Levitikas 11 - Bislama Bible Revised 2012

Ol anamol we man i save kakae(Dutronome 14.3-21)

1Nao Hae God i givim ol rul ya long Moses mo Hae Pris Eron

2blong tufala i go talemaot long ol laen* blong Isrel.* Hem i talem se, “Long olgeta anamol we i stap long graon, bambae yufala i save kakae olgeta ya nomo

3we leg blong olgeta daon i gat fok olsem leg blong buluk, mo we oli stap kakae kakae blong olgeta tu taem.

4-6Be ol anamol olsem kamel mo baja* mo rabet* we oli kakae kakae blong olgeta tu taem, be leg blong olgeta daon i no gat fok olsem leg blong buluk, olgeta ya i tabu blong yufala i kakae. Yufala i mas save we olgeta ya oli no klin long fes blong mi.

7Mo pig, nating we leg blong hem daon i gat fok olsem buluk, be yufala i no mas kakae, from we hem i no kakae kakae blong hem tu taem. Hem i tabu blong yufala i kakae, mo yufala i mas save we hem i no klin long fes blong mi.

8Ol anamol ya we oli tabu long yufala, bambae yufala i no mas kakae mit blong olgeta, mo sipos oli ded, yufala i no mas tajem olgeta tu. Yufala i mas save we olgeta ya oli no klin long fes blong mi.

9“Mo long olgeta laef samting we i stap long wota no long solwota, bambae yufala i save kakae ol fis ya nomo we oli gat fin blong olgeta mo skal blong olgeta.

10Be olgeta we oli no gat fin blong olgeta mo skal blong olgeta, olgeta ya i tabu blong yufala i kakae.

11Yufala i mas save we ol samting ya oli nogud we i nogud. Olgeta oli no klin long fes blong mi, mo sipos oli ded, yufala i no mas tajem olgeta.

12Olgeta laef samting we i stap long wota no long solwota we oli no gat fin blong olgeta mo skal blong olgeta, yufala i mas save we oli nogud we i nogud olgeta.

13-19“Mo i gat ol pijin mo ol narafala samting olsem flaengfokis we i tabu blong yufala i kakae, oli nogud we i nogud. Ol samting ya i gat igel,* mo ol naranarafala hoknaet, mo ol naranarafala hok, mo falkon,* mo ol naranarafala valja,* mo reven* mo ostrij* mo sigal,* mo stok,* mo ol naranarafala longfala nek, mo pelikan,* mo komoran,* mo hupo,* mo ol naranarafala samting olsem flaengfokis we oli kakae ol smosmol bebet.

20“Mo olgeta smosmol samting we oli gat wing mo we oli stap wokbaot long leg blong olgeta, yufala i mas save we oli nogud we i nogud olgeta,

21samfala nomo we oli save jamjam oli klin long fes blong mi.

22Long olgeta ya, yufala i save kakae ol naranarafala lokis mo grasopa.*

23Be ol narafala smosmol samting we oli gat wing, mo we oli stap wokbaot long leg blong olgeta, yufala i mas save we oli nogud we i nogud olgeta.

24-28“Mo ol anamol we leg blong olgeta daon i gat fok olsem leg blong buluk be oli no kakae kakae blong olgeta tu taem, no we oli stap kakae kakae blong olgeta tu taem, be leg blong olgeta daon i olsem leg blong dog, olgeta ya oli no klin long fes blong mi. Sipos man i tajem wan long olgeta we i ded, bambae hem tu i kam doti long fes blong mi, mo bambae i stap olsem go kasem long sapa. Man we i karem wan long olgeta we i ded bambae i mas wasem ol klos blong hem, mo bambae hem i stap doti long fes blong mi yet, go kasem long sapa.

29-30“Mo i gat ol naranarafala samting we oli stap long graon ya we olgeta tu oli no klin long fes blong mi. Ol samting ya, i gat ol rat, mo ol mol,* mo ol naranarafala lised.

