Jajes 1 - Bislama Bible Revised 2012

Olgeta long laen blong Juda mo olgeta long laen blong Simeon oli holem King Adonibesek

1Buk ya i stori blong ol laen* blong Isrel,* biaen long taem we Josua i ded.

Be long taem ya we hem i no ded yet, olgeta laen ya blong Isrel oli prea long Hae God, oli talem se, “Hae God. ?Wanem laen bambae i go fastaem blong mekem faet long ol man Kenan* ya?”

2Nao Hae God i givim ansa long olgeta, se, “Olgeta long laen blong Juda* bambae oli go mekem faet fastaem, from we mi mi makemaot graon ya finis se bambae i blong olgeta.”

3Nao olgeta ya oli talem long olgeta long laen blong Simeon* se, “I gud yufala i kam wetem mifala fastaem, yumi go long graon ya we oli makemaot finis se bambae i blong mifala, bambae yumi mekem faet long ol man Kenan ya. Nao biaen, bambae mifala i go wetem yufala blong yumi go long graon ya we oli makemaot se i blong yufala, blong yumi mekem faet long olgeta blong ples ya.”

Nao tufala laen ya i joen wanples,

4mo oli go mekem faet long ol man Kenan, wetem ol man blong ol smosmol vilej olbaot long hil, nao Hae God i mekem we tufala laen ya i winim olgeta. Long taem ya oli mekem faet long ten taosen man long ples ya Besek, mo oli winim olgeta.

5Mo long ples ya, oli faenem wan king,* we nem blong hem King Adonibesek wetem ol man blong hem, nao oli mekem faet long olgeta.

6Hem i wantem ronwe, be oli ronem hem, oli holem hem, mo oli katemaot tu bigfala fingga blong han blong hem, mo tu bigfala fingga blong leg blong hem.

7Nao hem i talem se, “Bifo, mi mi holem seventi king, mi katemaot ol bigfala fingga blong han blong olgeta mo blong leg blong olgeta, nao oli stap pikimap ol haf kakae blong mi aninit long tebol blong mi blong oli kakae. Naoia God i givimbak fasin ya long mi we mi mi mekem long olgeta.”

Olgeta oli tekem hem, oli karem i go long Jerusalem,* mo hem i ded long ples ya.

Olgeta long laen blong Juda oli winim tufala taon ya Jerusalem mo Hebron

8Nao olgeta long laen* blong Juda* oli go mekem faet long ol man Jerusalem.* Olgeta oli winim taon ya, nao oli kilim ol man blong hem oli ded, mo oli bonem taon ya.

9Nao biaen, oli go long saot, oli go mekem faet long ol man Kenan* we oli stap olbaot long ples blong hil, mo long ol levelples daon long medel blong ol hil, mo long draeples long saed i go long saot.

10Mo olgeta oli go mekem faet long ol man Kenan long taon ya Hebron, we fastaem nem blong hem Kiriataba. Long ples ya, oli mekem faet long ol laen blong ol olfala ya bifo. Olgeta ya, i gat ol laen blong Sesae, wetem ol laen blong Ahiman, mo ol laen blong Talmae, mo oli winim olgeta.

Otniel i winim taon ya Debiri(Josua 15.13-19)

11Nao olgeta oli aot long ples ya bakegen, oli go blong mekem faet long ol man Kiriatsefa, we biaen oli putum nem blong taon ya se Debiri.

12Nao Keleb, we i lida blong olgeta, hem i talem se, “Sipos wan man i lidim yumi blong go mekem faet long taon ya, gogo yumi winim olgeta, bambae mi givim dota blong mi Aksaha long hem blong i mared long hem.”

13Nao Keleb i gat wan brata blong hem we i bon biaen long hem, nem blong hem Kenas, mo man ya i gat wan pikinini blong hem we nem blong hem Otniel. Mo Otniel i girap, i lidim olgeta oli go mekem faet long taon ya, gogo oli winim olgeta. Nao Keleb i givim dota ya blong hem long hem, mo tufala i mared.*

14Long dei ya we tufala i mared, long taem we olgeta oli stap gobak, Otniel i stap strong long Aksaha blong i go askem long Keleb blong i givim sam graon bakegen long tufala. Nao woman ya i jamdaon long dongki blong hem, mo papa blong hem i askem long hem se, “?Aksaha, olsem wanem? ?Yu wantem wan samting?”

15Mo hem i talem se, “Yes, papa. Graon we yu givim long mitufala i no gat wota long hem, i drae tumas. Mi wantem blong yu givim sam graon long mitufala bakegen we i gat springwota long hem.”

Nao papa blong hem i givim wan graon bakegen long tufala we i gat tu springwota long hem, wan antap mo narawan daon.

Ol laen blong Juda mo ol laen blong Benjamin, oli win long faet

16Nao olfala palika blong Moses, we nem blong hem Jetro, hem i kamaot biaen long Ken bifo. Mo ol laen* blong Jetro ya oli joen wetem ol laen blong Juda,* nao olgeta oli aot long taon ya we i ples blong pamtri,* oli go long draeples long narasaed taon ya Arad, saed i go long saot. Ples ya i haf blong distrik ya Juda, mo olgeta oli go stap long ples ya wetem ol laen blong Amalek we oli stap long ples ya.

17Nao ol laen blong Simeon* wetem ol laen blong Juda oli go mekem faet long ol man Kenan* we oli stap long taon ya Jefat, mo oli winim olgeta. Olgeta oli bonem taon ya we oli bonem i bon olgeta blong givim i go long Hae God, olsem wan sakrefaes we oli givim long hem. Olgeta oli spolemgud olgeta samting blong taon ya, mo biaen oli putum nem blong ples ya se Homa, we i min se “Oli spolemgud”.

