Jeremaea 5 - Bislama Bible Revised 2012

Ol samting nogud we ol man Jerusalem oli stap mekem

1Nao bakegen, Profet Jeremaea i talemaot we Hae God i talem se,

“Ol man Jerusalem.*

Yufala i traem go olbaot

long ol rod blong taon ya,

mo long ol ples

we ol man oli stap hivap long hem.

Yufala i traem lukluk olbaot.

?I gat man long ol ples ya

we i stap mekem ol samting we i stret?

?No i gat man

we oltaem i stap talem ol trutok?

Sipos yufala i faenem wan man olsem,

mi bambae mi save fogivim yufala from,

mi tekemaot sin blong yufala.

2Nating we ol man ya oli stap mekem

strong tok long nem blong mi se,

‘Hae God i laef, i stap we i stap.

!Tok ya i tru!,’

be oli stap giaman nomo.”

3Nao profet i talem se,

“Hae God.

Yu yu wantem man

we oltaem, hem i stap talem ol trutok.

Be ol man ya,

taem yu givim panis long olgeta,

oli no harem nating.

Yu flatemgud olgeta blong tijim olgeta,

be oli no wantem lan nating.

Oli mekem stronghed tumas,

nao oli no wantem nating

blong tanem tingting blong olgeta,

blong lego sin blong olgeta.

4“Nao mi stap tingting se,

‘Olgeta ya ol puaman nomo ya,

oli no gat save.

Oli no save ol samting we Hae God i wantem,

mo oli no save ol loa blong hem tu.

5Bambae mi go luk olgeta ya

we oli rijman, oli gat paoa,

nao mi toktok wetem olgeta.

Mi savegud se olgeta ya oli savegud

ol samting we Hae God i wantem,

mo oli save ol loa blong hem.’

Be olgeta evriwan oli sem mak nomo,

oli tanem baksaed finis long Hae God,

mo oli no wantem obei long hem.

6Nao from samting ya,

ol laeon bambae oli aot long bus,

oli kam kilim olgeta,

mo ol wael dog bambae oli aot long draeples,

oli kam terem olgeta long smosmol pis,

mo ol leped* bambae oli stap go olbaot long ol taon blong olgeta.

Nao sipos ol man ya oli stap wokbaot olbaot,

bambae ol leped ya

oli terem olgeta long ol smosmol pis.

Bambae oli kasem ol trabol ya,

from we ol sin blong olgeta i plante tumas,

mo from we plante taem oli gowe long Hae God.”

7Nao profet i talemaot long olgeta we Hae God i talem se,

“?From wanem mi mi mas fogivim yufala?

Yufala i tanem baksaed finis long mi,

mo yufala i stap mekem wosip long ol narafala god,

we ol god ya oli no tru nating.

Mi mi stap fidimgud yufala,

be oltaem yufala i stap mekem

ol fasin nogud wetem woman,

mo yufala i stap go

long haos blong woman blong rod.*

8Yufala i olsem man hos

we man i fidimgud hem,

nao i wantem tumas ol woman hos,

nao i stap go olbaot.

Yufala i stap go olbaot

blong stilim ol woman blong ol fren blong yufala.

9Bambae mi mas panisim yufala,

from ol samting ya we yufala i stap mekem.

Mi mas givimbak ol rabis samting ya,

we yufala i mekem long mi.

10Mi bambae mi sanem ol enemi i kam,

blong spolem ol plantesen blong grep* blong yufala,

be bambae mi no letem

olgeta oli spolemgud olgeta.

Bambae mi talem long olgeta,

blong oli katemaot ol han blong ol grep ya nomo,

from we oli no blong mi.

11Mi mi talem olsem,

from we ol man Isrel* wetem yufala ol man Juda,*

yufala evriwan i lego mi we i lego mi olgeta.

Mi mi Hae God, mo hemia tok blong mi.”

Hae God i tanem baksaed long ol man blong hem

12Nao Profet Jeremaea i talem long Hae God se, “Ol man blong yu oli no bilif long tok blong yu, mo oli stap talem se, ‘Hae God i no save mekem wan samting long yumi. I no gat wan samting we bambae i save spolem yumi. Bambae yumi no save luk faet, mo bambae yumi no save sot long kakae samtaem.

13-14Ol profet oli stap toktok, be tok blong olgeta i blong nating nomo, mo ol tok we oli stap talemaot, i no kamaot long Hae God nating.’ ”

Mo hem i talem se, “Olgeta. Hae God i Masta* blong yumi, mo hem i gat olgeta paoa. Mo hem i talem long mi se, ‘Ol man ya oli stap toktok olsem, be mi bambae mi mekem tok blong mi we bambae yu yu talemaot, i laet olsem faea. Olgeta ya oli olsem ol wud nomo. Tok ya blong mi bambae i bonem olgeta, olsem we faea i kakae wud.

