Dutronome 12 - Bislama Bible Revised 2012

Long niufala kantri ya, olgeta bambae oli mas gat wan ples nomo blong mekem wosip

1Nao Moses i talem se, “!Olgeta! !Yufala i lesin! Hae God i God blong ol bubu blong yumi, mo taem yufala i go stap long kantri ya we hem bambae i givim long yufala, i gat sam samting we oltaem yufala i mas mekem. Ol samting ya i olsem.

2Long olgeta ples long kantri ya, yufala i mas spolem olgeta ples blong mekem wosip long ol narafala god. Sipos ol man blong ples ya oli gat ol tabu ples blong mekem wosip blong olgeta antap long ol hil, no olbaot long ol smosmol hil, no aninit long ol bigbigfala tri, be bambae yufala i mas spolemgud olgeta evriwan.

3Dut 7.5Yufala i mas brekemdaon ol olta blong olgeta, mo ol longlongfala ston blong olgeta we oli stanemap blong mekem wosip long olgeta, yufala i mas brebrekem long ol smosmol pis. Bambae yufala i mas bonem ol pija blong woman god ya Asera* we i god blong olgeta, mo yufala i mas katemdaon ol aedol blong olgeta, blong i no moa gat man i save mekem wosip long ol god ya bakegen long ol ples ya samtaem.

4“Hae God i God blong yumi, mo taem yufala i stap mekem wosip long hem, bambae yufala i no mas folem fasin blong ol man blong ples ya, we oli gat plante ples blong mekem wosip long ol god blong olgeta.

5Hae God bambae i jusumaot wan ples nomo long kantri ya we bambae yufala i stap long hem, nao nem blong hem bambae i stap oltaem long ples ya, mo oltaem, yufala evriwan i mas go mekem wosip long hem long ples ya nomo.

6Bambae yufala i mas mekem olgeta sakrefaes blong yufala long ples ya, we hemia ol sakrefaes ya we i blong bonem i bon evriwan, wetem ol narafala sakrefaes tu blong yufala. Mo yufala i mas tekem ol presen i kam long ples ya blong givim long hem, we hemia ol taet* blong yufala, wetem ol presen we oli no blong bonem blong mekem sakrefaes, mo ol presen we yufala i promes finis long Hae God blong givim i go long hem, mo ol presen we yufala i givim long gladhat blong yufala nomo, mo ol fasbon pikinini blong ol anamol blong yufala.

7Hae God i God blong yumi, mo oltaem hem i stap blesem yumi, nao long ples ya we hem bambae i stap long hem, bambae yufala i save kam long fes blong hem, yufala i save kakae ol gudgudfala samting ya we yufala i hadwok from, mo yufala i save harem gud long olgeta.

8-9“Naoia, yufala i no go yet long kantri ya we Hae God i talem finis se i blong yufala, we bambae yufala i save stap gud long hem, mo from samting ya, i stat bifo i kam kasem naoia, yumi stap mekem wosip long hem olsem we yumi luk se i gud. Be taem yufala i go stap long kantri ya, bambae yufala i no moa save mekem olsem.

10Long taem ya we bambae yufala i gokros long Jodan Reva, Hae God bambae i mekem we yufala i holem kantri ya, nao bambae yufala i save stap olwe long ples ya. Hem bambae i blokem olgeta enemi blong yufala, nao bambae yufala i save stap gud, we yufala i gat pis.

11Nao hem bambae i jusumaot wan ples nomo, we bambae yufala i save kam long hem oltaem blong mekem wosip long hem. Mo sipos yufala i kam long ples ya blong mekem wosip long hem, bambae yufala i mas karem olgeta samting ya i kam we mi mi talem finis long yufala. Hemia ol anamol blong yufala we i blong mekem sakrefaes ya we i blong bonem i bon evriwan, wetem ol narafala sakrefaes tu blong yufala, mo ol taet blong yufala, mo ol presen blong yufala, mo ol spesel presen we yufala i promes finis blong givim i go long hem.

12Nao long ples ya we Hae God bambae i stap long hem, yufala wetem ol pikinini blong yufala, mo ol man blong wok blong yufala, mo ol Livaet* we oli stap wetem yufala long ol taon blong olgeta, bambae yufala evriwan i harem gud, yufala i glad. Oltaem yufala i mas tingbaot ol Livaet, from we bambae oli no gat graon blong olgeta.

13-14Hae God bambae i jusumaot wan ples blong bonem sakrefaes long distrik blong wan long ol laen* blong yufala, mo sipos hem i jusumaot, bambae yufala i no mas bonem sakrefaes long ol ples we yufala nomo i jusumaot, yufala i mas kam bonem long ples ya nomo. Oltaem yufala i mas bonem ol sakrefaes blong yufala long ples ya nomo, mo yufala i mas mekem ol narafala samting ya tu we mi talem finis long yufala, long sem ples ya nomo.

15“Be sipos yufala i wantem kilim wan anamol blong kakae, yufala i save kilim long ples we yufala i stap long hem, hemia i oraet nomo. Bambae yufala i save kakae ol anamol blong yufala olsem we Hae God i givim long yufala, mo mit olsem i no olsem mit blong sakrefaes. Yufala evriwan i save kakae ol mit ya, nating we yufala i klin long fes blong Hae God, no yufala i no klin olsem. Bambae yufala i save kilim ol anamol ya, stret olsem we yufala i stap kilim ol wael anamol ya long bus, olsem dia,* mo antelop.*

16Jen 9.4; Lev 7.26,27; 17.10-14; 19.26; Dut 15.23Be bambae yufala i no mas yusum blad blong ol anamol ya blong kakae, yufala i mas kafsaedem i go long graon, olsem we yufala i kafsaedem wota.

