Esikel 27 - Bislama Bible Revised 2012

Sing blong krae long taon ya Taea

1Nao long vison ya Hae God i talem long mi se,

2“Man blong wol ya. Yu krae long taon ya Taea, yu sing long wan singsing blong ded i go long hem.

3Taon ya i flas tumas from we hem i stap klosap long solwota, mo i stap mekem bisnes wetem olgeta man ya we oli stap long ol taon klosap long solwota. Mo ol samting we bambae mi talem, yu mas go talemaot long hem. Mi mi Hae God, mi Masta* blong olgeta man, mo yu go talem long hem we mi mi talem se,

“Taea.

Yu yu stap bigmaot tumas

from we yu naes we yu naes.

4Solwota i hom blong yu,

mo ol man we oli wokem yu

oli wokem yu olsem wan sip

we i naes we i naes.

5Oli wokem yu long ol paentri*

we i kam long hil ya Hemon,

mo oli wokem mas blong yu

long sida* we i kam long Lebanon.

6Ol parel blong yu,

oli wokem long ol gudgudfala oktri*

we i kam long Basan,

mo dek blong yu,

oli wokem long paentri we i kam long aelan ya Saepras,

mo oli flasem long tut blong elefen.

7Ol sel blong yu

oli wokem long ol gudgudfala kaliko ya linen*

we i kam long Ijip,

mo oli somap ol pija long kaliko ya

blong flasem.

Hem i olsem flaeg blong yu,

we taem yu stap kam longwe yet,

i isi nomo

blong ol man oli luksave yu.

Ol onen blong yu blong blokem san,

oli wokem long gudfala kaliko ya we i pepol

we i kam long aelan ya Saepras.

8Ol man ya blong yu blong pul,

oli kam long tufala taon ya Saedon mo Avad,

mo ol man ples blong yu oli boskru blong yu,

mo oli savegud wok blong olgeta.

9Ol kapenta we oli stap wok long yu

oli man Biblos we oli tren gud.

Mo oltaem ol boskru blong ol narafala sip

oli stap pem ol samting blong sip

long ol stoa blong yu.

10“Ol man we oli kam long ol kantri ya Pesia mo Lidia mo Libia oli kam soldia blong yu, nao oli mekem nem blong yu i go antap. Olgeta ya oli stap hangem ol sil* mo ol hat blong faet blong olgeta insaed long ol haos blong ol soldia blong yu.

11Mo ol soldia blong aelan ya Avad oli stap gad long ol stonwol blong yu, mo ol man blong taon ya Gamad oli stap gad long ol wajhaos blong yu. Ol man ya oli stap hangem ol sil blong olgeta long ol stonwol blong yu, mo oli mekem yu yu kam naes we yu naes olgeta.

12“Ol man Spen oli stap mekem bisnes wetem yu, from we yu gat plante gudgudfala samting blong salem long olgeta, mo oli stap pem ol kago ya long silva mo aean mo tin mo led.

13“Mo ol man Gris, mo ol man Tubal, mo ol man Mesek oli stap mekem bisnes wetem yu, nao yu stap salem ol kago blong yu long olgeta, mo oli stap pem ol samting ya long ol slef,* mo ol samting we oli wokem long bras.

14“Mo ol man Betogama oli stap mekem bisnes wetem yu, nao yu stap salem ol kago blong yu long olgeta, mo oli stap pem ol samting ya long ol hos blong wok, mo ol hos blong faet, mo ol hafkas* dongki.

15“Mo ol man Roj wetem ol man klosap long solwota oli stap mekem bisnes wetem yu, nao yu stap salem ol kago blong yu long olgeta, mo oli stap pem ol samting ya long tut blong elefen, mo wud ya eboni we i blak gud.

16“Mo ol man Edom oli stap mekem bisnes wetem yu from we yu yu gat plante samting blong salem long olgeta, mo oli stap pem ol samting ya long ol gudgudfala kaliko ya we i pepol, mo ol kaliko we oli somap ol pija long hem blong flasem, mo kaliko ya linen* we i beswan, mo ol flas ston ya, emeral,* mo rubi,* mo flas korel.*

17“Mo ol man Juda* wetem ol man Isrel,* yu stap salem kago blong yu long olgeta, mo oli stap pem ol samting ya long wit,* mo eg* blong sugabag,* mo olifoel,* mo ol samting we i blong wokem pomad mo senta long hem.