31Man we i tajem wan long olgeta, nating we i laef no i ded, bambae i kam doti long fes blong mi, mo bambae i stap olsem go kasem long sapa.

32Mo sipos wan long olgeta i ded, nao i foldaon long wan samting, nating we oli wokem samting ya long wud, no long kaliko, no long skin blong anamol, no long bag, be samting ya bambae i kam doti long fes blong mi. Nating we yufala i stap yusum long wanem wok, be yufala i mas tekem, yufala i draonem long wota, mo bambae hem i stap doti olsem go kasem long sapa, nao biaen bambae i klin bakegen.

33No sipos wan long olgeta i ded, i foldaon, i go insaed long wan graonpot, be evri samting insaed long graonpot ya bambae i kam doti long fes blong mi, mo yufala i mas brebrekem graonpot ya tu.

34Kakae we i stret blong yufala i kakae, be sipos yufala i wasem long wota we i stap insaed long graonpot ya, bambae kakae ya i kam doti long fes blong mi. Mo sipos wota no waen no wanem we i blong dring i stap insaed long graonpot ya, be hem tu bambae i kam doti long fes blong mi.

35I nomata wanem samting, be sipos wan long olgeta ya i ded, i foldaon long hem, bambae i kam doti long fes blong mi. Sipos wan samting olsem i foldaon long wan stof no long wan bigfala graonpot we oli kukum bred* long hem, be yufala i mas brebrekem.

36Olgeta narafala samting we oli tajem wan long olgeta ya we i ded, bambae oli kam doti long fes blong mi, springwota mo wota blong tang we i stap kam niuwan oltaem, tufala nomo bambae i no kam doti olsem long fes blong mi.

37Sipos wan long ol samting ya i ded, mo i foldaon long ol sid blong wit* no bale* no wanem we i blong planem, be ol sid ya bambae i stap klin yet long fes blong mi.

38Be sipos yufala i draonem ol sid ya long wota, nao wan long ol samting ya i ded, i foldaon i kasem, ol sid ya bambae i kam doti long fes blong mi.

39“Mo sipos wan anamol we yufala i save kakae i ded hem wan, nao wan man i tajem, man ya bambae i kam doti long fes blong mi, mo bambae hem i stap olsem go kasem long sapa.

40No sipos wan man i kakae mit blong wan anamol olsem, bambae hem i mas wasem ol klos blong hem, mo hem bambae i stap doti long fes blong mi go kasem long sapa. No sipos wan man i karem anamol olsem, bambae hem i mas wasem ol klos blong hem, mo hem bambae i stap doti long fes blong mi go kasem long sapa.

41“Mo olgeta smosmol samting ya we oli stap wokbaot olbaot long graon oli nogud we i nogud olgeta, mo oli tabu blong yufala i kakae.

42Nating we oli stap wokbaot long bel blong olgeta, no oli gat fo leg blong olgeta, no oli gat plante leg blong olgeta, be olgeta evriwan oli nogud we i nogud olgeta.

43Bambae yufala i no mas kakae wan long ol samting ya. Sipos yufala i kakae, bambae yufala i kam doti long fes blong mi.

44Lev 19.2; 1 Pita 1.16Mi mi Hae God, mi God blong yufala, mo oltaem yufala i mas klin long fes blong mi, yufala i mas tabu, from we mi mi tabu, mi klin olgeta.

45Mi nao mi tekemaot yufala long Ijip, mi tekem yufala i kam long ples ya blong bambae mi nomo mi God blong yufala. Oltaem yufala i mas klin long fes blong mi, from we mi mi tabu, mi klin olgeta.

46“Hemia nao ol loa we i tokbaot ol anamol, mo ol pijin, mo ol narafala laef samting we i stap olbaot long solwota, mo long wota, mo long graon.

47Yufala i mas lukluk gud blong makem ol samting we oli klin long fes blong mi, mo ol samting we oli no klin long fes blong mi. Mo yufala i mas makemgud ol samting we yufala i save kakae, mo ol samting we i tabu blong yufala i kakae.”