Sam 71 - Bislama Bible Revised 2012

Prea blong wan olfala man(Tok i go long Hae God.)

1Hae God.

Mi mi kam long yu

blong yu lukaot gud long mi.

Plis yu no letem

we ol enemi blong mi oli winim mi samtaem.

2Fasin blong yu i stret olgeta.

Plis yu halpem mi, yu sevem mi.

Yu lesin long mi,

yu tekemaot mi long trabol ya

we i kasem mi.

3Oltaem mi mi stap kam haed long yu,

mi stap luk long yu nomo

blong yu blokem mi.

Naoia,

plis yu kam ples blong haed blong mi bakegen,

yu kam wan strong ples blong blokem mi.

4Hae God, yu yu God blong mi,

mo yu yu Masta* blong mi.

Plis yu sevem mi,

yu tekemaot mi long paoa blong ol rabis man ya,

we fasin blong olgeta i nogud,

i strong we i strong.

5Mi mi putum tingting blong mi,

i stap long yu nomo.

I stat bifo,

taem mi mi yangfala yet,

mi stap trastem yu.

6Mi mi stap trastem yu oltaem long laef blong mi.

Yu yu stap lukaot gud long mi oltaem,

i stat long taem ya we mi mi bon,

i kam kasem tede,

mo oltaem bambae mi mi presem yu.

7Oltaem,

laef blong mi i wan eksampol long plante man,

from we yu yu kam wan strong ples blong blokem mi.

8Evri dei nomo,

i stat long eli moning kasem tudak,

mi mi stap presem yu,

mi stap leftemap hae nem blong yu.

9Naoia mi mi kam olfala.

Plis yu no tanem baksaed long mi.

Naoia mi mi no moa strong.

Plis yu no lego mi.

10Ol enemi blong mi oli stap toktok,

oli stap mekem plan agens long mi,

oli wantem kilim mi mi ded.

11Oli talem se,

“!Taem nao! !God i lego hem finis!

Yumi go ronem hem,

yumi holem hem.

!I no gat man blong sevem hem ya!”

12God,

plis yu no stap longwe long mi.

God blong mi,

yu kam kwik, yu givhan long mi.

13Olgeta ya we oli stap faet long mi,

mi wantem blong yu winim olgeta,

yu spolem olgeta.

Olgeta we oli stap traem blong spolem mi,

mi wantem blong yu mekem olgeta oli sem,

we ol man bambae oli stap tokbaot olgeta from.

14Oltaem bambae mi mi putum tingting blong mi

i stap long yu,

oltaem nomo bambae mi stap presem yu.

15Bambae mi stap tokbaot

ol stret fasin blong yu.

Oltaem bambae mi stap talemaot

paoa blong yu blong sevem man,

i stat long moning

gogo kasem long sapa.

Nating we ol fasin ya

oli strong tumas blong mi mi savegud,

be mi mi mas talemaot.

16Hae God, yu yu Masta blong mi.

Oltaem,

bambae mi stap tokbaot yu nomo.

Bambae mi stap presem yu

from paoa blong yu,

mo bambae mi stap talemaot

ol stret fasin ya blong yu.

17God,

i stat long taem we mi mi yangfala,

yu yu stap tijim mi,

mo mi stap tokbaot yet

ol bigbigfala wok ya blong yu.

18Naoia mi mi olfala,

hea blong mi i waet.

Mo sipos mi stap talemaot yu

long ol man we oli bon biaen long mi,

se yu yu strong, yu gat paoa,

plis yu stap wetem mi,

yu no lego mi.

19God, i no gat man we i olsem yu.

Yu yu bin mekem ol bigbigfala wok,

mo stret fasin blong yu i bigwan we i bigwan,

mifala i no save makem.

20Yu yu sanem trabol i kam long mi

mo yu mekem mi mi harem nogud,

be mi mi save

we bambae yu mekem mi mi strong bakegen,

bambae yu holem mi blong mi no go long beregraon.

21Bambae yu stap leftemap nem blong mi

i kam hae moa,

bambae yu toktok gud long mi,

yu mekem mi mi harem gud bakegen.

22God blong mi,

bambae mi mas presem yu wetem gita,

bambae mi presem yu,

from we tingting blong yu i stap strong long mi oltaem.

Yu yu God blong mifala ol laen* blong Isrel,*

mo yu tabu we yu tabu,

bambae mi plei long mandolin blong mi,

mi stap singim ol singsing blong presem yu.

23Bambae mi stap singsingaot

from we mi mi glad,

bambae mi stap singsing long olgeta tingting blong mi,

from we yu yu sevem mi.

24Oltaem bambae mi stap tokbaot

ol stret fasin blong yu,

i stat long moning

go kasem long sapa,

from we olgeta ya

we oli traem blong spolem mi,

yu yu winim olgeta finis,

yu mekem olgeta oli sem.