1Nao Moses i talem se, “Olgeta. Sipos yufala i go blong mekem faet long ol enemi blong yufala long wan narafala kantri, mo yufala i luk we olgeta oli gat plante hos mo plante kat blong faet, mo ol soldia blong olgeta i plante moa, i winim blong yufala, be bambae yufala i no fraet long olgeta. Hae God i tekemaot yumi long Ijip. Hem i God blong yumi, mo hem bambae i stap wetem yufala.
2Be taem yufala i rere blong go faet, fastaem, hae pris* bambae i mas kam stanap long fored blong yufala blong givim gudfala toktok long ol soldia blong yufala.
3Bambae hem i talem se, ‘!Olgeta! !Yufala i lesin long tok blong mi! Naoia, yufala evriwan i rere blong go faet. I nogud yufala i fraet, no tingting blong yufala i foldaon, no yufala i lusum hed.
4Hae God i God blong yumi, mo hem bambae i go wetem yufala, i mekem we yufala i win.’
5“Nao ol komanda blong olgeta bambae oli mas kam talem long olgeta se, ‘!Olgeta! Sipos i gat wan long yufala we i wokem haos blong hem finis, be oli no prea long haos ya yet, blong hem i go stap long hem, i gud hem i gohom. I nogud hem i ded long faet ya, nao narafala man bambae i mekem prea long haos ya, mo i go stap long hem.
6Mo sipos i gat wan long yufala we i jes planem plantesen blong rop ya grep,* be i no tekemaot ol fas kakae blong hem yet, i gud hem i gohom. I nogud hem i ded long faet ya, nao narafala man bambae i harem gud long plantesen ya blong hem.
7Mo sipos i gat wan long yufala we oli blokem wan gel finis se i blong hem, be tufala i no mared yet, i gud hem i gohom. I nogud hem i ded long faet, nao narafala man bambae i tekem gel ya i mared long hem.’
8“Mo ol komanda ya bambae oli mas talem tu se, ‘Sipos i gat wan long yufala we tingting blong hem i no moa strong, nao hem i fraet, i gud hem i gohom. I nogud hem i mekem we ol narafala man tu bambae oli fraet.’
9Mo sipos oli talemaot ol toktok ya finis long olgeta, bambae oli mas jusumaot ol lida blong ol kampani blong olgeta wanwan.
10“Nao sipos yufala i go blong mekem faet long wan taon, fas samting, bambae yufala i mas givim janis long olgeta blong oli sarenda long yufala.
11Sipos oli glad, nao oli openem doa* blong bigfala stonwol blong taon ya, blong yufala i go insaed, bambae yufala i save mekem olgeta evriwan oli kam slef* blong yufala, mo bambae yufala i save fosem olgeta blong oli wok blong yufala.
12Be sipos oli no wantem sarenda, oli wantem faet, bambae ol soldia blong yufala oli mas raonem taon ya.
13Hae God i God blong yumi, mo sipos hem i letem yufala i holem taon ya, bambae yufala i save kilim olgeta man we oli stap long ples ya.
14Be bambae yufala i save tekem ol woman, mo ol pikinini oli blong yufala, wetem ol anamol mo ol narafala samting we oli stap long taon ya. Bambae yufala i save yusum olgeta samting we i blong ol enemi ya blong yufala, from we Hae God i givim ol samting ya finis long yufala.
15Hemia nao fasin we bambae yufala i mas mekem long ol man blong ol taon we oli stap longwe, afsaed long kantri ya we bambae yufala i go stap long hem.
16“Be long taem ya we bambae yufala i go blong holem ol taon long kantri ya we Hae God bambae i givim long yufala, bambae yufala i mas kilim olgeta man i ded, we bambae i no gat wan i stap laef.
17Olgeta ya, i gat ol laen* blong Het, mo ol laen blong Amoro,* mo ol laen blong Kenan,* mo ol laen blong Perij, mo ol laen blong Hivi,* mo ol laen blong Jebus. Yufala i mas kilim olgeta evriwan i ded, stret olsem we Hae God i talem long yufala. Yufala i mas mekem long olgeta olsem we yufala i mekem wan sakrefaes we i blong bonem i bon evriwan, blong givim i go long Hae God.
18Sipos no, bambae olgeta oli save pulum yufala, blong yufala i folem ol toktok blong olgeta, nao bambae yufala i mekem ol rabis fasin ya we oli stap folem blong mekem wosip long ol god blong olgeta. Nao long fasin ya, bambae yufala i mekem sin agens long Hae God.
19“Sipos yufala i stap raonem wan taon blong holem, nao yufala i stap katemdaon ol tri blong yusum olgeta blong brekemdaon bigfala stonwol blong taon ya, bambae yufala i no mas katemdaon ol tri we frut blong olgeta i gud blong kakae. Ol tri ya oli no enemi blong yufala, mo yufala i save kakae ol frut blong olgeta. Nating we yufala i stap longtaem, be bambae yufala i no mas katemdaon olgeta.
20Bambae yufala i save katem ol tri ya nomo we yufala i save se frut blong olgeta i nogud, mo yufala i save yusum wud blong olgeta, gogo yufala i holem taon ya.”
Who We AreWhat We EelieveWhat We Do
2025 by iamachristian.org,Inc All rights reserved.
