1Nao Hae God i talem long mi se, “Man blong wol ya. Yu go tekem wan brikis, yu putum long graon, mo yu katem pija blong taon ya Jerusalem* long hem.
2Nao bambae yu mekem pija blong olgeta samting we ol enemi bambae oli mekem long taon ya. Bambae yu digim hol i goraon long pija blong taon ya, mo yu hivimap graon i goraon long hem, mo yu mekem pija blong ol haos tapolen blong ol enemi, mo yu mekem pija blong ol bigbigfala wud blong kilimdaon stonwol blong taon ya.
3Nao yu tekem wan trei we oli wokem long aean, yu stanemap olsem wol long medel blong yu mo pija blong taon ya, we taon ya i stap narasaed, mo yu narasaed. Nao yu lukluk i go long taon ya olsem we yu stap gad long hem. Be yu yu olsem ol enemi we oli raonem taon ya blong blokem ol man blong hem oli no save kamaot. Hemia bambae i wan saen long ol laen* blong Isrel.*
4-5“Nao yu ledaon long lef saed blong yu, mo bambae yu stap harem nogud from ol sin blong ol laen blong Isrel long not. Bambae yu stap harem nogud olsem gogo kasem tri handred naenti dei blong soemaot panis blong olgeta. Long tri handred naenti dei ya, wan dei i saen blong wan yia, wan dei i saen blong wan yia, we bambae oli stap harem nogud from panis ya we mi stap givim long olgeta.
6Taem yu finisim ol samting ya, bambae yu ledaon long raet saed blong yu, blong yu stap harem nogud from sin blong ol man Juda.* Bambae yu mekem olsem gogo kasem foti dei, we bambae wan dei i saen blong wan yia, wan dei i saen blong wan yia, we bambae oli stap harem nogud from panis ya we mi bambae mi givim long olgeta.
7“Nao yu lukluk strong long pija ya blong Jerusalem we ol enemi oli raonem, mo yu leftemap han blong yu, yu talemaot tok blong mi agens long ol man blong hem.
8Bambae mi fasem yu, nao yu no save tantanem yu, gogo yu finisim olgeta dei ya we yu stap soemaot we ol enemi bambae oli stap raonem taon ya.
9“Mo bambae yu tekem wit,* mo bale,* wetem tu kaen bin, mo tu narakaen wit we nem blong tufala milet mo spel, nao yu miksimap olgeta wanples blong mekem bred long hem. Hemia nao kakae we bambae yu stap kakae long tri handred naenti dei ya we bambae yu stap ledaon long lef saed blong yu.
10Bambae yu save kakae haf blong wan smol bred nomo long wan dei, mo hemia nomo bambae i holem yu gogo kasem nekis dei blong hem.
11Mo bambae yu gat smol wota nomo blong yu yu dring, we tu smol pankin nomo long wan dei.
12Nao evri dei long fes blong ol man, bambae yu tekem sitsit blong man, yu mekem i drae gud blong mekem faea long hem, nao yu kukum bred blong yu long hem, mo yu kakae.”
13Nao Hae God i talem long mi se, “Samting ya, hem i saen we bambae ol laen blong Isrel oli mas kakae ol mit we Loa i blokem se i tabu blong yufala i kakae. Hemia long taem ya we bambae mi ronemaot olgeta oli go stap long ol narafala kantri.”
14Be mi talem se, “Hae God, yu yu Masta* blong mi. Neva mi mekem mi mi doti long fes blong yu. I stat long taem we mi mi pikinini, i kam kasem tede, neva mi kakae mit blong anamol we hem i ded hem wan, no we ol narafala anamol oli kilim i ded. Neva mi kakae ol kakae we i doti long fes blong yu.”
15Nao Hae God i talem long mi se, “Oraet, bambae mi letem yu yu tekem sitsit blong buluk nomo, blong yu mekem faea long hem blong kukum bred blong yu long hem.”
16Nao hem i gohed i talem se, “Man blong wol ya. Bambae mi mekem we ol man Jerusalem oli no save aot long taon blong go lukaot kakae blong olgeta. Mo taem oli skelemgud kakae we bambae oli kakae, mo wota we bambae oli dring, bambae oli harem nogud, oli stap wari oltaem nomo, from we ol samting ya i smol tumas.
17Bambae ol kakae blong olgeta mo wota blong olgeta i finis, mo bambae tingting blong olgeta i foldaon olgeta, mo bambae oli stap bunbun from ol sin blong olgeta.”
Who We AreWhat We EelieveWhat We Do
2025 by iamachristian.org,Inc All rights reserved.