18-19Hae God i stap givhan gud long ol laen ya blong Juda. Hem i mekem we olgeta oli winim ol graon ya antap long hil, nao oli holem i blong olgeta. Be trifala taon ya Gasa, mo Askelon mo Ekron, trifala i stap daon long levelples klosap long solwota, mo oli no save winim trifala, wetem ol graon we i stap raonabaot long trifala, from we ol man blong trifala taon ya oli gat plante kat blong faet, we oli wokem long aean. Nao from samting ya, ol laen blong Juda oli no naf blong ronemaot olgeta.

20Jos 15.13,14Nao ol laen blong Juda oli givim taon ya Hebron i go long Keleb, blong hem i holem i blong hem, olsem we Moses i bin talem bifo. Ples ya, fastaem i gat ol laen blong Sesae, wetem ol laen blong Ahiman, mo ol laen blong Talmae, oli stap long hem, be Keleb i ronemaot olgeta oli gowe long ples ya. Trifala laen ya oli kamaot biaen long Anak* ya bifo.

21Jos 15.63; 2 Saml 5.6; 1 Kron 11.4Be ol laen blong Benjamin* oli no ronemaot ol laen blong Jebus we oli stap long Jerusalem,* oli letem olgeta ya oli stap nomo long ples ya wetem olgeta, kam kasem tede.

Ol laen blong Efrem mo ol laen blong Manase, olgeta oli winim taon ya Betel

22-23Nao ol laen* blong Efrem,* mo ol laen blong Manase* oli go blong mekem faet long ol man blong taon ya Betel, we fastaem, nem blong hem Lus, mo long taem ya, Hae God i stap givhan gud long olgeta. Be fastaem, taem oli no mekem faet yet, oli sanem sam man blong oli go lukluksave taon ya.

24Nao taem olgeta ya oli stap go, oli luk wan man we i aot long taon ya i stap kam, mo oli talem long hem se, “Sipos yu save soemaot wan rod long mifala we bambae mifala i save pas long hem blong go insaed long taon ya, bambae mifala i mekem i gud long yu.”

25Nao man ya i soem wan rod long olgeta, mo biaen, olgeta blong tufala laen ya oli go kilim olgeta man blong taon ya oli ded. Man ya we i soemaot rod long olgeta, wetem ol famle blong hem, olgeta ya nomo oli no ded.

26Nao biaen, hem wetem ol famle blong hem oli go stap long graon blong ol laen blong Het. Nao hem i wokem wan taon long ples ya, mo i putum nem blong hem se Lus, mo nem ya i stap yet kam kasem tede.

Ol narafala man Kenan we ol laen blong Isrel oli no ronemaot olgeta

27 Jos 17.11-13 Nao long taem ya, ol laen* blong Manase* oli no ronemaot olgeta man Kenan* evriwan long graon blong olgeta. Ol man Kenan ya we oli stap long ol taon ya Betsean, mo Tahanak, mo Doro, mo Jibleam, mo Megido, mo ol smosmol vilej we oli stap raonabaot long ol ples ya, oli letem olgeta oli stap nomo long ol ples ya wetem olgeta.

28Nao taem ol laen blong Isrel* ya oli kam plante moa, oli stap fosem ol man Kenan ya blong oli wok slef* blong olgeta. Mo nating we oli stap kam plante olsem, be oli no ronemaot olgeta oli gowe.

29 Jos 16.10 Mo ol laen blong Efrem* oli no ronemaot ol man Kenan ya we oli stap long taon ya Gesa, oli letem olgeta oli stap nomo long ples ya wetem olgeta.

30Mo ol laen blong Sebulun,* oli no ronemaot ol man Kenan ya we oli stap long tufala taon ya Kitron mo Nahalal. Oli letem olgeta oli stap nomo long tufala ples ya wetem olgeta, be oli stap fosem olgeta blong oli wok slef blong olgeta.

31Mo ol laen blong Asere,* oli no ronemaot ol man Kenan ya we oli stap long ol taon ya Akoho, mo Saedon, mo Ahilab, mo Aksib, mo Helbaha, mo Afek, mo Rehob,

32oli letem olgeta oli stap nomo long ol ples ya wetem olgeta.

33Mo ol laen blong Naftali,* oli no ronemaot ol man Kenan ya we oli stap long tufala taon ya Betsemes mo Betanat, oli letem olgeta oli stap nomo long tufala ples ya wetem olgeta, be oli stap fosem olgeta blong oli wok slef blong olgeta.

34Be ol laen blong Dan,* ol man Kenan ya we oli laen blong Amoro* oli ronemaot olgeta, oli go stap antap long ol hil. Oli fosem olgeta ya blong oli go stap nomo long ples ya, mo oli no letem olgeta blong oli kamdaon bakegen long levelples.

35Mo ol laen blong Amoro ya we oli stap long tufala taon ya Aealon mo Sahalbim, mo long hil ya Heres, olgeta oli stap olwe long trifala ples ya. Be taem ol laen blong Efrem, mo ol laen blong Manase oli kam plante moa, oli mekem olgeta ya oli stap aninit long paoa blong olgeta, mo oli stap fosem olgeta blong oli wok slef blong olgeta.

36Long taem ya, mak blong graon blong ol man Edom long saot, hem i folem rod ya we i gotru long ol hil long ples ya Akrabim, i go bitim taon ya Sela i go.