Sam 128 - Bislama Bible Revised 2012

Pei blong man we i obei long Hae God(Sing ya i blong ol man oli singsing long hem taem oli stap wokbaot blong go antap long Jerusalem* blong mekem lafet)(Tok i go long ol man.)

1Olgeta.

Ol man we oli stap ona long Hae God,

mo we oli stap folem ol tok we hem i putum,

bambae oli save harem gud.

2Sipos yu yu stap mekem olsem,

bambae wok blong yu i gat frut blong hem,

mo oltaem,

long olgeta laef blong yu,

bambae yu yu harem gud, yu glad.

3Long hom blong yu,

woman blong yu bambae i olsem rop ya grep*

we i gat plante frut blong hem,

mo ol pikinini blong yu

bambae oli stap raon long tebol blong yu

olsem ol yang olif tri raonabaot long stamba blong hem.

4Man we i stap obei long Hae God oltaem,

hemia nao fasin we Hae God bambae i folem

blong blesem hem.

5Hae God i stap long Saeon,*

mo prea blong mi,

we hem bambae i blesem yufala.

Mi wantem

we oltaem long laef blong yufala,

bambae yufala i save luk

we olgeta samting long Jerusalem

i stap gohed gud.

6Mi wantem

we bambae yufala i stap gogo,

yufala i luk ol pikinini blong ol pikinini blong yufala.

Prea blong mi,

we yumi ol laen* blong Isrel,*

bambae yumi gat gudfala laef.