Esra 8 - Bislama Bible Revised 2012

Ol man Juda we oli aot long Babilonia, oli kambak wetem pris ya Esra

1Nao long taem we King Ataksekses i stap rul, ol man we oli hed blong ol naranarafala laen we oli aot long Babilonia wetem pris* ya Esra, oli kambak long Jerusalem,* mo nem blong olgeta i olsem.

2-3I gat Gesom, we i hed blong ol laen blong Finehas, mo Daniel, we i hed blong ol laen blong Itamara, mo Hatus, we papa blong hem Sekania. Hem i hed blong ol laen blong Deved.

Mo i gat Sekaraea, we i hed blong ol laen blong Paros, mo olgeta we oli kam wetem hem, i gat wan handred fifti man. Olgeta ya, i gat nem blong ol bubu blong olgeta i stap long buk.

4Mo i gat Eliehoenae, we papa blong hem Serahia. Hem i hed blong ol laen blong Pahatmoab, mo olgeta we oli kam wetem hem, i gat tu handred man.

5Mo i gat Sekania, we papa blong hem Jahasiel. Hem i hed blong ol laen blong Satu, mo olgeta we oli kam wetem hem, i gat tri handred man.

6Mo i gat Ebed, we papa blong hem Jonatan. Hem i hed blong ol laen blong Adin, mo olgeta we oli kam wetem hem, i gat fifti man.

7Mo i gat Jesaea, we papa blong hem Atalia. Hem i hed blong ol laen blong Elam, mo olgeta we oli kam wetem hem, i gat seventi man.

8Mo i gat Sebadia, we papa blong hem Mikael. Hem i hed blong ol laen blong Sefatia, mo olgeta we oli kam wetem hem, i gat eiti man.

9Mo i gat Obadaea, we papa blong hem Jehiel. Hem i hed blong ol laen blong Joab, mo olgeta we oli kam wetem hem, i gat tu handred eitin man.

10Mo i gat Selomit, we papa blong hem Josifia. Hem i hed blong ol laen blong Bani, mo olgeta we oli kam wetem hem, i gat wan handred sikisti man.

11Mo i gat Sekaraea, we papa blong hem Bebae. Hem i hed blong ol laen blong Bebae, mo olgeta we oli kam wetem hem, i gat twanti eit man.

12Mo i gat Johanan, we papa blong hem Hakatan. Hem i hed blong ol laen blong Asgad, mo olgeta we oli kam wetem hem, i gat wan handred ten man.

13Mo i gat Elifelet mo Jehuel mo Semaea we trifala i hed blong ol laen blong Adonikam, mo olgeta we oli kam wetem trifala ya i gat sikisti man. Olgeta ya oli no kam wetem olgeta ya, oli jes kam biaen.

14Mo i gat Utae mo Sakuru, we tufala i hed blong ol laen blong Bigvae, mo olgeta we oli kam wetem tufala, i gat seventi man.

Pris ya Esra i singaot ol man blong oli wok long haos blong God

15Nao taem pris* ya Esra i kamtru long Jerusalem,* hem i talemaot stori blong hem, i talem se, “Taem mifala i stap longwe yet, mi mi singaot olgeta man ya we oli wantem kam wetem mi oli kam wanples long Ahava Reva we i ron i go long taon ya Ahava, mo mifala i stap long ples ya tri dei. Nao mi luk we i gat ol pris oli stap wetem mifala, be ol Livaet,* i no gat.

16Nao mi singaot naen lida oli kam luk mi. Olgeta ya, i gat Eliesa, mo Ariel, mo Semaea, mo Elnatan, mo Jarib, mo narafala Elnatan, mo Natan, mo Sekaraea, mo Mesulam. Mo mi singaot tufala tija ya, Joearib, mo Elnatan, blong tufala tu i kam luk mi. Mo olgeta evriwan oli kam.

17Ale, mi sanem olgeta oli go luk man ya Ido, we hem i hed blong ol man blong yumi we oli stap long Kasifia, blong oli askem long hem wetem ol fren blong hem we oli man blong wok long haos* blong God blong yumi, blong oli sanem sam long olgeta oli kam wetem mifala.

18Nao from we God blong yumi i stap givhan long mifala long gladhat blong hem, olgeta oli sanem Serebia wetem eitin man, we sam oli pikinini blong hem mo sam oli brata blong hem, blong oli kam wetem mifala. Serebia ya, hem i wan man we i gat hed, mo hem i wan laen blong Mali, we bubu blong hem Livae.

19Mo oli sanem Hasabia mo Jesaea wetem twanti man long famle blong tufala, blong olgeta ya tu oli kam wetem mifala. Olgeta ya oli laen blong Merari, we papa blong hem Livae.

20Mo bakegen, oli sanem tu handred twanti narafala man i kam. Olgeta ya, King Deved bifo wetem ol haeman blong hem oli bin makemaot ol bubu blong olgeta, blong oli wok wetem ol Livaet. Olgeta ya evriwan, nem blong ol bubu blong olgeta i stap long wan olfala lis.”

