Sam 129 - Bislama Bible Revised 2012

Man i prea blong Hae God i panisim ol enemi blong hem(Sing ya i blong ol man oli singsing long hem taem oli stap wokbaot blong go antap long Jerusalem* blong mekem lafet)(Tok i go long ol man.)

1Olgeta.

?Yumi ol laen blong Isrel ya,

ol enemi blong yumi

oli stap spolem yumi olsem wanem?

Yufala i traem talem stori blong hem,

i stat long taem we ol bubu blong yumi oli slef* long Ijip,

i kam kasem tede.

(Ol man oli givim ansa.)

2I stat long taem ya kam kasem tede,

ol enemi blong yumi oli stap ronem yumi

we oli stap spolemgud yumi,

be oli no save winim yumi.

3Oli wipim yumi plante taem long baksaed blong yumi,

we oli spolemgud yumi,

oli mekem baksaed blong yumi i kam olsem garen

we man i brebrekem graon blong hem.

4Be Hae God,

fasin blong hem i stret gud,

mo hem i mekem

yumi fri finis long fasin blong slef.

(Tok i go long Hae God.)

5Hae God.

Olgeta evriwan we oli agens long Saeon,*

plis yu faet long olgeta,

yu flatemgud olgeta,

yu ronem olgeta oli gobak.

6Yu letem olgeta i kam olsem gras

we i stap gru antap long haos,

we i wantem gru bigwan

be smoltaem nomo i drae bakegen.

7Gras olsem,

i no gat man i save pikimap olgeta,

no i putum olgeta wanples,

nao i karem i go.

8Mi mi wantem

we bambae i no gat man i pas klosap long olgeta,

i talem long olgeta se,

“Prea blong mifala

we Hae God bambae i blesem yufala.

Mifala i blesem yufala

long nem blong hem.”