Josua 18 - Bislama Bible Revised 2012

Josua i seraot ol graon we i stap yet

1Nao biaen long taem ya we Josua olgeta oli winim ol graon ya finis, olgeta oli kam wanples long Silo, mo long ples ya, oli putumap Haos Tapolen blong Hae God, we oli stap kam blong mit wetem hem long hem.

2I gat seven laen* blong olgeta oli stap we oli no kasem graon blong olgeta yet, blong oli stap long hem.

3Nao Josua i talem long olgeta se, “?Bambae yufala i stap wet gogo kasem wetaem? Hae God i God blong ol bubu blong yumi bifo, mo hem i makemaot ol graon ya finis se i blong yumi. ?Wetaem bambae yufala i go tekem i blong yufala?

4Yufala i mas jusumaot tritri man long ol seven laen ya blong yufala. Nao mi bambae mi sanemaot olgeta, blong oli go wokbaot blong lukluk ol graon ya. Bambae oli mas makemaot ol distrik blong hem, mo oli mas jusumaot ol distrik we oli wantem, blong ol laen blong yufala wanwan oli save holem i blong olgeta, nao oli mas kambak long mi.

5-6Olgeta ya bambae oli mas brekem ol graon ya long seven distrik. Mo oli mas raetemdaon ful stori blong ol mak blong ol distrik ya, mo oli mas tekem ol ripot ya i kam long mi. Hae God i God blong yumi, nao long fes blong hem, mi bambae mi sakem ol spesel ston* blong faenemaot wanem graon ol laen blong yufala bambae oli kasem. Be ol laen ya blong Juda* bambae oli save stap long distrik ya blong olgeta, long saot. Mo ol laen ya blong Josef bambae oli save stap long tufala distrik ya blong olgeta long not.

7Mo ol laen blong Livae* bambae oli no save kasem graon olsem we yufala bambae i kasem. Olgeta ya oli stap mekem wok blong ol pris* blong Hae God, mo wok ya blong olgeta i olsem graon blong olgeta. Mo ol laen blong Gad,* mo ol laen blong Ruben,* mo nara haf blong ol laen blong Manase* oli gat graon blong olgeta finis long narasaed Jodan Reva long is. Hemia graon ya we Moses man blong wok blong Hae God i bin givim long olgeta bifo.”

8Nao ol man ya oli aot, oli go makemaot olgeta graon ya stret olsem we Josua i talem long olgeta.

9Olgeta oli go wokbaot long evri ples long haf blong kantri ya we i stap yet. Oli raetemdaon ol tok blong fasin blong brekem long seven distrik, mo oli makem tu ol taon we oli stap insaed long ol distrik ya wanwan. Nao taem oli makem finis, oli kambak bakegen long Josua, long ples ya we olgeta oli stap long hem.

10Nao long ples ya long fes blong Hae God, Josua i sakem ol spesel ston blong faenemaot wanem distrik bambae i go long wanem laen. Nao hem i seraot ol distrik ya i go long ol seven laen ya blong olgeta we oli no gat graon yet.

Graon we i go long ol laen blong Benjamin

11Nao taem Josua i seraot ol graon ya, faswan i go long ol laen* blong Benjamin.* Distrik blong olgeta i stap long medel blong distrik ya Juda* mo distrik ya Efrem,* we ol man blong hem oli laen blong Josef ya bifo.

12Mak blong distrik ya, long saed i go long not, i stat long Jodan Reva, mo i go antap long hil, long narasaed Jeriko long not, mo i tanem i go long wes, i go antap long ol ples blong hil, i go kasem draeples blong Betaven.

13Nao i go long saed blong hil, i pas klosap long taon ya Lus saed i kam. Taon ya, narafala nem blong hem Betel. Mo i godaon long Atarotada, i pas long saed blong bigfala hil ya long narasaed ples ya Betoron Daon, saed i kam.

14Mak blong distrik ya long wes, i stat long ples ya, i pasraon long bigfala hil ya, i ron i go long saot, go kasem taon ya Kiriatbal, we narafala nem blong hem Kiriatsearim, long mak blong distrik ya Juda. Hemia nao i mak blong distrik ya long wes.

15Mo mak blong hem long saot i stat long saed blong taon ya Kiriatsearim long wes, i go long springwota ya Neftoa.

16Mo i godaon long botom blong hil ya we yu save lukluk krik ya Hinom i go, narasaed i kam long bigfala levelples ya Refaem,* long medel blong ol hil. Nao i folem krik ya Hinom, i ron i go long saot, i pas narasaed taon ya Jebus saed i go, i go kasem springwota ya Enrogel.

17Mak i tanem i go long not, kasem springwota ya Ensemes, mo i go kasem Gelilot, long saed blong ples ya Adumim, we rod i gotru long ol hil. Mak blong hem i godaon kasem bigfala ston ya we nem blong hem “Ston blong Bohan.” Bohan ya, papa blong hem Ruben* ya bifo.

18Nao mak ya i pas narasaed i kam long bigfala hil ya we yu save lukluk i godaon long Jodan Reva, mo i godaon long Jodan Reva ya,

19i pasraon saed i kam, long hil ya long Betogla. Nao i go finis long Ded* Si long ples ya we Jodan Reva i gotru long hem. Hemia nao mak blong distrik ya long saot.

20Mo mak blong hem long is, Jodan Reva.

Hemia nao mak blong distrik ya we ol laen blong Benjamin oli holem i blong olgeta.

21Mo ol taon we i blong olgeta ya, nem blong olgeta, Jeriko, mo Betogla, mo Emekesis,

22mo Betaraba, mo Jemaraem, mo Betel,

23mo Avim, mo Paraha, mo Ofraha,

24mo Kefaramoni, mo Ofni mo Geba.

Hemia nao ol twelef taon we oli stap long saed ya, wetem ol vilej we oli stap raonabaot long olgeta.

25Mo i gat ol narafala taon blong olgeta bakegen, we nem blong olgeta, Gibeon, mo Rama, mo Beherot,

26mo Mispa, mo Kefira, mo Mojaha,

27mo Rekem, mo Jipehel, mo Taralaha,

28mo Sela, mo Hahelef, mo Jebus, we narafala nem blong hem Jerusalem,* mo Gibea mo Kiriatsearim.

Hemia nao ol fotin taon we oli stap long saed ya, wetem ol vilej we oli stap raonabaot long olgeta.

Hemia nao ol graon we ol laen blong Benjamin oli holem i blong olgeta.