Pris ya Esra i lidim ol man ya blong oli livim kakae, oli prea

21Mo bakegen, pris* ya Esra i talem se, “Nao taem mifala i stap long ples ya, long saed blong reva ya Ahava, mi mi talem long olgeta man we oli kam wetem mi, se mifala evriwan i mas livim kakae blong kam long fes blong God we tingting blong mifala i stap daon. Mifala i askem long hem blong hem i lidim mifala long rod blong mifala, mo blong i lukaot gud long mifala, mo long ol pikinini blong mifala, mo long olting blong mifala.

22Mi mekem olsem, from we mi sem blong askem long king, blong i givim ol soldia blong hem we sam oli wokbaot, mo sam oli ron long hos, blong oli gad long mifala long rod. Mi mi sem from we mi talem long hem finis se, ‘God blong mifala i stap blesem olgeta man we oli stap trastem hem, be i stap panisim olgeta we oli stap tanem baksaed long hem.’

23Nao mifala i livim kakae, mifala i prea blong God i lukaot long mifala. Mo hem i ansa long prea blong mifala.”

Ol presen blong haos blong God

24Mo bakegen, pris* ya Esra i talem se, “Nao long ples ya, mi jusumaot twelef man long ol lida blong ol pris, mo mi jusumaot Serebia mo Hasabia wetem ten man we olgeta ya evriwan oli Livaet.*

25Nao mi skelem ol silva mo ol gol mo ol samting blong yusum long wosip, we king wetem ol advaesa blong hem, mo ol haeman blong hem, mo ol laen* blong Isrel* we oli stap longwe oli bin givim blong yusum long haos* blong God blong yumi. Nao mi givim ol samting ya i go long ol man ya, blong oli lukaot gud long olgeta long rod.

26-27Ol samting we mi givim long olgeta i olsem. I gat silva, we hevi blong hem i kasem twanti tu tan, mo wan handred samting we oli wokem long silva blong yusum long wosip, we hevi blong olgeta i kasem seventi kilo, mo gol, we hevi blong hem i kasem tri tan fo handred kilo, mo twanti besin we oli wokem long gol, we hevi blong olgeta i kasem eit kilo, mo tu besin we oli wokem long bras we i beswan, we praes blong tufala wanwan i sem mak long praes blong besin we oli wokem long gol.

28“Mo mi talem long olgeta se, ‘Olgeta. Hae God, hem i God blong ol bubu blong yumi bifo, mo yufala i tabu, yufala i man blong hem. Mo ol samting ya blong yusum long wosip, we oli wokem long silva mo long gol, we ol man oli givim long gladhat blong olgeta, ol samting ya tu oli tabu, oli blong hem.

29Yufala i mas lukaot gud long olgeta, gogo yufala i kasem haos blong hem long Jerusalem.* Mo long ples ya, long rum blong ol pris, long fes blong ol lida blong ol pris ya, wetem ol lida blong ol Livaet, wetem ol narafala lida blong yumi longwe, bambae yufala i mas skelem olgeta bakegen, nao yufala i mas givim i go long olgeta.’

30Nao olgeta oli tekem ol samting ya, oli lukaot long olgeta, mo oli karem olgeta i kam long haos ya blong God blong yumi long ples ya.”

Olgeta oli kambak long Jerusalem

31Mo bakegen, pris* ya Esra i talem se, “Nao long fas manis,* long namba twelef dei blong hem, mifala i aot long reva ya blong kam long Jerusalem.* Mo taem mifala i stap wokbaot, God blong yumi i stap wetem mifala, i stap lukaot gud long mifala, nao ol enemi blong mifala mo ol man we oli stap haed blong kilim man oli no kam mekem faet long mifala.

32Nao mifala i wokbaot gogo, mifala i kamtru long Jerusalem, mo mifala i spel tri dei.

33Nao long namba fo dei blong hem, mifala i go long haos* blong God, mifala i skelem ol silva, mo ol gol, mo ol narafala samting ya, nao mifala i putum olgeta samting ya long han blong pris ya Meremot, we papa blong hem Uria, mo tri narafala man blong haos ya. Trifala ya, i gat pris ya Eleasara, we papa blong hem Finehas, mo tu Livaet,* we nem blong tufala, Josabad, we papa blong hem Jesua, mo Noadia, we papa blong hem Binui.

34Mo olgeta samting ya evriwan we mifala i kaontem, mo mifala i skelem, olgeta oli raetemdaon nem blong olgeta wetem wet blong olgeta.

35“Nao mifala evriwan we i kambak, mifala i tekem ol anamol blong mifala i kam blong mekem sakrefaes long God blong yumi. Mifala i tekem twelef bul blong makem ol twelef laen* blong yumi, mo naenti sikis man sipsip, mo seventi seven smol man sipsip, mo twelef man nani blong mekem sakrefaes blong tekemaot ol sin blong mifala, nao mifala i bonem olgeta blong mekem sakrefaes long hem.

36Mo mifala i tekem leta ya we king i givim long mifala, mifala i go givim long resedenkomisina mo ol distrikejen* mo ol haeman blong king long provins ya Narasaed Yufretes Reva long Wes, mo ol bigman ya oli stap mekem i gud long yumi, mo long haos ya blong God.”