talem tangkiu long Hae God,

bambae mi presem hem oltaem nomo.

2Bambae mi presem hem

from ol samting we hem i mekem.

I gud olgeta we ol man oli stap spolem olgeta

oli lesin long tok ya,

nao bambae oli glad.

3Yufala i kam joen wetem mi,

yumi talemaot we Hae God i hae we i hae,

yumi leftemap hae nem blong hem.

4Mi mi prea long hem,

nao hem i ansa long mi,

i tekemaot mi long ol man

we oli stap mekem mi mi fraet.

5Olgeta we ol man oli stap spolem olgeta

oli luk long hem, nao oli glad.

Neva bambae tingting blong olgeta i foldaon.

6Taem ol man oli stap spolem mi,

mi singaot i go long Hae God,

nao hem i harem mi,

i tekemaot mi long olgeta trabol blong mi.

7Oltaem enjel blong hem

i stap lukaot gud long olgeta

we oli ona long hem,

mo i stap tekemaot olgeta long trabol.

8 1 Pita 2.3 Hae God, hem i gud tumas.

Yufala i traem trastem hem.

Bambae yufala i faenemaot we hem i tru.

Olgeta we oli go long hem blong faenem sefples,

oli save harem gud.

9Yufala ol man blong Hae God,

yufala i ona long hem.

Olgeta we oli stap ona long hem

oli no save sot long wan samting.

10Maet ol pikinini blong laeon

oli save hanggri,

be olgeta we oli stap luk long Hae God

oli no save sot long wan gudfala samting.

11Yufala ol yang fren blong mi,

yufala i kam, yufala i lesin long mi.

Bambae mi tijim yufala

blong yufala i ona long Hae God.

12 1 Pita 3.10-12 ?Olsem wanem?

?Yufala i wantem harem gud long laef blong yufala?

?Yufala i wantem laef blong yufala i longfala

we yufala i hapi oltaem?

13Oraet,

yufala i no moa tok nogud,

yufala i no moa giaman.

14Yufala i no moa mekem ol rabis fasin,

yufala i mekem ol samting nomo we i gud.

Long olgeta tingting blong yufala,

yufala i mas wok had blong mekem pis.

15Hae God i stap lukluk long ol stret man,

i stap lesin blong harem krae blong olgeta.

16Be hem i stap agensem olgeta

we oli stap mekem ol rabis fasin,

nao taem olgeta ya oli lus long wol ya,

be bambae i no longtaem,

ol man oli no moa save tingbaot olgeta bakegen.

17Taem ol stret man oli krae i go long Hae God,

hem i harem olgeta,

i tekemaot olgeta long olgeta trabol blong olgeta.

18Hem i stap klosap long ol man

we tingting blong olgeta i kam nogud,

i stap sevem ol man

we tingting blong olgeta i foldaon olgeta.

19Man we i stret i save harem nogud

long plante trabol,

be Hae God i save tekemaot hem

long olgeta trabol ya.

20 Jon 19.36 Hae God i save lukaot gud long hem,

we bambae i no gat wan bun blong hem nating i brok.

21Olgeta ya

we oli no laekem ol stret man,

oli man nogud nomo.

Hae God bambae i panisim olgeta.

Rabis fasin blong olgeta

bambae i mekem olgeta oli ded.

22Be ol man blong Hae God,

hem bambae i sevem olgeta.

Olgeta we oli go blong haed long hem,

bambae hem i no save panisim olgeta.