18-19“Mo ol man Damaskes oli stap mekem bisnes wetem yu from we yu gat plante gudgudfala samting blong salem wetem ol narafala samting we yu yu wokem. Oli stap pem ol samting ya long yu long waen we i kam long taon ya Helbon, mo wul we i kam long ples ya Saraha, mo aean blong wokem ol samting olsem sospen long hem, mo ol senta we i blong putum long oel blong mekem i smel gud.

20“Mo ol man Dedan oli stap mekem bisnes wetem yu, nao yu stap salem kago blong yu long olgeta, mo oli stap pem ol samting ya long ol kaliko blong putum aninit long sadel blong hos.

21“Mo ol man Arebia, mo ol jif blong Kedara oli stap mekem bisnes wetem yu, nao yu stap salem kago blong yu long olgeta, mo oli stap pem ol samting ya long ol man sipsip, mo ol smosmol sipsip, mo ol man nani.

22“Mo ol bisnesman blong kantri ya Seba wetem ol bisnesman blong taon ya Ramaha oli stap mekem bisnes wetem yu, nao yu stap salem kago blong yu long olgeta, mo oli stap pem ol samting ya long ol flas ston mo gol mo ol gudgudfala samting we i mekem kakae i tes gud.

23Ol taon ya, Haran mo Kanei mo Iden, mo ol bisnesman blong kantri ya Seba, mo tufala taon ya Asuru mo Kilmad, olgeta ya evriwan oli stap mekem bisnes wetem yu.

24Olgeta ya oli tekem ol gudgudfala klos we praes blong olgeta i antap, mo ol flas kaliko we kala blong olgeta i pepol, mo ol kaliko we oli somap ol pija long hem blong flasem. Mo oli tekem ol mat blong putum long floa, we kala blong olgeta i gud, mo we oli somap ol smosmol rop long saed blong olgeta we oli tantanemgud blong mekem i strong, nao oli salem ol samting ya long yu.

25Rev 18.11-19Mo ol bigbigfala sip oli stap karem ol kago ya blong yu i go long evri ples.

Taea.

Yu yu olsem wan sip

we i stap long solwota

we i fulap gud long ol kago.

26Ol man blong pul oli tekem yu

yu go afsaed long medel si,

nao iswin* i blu strong i kam

i mekem yu yu draon long dipsi afsaed.

27Taem yu yu draon

ol gudgudfala kago ya blong yu,

mo ol man blong wok blong yu,

mo ol boskru blong yu,

mo ol kapenta blong yu, mo ol bisnesman blong yu,

mo ol soldia we oli stap long sip,

olgeta ya evriwan oli lus long solwota.

28Taem ol man we oli stap long so

oli harem krae

blong ol man ya blong wok blong yu

we oli stap draon,

oli fraet, we oli seksek from.

29“Nao ol man blong wok

blong ol narafala sip,

olgeta evriwan oli lego ol sip ya,

oli goso.

30Olgeta ya evriwan oli stap harem nogud,

oli sore tumas long yu.

Oli sakem asis blong graon

long hed blong olgeta,

mo oli stap rol long asis faea.

31Oli katemaot hea blong olgeta

from we oli sore tumas long yu,

mo oli stap werem ol rabis klos.

Oli stap krae we oli harem nogud

we oli harem nogud tumas.

32Long taem ya we yu yu ded,

olgeta oli stap krae long yu,

oli stap sing long wan singsing blong ded,

oli stap talem se,

‘Neva i gat wan taon

we ol man oli spolemgud olsem yu.

Yu yu stap long medel si,

mo naoia i no moa gat noes long yu.

33Taem yu sanem

ol kago blong yu i go ovasi,

ol man long olgeta kantri

oli stap pem,

mo oli gat olgeta samting we oli wantem.

Oli no sot long wan samting nating.

Yu mekem olgeta king oli kam rijman

long ol gudgudfala kago ya blong yu.

34Yu yu brobrok finis long solwota,

yu draon finis long dipsi.

Ol kago blong yu,

mo ol man blong wok blong yu,

evriwan oli lus wetem yu

long solwota.’

35“Taem olgeta man we oli stap long ol ples klosap long solwota, oli harem nius blong bigfala trabol ya we i kasem yu, oli sek long hem, nao oli harem nogud tumas from. Mo ol king blong olgeta tu oli fraet we oli fraet tumas, we man i save luksave nomo long fes blong olgeta.

36Yu yu lus we yu lus olgeta. Ol bisnesman long olgeta ples long wol oli fraet tumas se bambae oli kasem sem trabol ya we yu yu kasem.”