15“ ‘Ol laen* blong Isrel.* Mi bambae mi tekem ol man blong wan kantri we i longwe long yufala, blong oli kam mekem faet long yufala. Kantri ya i stanap longtaem finis, mo bambae i stap longtaem, mo lanwis blong hem, yufala i no save.

16Ol soldia blong hem we oli stap sut long bonara, oli strong man blong faet, mo oli save kilim man we oli no gat sore nating.

17Bambae oli spolem ol garen blong yufala mo ol kakae blong yufala tu. Bambae oli kilim ol boe mo ol gel blong yufala oli ded. Mo bambae oli kilim ol sipsip mo ol buluk blong yufala, mo oli spolem ol plantesen blong grep* mo ol figtri* blong yufala. Ol taon blong yufala, we yufala i trastem from we stonwol i goraon long olgeta, ol enemi ya blong yufala bambae oli flatem olgeta evriwan.

18“Mo hem i talem long mi se, ‘Be long taem ya, bambae mi no save spolem yufala evriwan.

19Nao taem ol man ya blong yu oli askem long yu se, “?From wanem Hae God i mekem ol samting ya long yumi?”, bambae yu yu talem long olgeta se, “From we yufala i gowe long hem, nao yufala i mekem wosip long ol narafala god long ples blong yumi. Nao from samting ya, bambae yumi go mekem wok blong ol narafala man, long kantri we i no blong yumi.” ’ ”

Hae God i wonem ol man blong hem

20Nao Profet Jeremaea i gohed, i talemaot we Hae God i talem se,

21Aes 6.9,10; Esik 12.2; Mak 8.18“Ol man Juda,* yufala ya i laen* blong Isrel.* Be yufala i no gat hed, mo yufala i no save tingting gud nating. Yufala evriwan i gat ae, be yufala i no save luksave, mo yufala i gat sora, be yufala i no save haremsave. Yufala evriwan i mas lesin gud.

22Job 38.8-11Mi mi Hae God. ?From wanem yufala i no save fraet long mi? ?From wanem yufala i no seksek long fes blong mi? Yufala i traem luk bigfala solwota ya. Mi mi putum sanbij i mak blong hem, mo solwota i no save bitim. Nating we solwota i girap, i kam bigwan, be neva bambae i save go ova long mak ya. Mo nating we i gat bigsi, be bambae i no save brekem mak ya.

23Yufala evriwan ya, yufala i stronghed tumas, mo yufala i stap girap agens long mi. Yufala i tanem baksaed long mi, mo yufala i lego mi finis.

24Oltaem, mi mi stap sanem ren i kam. Mi sanem i kam long taem blong planem garen, mo long taem we ol kakae i stap gru. Mi nomo mi stap givim stret taem blong mekem ol kakae oli raep, blong yufala i save tekemaot long stret taem blong hem. Mi mi stap mekem ol samting ya long yufala, be yufala i no tingbaot nating blong ona long mi.

25Ol sin blong yufala nomo i stap blokem ol gudgudfala samting ya, nao i mekem we yufala i no save kasem olgeta.

26“I gat ol man nogud oli stap miksap wetem yufala. Ol man ya, oltaem oli stap haed olsem man we i putum trap blong kasem wael faol, be trap ya blong olgeta i blong kasem man nomo.

27Oltaem, man blong lukaot pijin i fulumap plante pijin long basket blong hem, mo long sem fasin, ol man ya oli stilim plante samting, mo oli fulumap long ol haos blong olgeta, we oli fulap gud. Ol samting ya nao i mekem olgeta oli gat paoa, mo oli rij tumas.

28Oltaem, olgeta ya oli stap kakae gud, nao oli fatfat from. Fasin nogud we oli stap mekem i no gat en blong hem, oli stap gohed oltaem nomo. Oli no stap mekem i stret long ol pikinini we papa blong olgeta i ded, mo oli no stap givhan long ol man we ol narafala man oli stap spolem olgeta.

29“Bambae mi mas panisim olgeta, from ol samting nogud ya we oli stap mekem. Ol man olsem, mi mas givimbak ol samting ya we oli mekem long mi.

30Wan samting we i nogud we i nogud, i kamtru finis long kantri blong yufala, we i mekem ol man oli fraet we i fraet.

31Ol profet oli stap talemaot ol giaman toktok nomo, mo ol pris oli stap mekem ol samting ya we ol profet oli talem, mo yufala i glad tumas long fasin ya. ?Be sipos ol samting ya i finis, bambae yufala i mekem olsem wanem? Mi mi Hae God, mo hemia tok blong mi.”