Esikel Sotfala stori blong buk ya - Bislama Bible Revised 2012

Sotfala stori blong buk yaProfet Esikel, hem i wan long ol laen* blong Isrel* we king blong Babilonia i go holem olgeta fastaem long Jerusalem* long taem blong faet, nao i karem olgeta oli go stap wok slef* long Babilon. Mo hem i stap long Babilon gogo kasem taem we king ya wetem ol soldia blong hem oli go spolemgud Jerusalem long taem ya we i gat faef handred eiti sikis yia i stap yet blong kam kasem yia we Kraes* i bon long hem. Mo biaen long taem ya, hem i stap yet long Babilon. Ol toktok blong hem, samtaem hem i luk long vison, mo samtaem Hae God i toktok nomo long hem, mo evritaem, tok ya i stap go long ol laen blong Isrel we oli stap wok slef wetem hem long Babilonia, mo i go tu long ol laen blong Isrel we oli stap yet long Jerusalem.Buk ya i gat faef bighaf blong hem.1. Hae God i singaot Esikel blong i kam profet.2. Profet Esikel i tok blong wekemap ol man Juda.* Hem i talemaot se Hae God bambae i jajem ol man Jerusalem wetem ol narafala man Juda, mo i talem se ol enemi bambae oli kam spolemgud Jerusalem we bambae oli flatemgud taon ya.3. Profet i talemaot se Hae God bambae i jajem ol man blong ol narafala kantri raonabaot long Isrel we oli stap mekem i strong tumas long ol laen blong Isrel, mo oli stap lidim olgeta oli go rong.4. Profet i talem se biaen long taem ya we ol enemi oli spolem Jerusalem, Hae God bambae i leftemap tingting blong olgeta bakegen. Hem i promes se Hae God bambae i mekem laef blong olgeta i gud bakegen, mo bambae long fiuja, taem King Gogo i kam faet agens long olgeta, be Hae God bambae i winim hem.5. Mo profet i luk wan vison we long vison ya, hem i luk we bambae ol laen blong Isrel oli stap gud long kantri blong olgeta bakegen, mo we bambae oli wokem niufala haos* blong Hae God wetem ol samting blong hem.Profet ya i wan man we bilif blong hem i strong we i strong, mo hem i stap tingbaot plante samting. Hae God i soemaot plante samting long hem long ol vison, nao hem i talemaot mining blong ol samting ya we hem i luk. Mo plante taem hem i mekem ol akson blong soemaot ol samting we bambae i kasem ol man ples blong hem, nao hem i jes talemaot mining blong ol akson ya. Hem i stap talemaot se laef blong man i mas kam niuwan olgeta, we tingting blong hem i kam niuwan olgeta. Mo hem i soemaot we man we i mekem sin, be hem nomo bambae i mas kasem panis from. Mo hem i stap talemaot we tingting blong hem i stap strong se laef blong ol laen blong Isrel bambae i kam niuwan, nao kantri blong olgeta i save stanap bakegen. Mo from we hem i wan pris,* hem i intres tumas long haos blong Hae God, mo long rod we man i save kam klin long fes blong hem.Ol haf blong buk yaHae God i putumap Esikel i kam profet 1.1—3.27

Hae God i talemaot se bambae i jajem ol man Jerusalemwetem ol narafala man Juda 4.1—24.27

Hae God i talemaot se bambae i jajem ol kantriraonabaot long Isrel 25.1—32.32

Hae God bambae i leftemap ol laen blong Isrel bakegenmo bambae i winim ol enemi blong olgeta 33.1—39.29

Niufala haos blong Hae Godwe Profet Esikel i luk long vison 40.1—48.35