Sam 49 - Bislama Bible Revised 2012

Fasin ya we man i putum tingting blong hem long plante samting we hem i gat, hem i krangke(Sing ya, ol pikinini blong Kora oli wokem.)(Tok i go long ol man.)

1-2!Olgeta man blong evri ples!

!Yufala evriwan i lesin!

!Ol haeman mo ol olbaotman!

!Ol rijman mo ol puaman!

!Yufala evriwan long wol!

!Yufala i harem samting ya!

3Ol tok we bambae mi talem

i waes tumas.

Tok we bambae i kamaot long tingting blong mi

i hevi gud.

4Bambae mi tingting gud long ol waestok ya

we ol olfala oli stap talem,

mo taem mi plei long gita

bambae mi stap talemaot ol mining blong olgeta.

5-6Long taem blong trabol,

mi mi no save fraet.

Nating we ol enemi blong mi

oli trastem plante samting we oli gat,

mo oli stap tok flas tumas

from ol samting ya,

be sipos olgeta oli kamraon long mi

blong ronem mi,

bambae mi no save fraet long olgeta.

7-9I no gat man i save pemaot laef blong hem

blong bambae i no go long beregraon.

Man i no save pem laef blong hem long God

blong bambae i stap laef olwe,

from we praes blong laef blong man

i hae tumas.

Olgeta samting we man i save givim,

neva bambae i naf long samting ya.

10Yufala i save.

Nating we man i waes,

be hem i sem mak nomo

long man we i no gat hed,

mo man we i krangke,

olgeta evriwan oli mas ded.

Olgeta evriwan bambae oli livim

ol gudgudfala samting blong olgeta

long han blong ol narafala man.

11Beregraon bambae i hom blong olgeta olwe nomo.

Nating we fastaem oli gat graon blong olgeta,

be bambae oli stap long ples ya

gogo i no save finis.

12Hae nem blong man i no save sevem hem long ded,

bambae hem i mas ded olsem ol anamol.

13Yufala i traem makem ol man

we oli stap trastem olgeta nomo.

Naoia, olgeta oli stap harem gud

long plante samting ya blong olgeta.

?Be bambae oli kasem wanem samting?

14Bambae oli ded olsem sipsip nomo,

mo Ded bambae i man blong lukaot long olgeta.

Ol bodi blong olgeta

bambae oli roten kwiktaem nomo,

long Hom* blong ol Dedman,

we i longwe long ples blong olgeta.

Be ol stret man bambae oli win.

15God bambae i sevem mi,

hem bambae i tekemaot mi

long paoa blong ded,

i tekem mi mi go stap wetem hem.

16Sipos yufala i luk

we man i stap kam rijman,

we olting blong hem i stap kam plante we plante,

bambae yufala i no harem nogud.

17Taem hem i ded,

bambae hem i no save tekem ol gudgudfala samting ya

i go wetem hem.

Ol samting ya blong hem

bambae oli no save go wetem hem

long beregraon.

18Nating sipos man i stap harem gud

oltaem long laef blong hem,

mo ol man oli stap leftemap hem,

from we hem i stap win,

19be bambae hem i mas ded,

i go joen long ol bubu blong hem,

long ples ya we i tudak olwe nomo.

20Hae nem blong man i no save sevem hem long ded,

bambae hem i mas ded olsem ol anamol.