17Olgeta samting ya we yufala i givim finis i go long Hae God, bambae yufala i no save karem haf blong hem i gobak long ol haos blong yufala blong kakae longwe. Hemia ol taet blong ol kakae mo waen mo olifoel* blong yufala, wetem ol fas pikinini blong ol anamol blong yufala, mo ol presen we yufala i promes finis blong givim i go long Hae God, mo ol presen we yufala i givim long gladhat blong yufala nomo, mo ol narafala presen bakegen. Olgeta samting ya, i tabu blong yufala i kakae haf blong hem long haos blong yufala.

18Yufala wetem ol pikinini blong yufala, mo ol man blong wok blong yufala, mo ol Livaet we oli stap wetem yufala, bambae yufala evriwan i mas kakae ol haf blong ol samting ya long ples ya nomo we Hae God i stap long hem, we hem i jusumaot blong yufala i stap kam long hem blong mekem wosip long hem. Mo taem yufala i stap long ples ya, bambae yufala i mas harem gud long olgeta samting we yufala i mekem.

19Mo taem yufala i stap long kantri ya, be oltaem nomo, bambae yufala i mas lukaot gud blong yufala i no fogetem ol Livaet.

20“Hae God i God blong yumi, mo long taem ya we hem bambae i mekem ples blong yufala i kam bigwan moa olsem we hem i promes* finis, bambae yufala i save kakae mit olsem we yufala i wantem.

21Nao samtaem, sipos ples ya blong mekem wosip we Hae God i stap oltaem long hem i longwe tumas long yufala, yufala i save kilim ol buluk mo sipsip we hem i givim long yufala long weples yufala i wantem, mo yufala i save kakae mit ya long ol haos blong yufala, olsem we mi talem finis long yufala.

22Mo nating we yufala i klin long fes blong Hae God, no yufala i no klin olsem, be yufala evriwan i save kakae mit ya, olsem we yufala i kakae mit blong ol anamol ya dia mo antelop.

23Lev 17.10-14Wan samting nomo, bambae yufala i no mas kakae mit we blad i stap long hem yet, from we laef blong anamol i stap long blad blong hem, mo from samting ya, i tabu blong yufala i kakae mit we i gat laef ya i stap long hem.

24Bambae yufala i no mas yusum blad blong anamol blong kakae, yufala i mas kafsaedem i go long graon, olsem wota nating.

25Mo sipos yufala i obei long tok ya, Hae God bambae i glad long yufala, mo evri samting long laef blong yufala, mo long laef blong ol pikinini blong yufala wetem olgeta we bambae oli kamaot biaen long yufala, bambae i ron gud.

26Be ol presen blong yufala, wetem ol samting ya we yufala i promes finis blong givim i go long Hae God, yufala i mas karem i kam long ples blong mekem wosip.

27Long ples ya nomo, bambae yufala i save bonem ol sakrefaes ya we i blong bonem i bon evriwan long Olta blong Hae God, wetem ol narafala sakrefaes ya tu we yufala i kakae mit blong anamol, be blad blong hem, yufala i kafsaedem i go long Olta.

28Yufala i mas lukaot gud blong obei long ol loa ya we mi mi stap talem long yufala. Hae God i God blong yumi, mo sipos yufala i stap mekem ol samting we i stret, we hem i glad long hem, evri samting long laef blong yufala, mo long laef blong ol pikinini blong yufala, mo long laef blong olgeta we bambae oli kamaot biaen long yufala, bambae i ron gud.”

Hae God i blokem olgeta se oli no mas bodaon long ol aedol

29Mo Moses i talem se, “Hae God i God blong yumi, mo taem yufala i stap go insaed long kantri blong ol man ya, hem bambae i stap spolem olgeta we oli stap long kantri ya, nao bambae yufala i holem kantri ya i blong yufala, mo bambae yufala i save stap long hem.

30Nao taem Hae God i spolem ol man ya finis, be bambae yufala i mas lukaot gud, blong yufala i no folem fasin blong olgeta blong mekem wosip. Sipos yufala i mekem olsem, bambae yufala i ded from. Bambae yufala i no mas traem asaskem olbaot blong faenemaot ol fasin blong olgeta blong mekem wosip, blong yufala i save folem ol fasin ya blong mekem wosip long Hae God long hem.

31Hae God i God blong yumi, mo sipos yufala i mekem wosip long hem, be bambae yufala i no mas folem ol fasin ya blong olgeta. From we taem oli stap mekem wosip long ol god blong olgeta, oli stap mekem ol fasin we i nogud we i nogud, we Hae God i no laekem nating, i agens long hem. Nating we ol pikinini blong olgeta nomo, be oli save bonem olgeta long olta blong mekem sakrefaes long ol god blong olgeta.

32 Dut 4.2; Rev 22.18,19 “Bambae yufala i mas mekem evri samting ya we mi mi talem finis long yufala, mo yufala i no mas joenem ol tok ya long sam narafala tok bakegen, mo yufala i no mas tekemaot samfala tok long hem.