Jajes 13 - Bislama Bible Revised 2012

Hae God i talemaot we Samson bambae i bon

1Nao ol laen* blong Isrel* oli stap mekem i nogud bakegen long fes blong Hae God, mo hem i putum olgeta oli stap long han blong ol man Filistia foti yia.

2Nao long taem ya, i gat wan man, nem blong hem Manoa, we i blong taon ya Jora. Hem i wan laen blong Dan,* mo woman blong hem i no save karem pikinini.

3Nao enjel* blong Hae God i kamtru long woman ya, i talem long hem se, “Kam kasem naoia, yu no save karem pikinini, be i no longtaem, bambae yu yu gat bel, mo bambae yu bonem wan pikinini boe blong yu.

4Be yu yu mas lukaot gud blong bambae yu no dring waen mo ol narafala dring olsem, mo yu no mas kakae ol samting ya we Loa i blokem.

5 Bambae hem i tabu, i man blong God. Hem nao bambae i statem wok ya blong tekemaot yufala long han blong ol man Filistia, blong sevem yufala.”

6Nao woman ya i go talem long man blong hem se, “I gat wan man blong God i kamtru long mi, we fes blong hem i olsem enjel blong God stret, i mekem mi mi fraet tumas. Mi mi no askem long hem weples hem i aot long hem i kam, mo hem i no talem nem blong hem tu long mi.

7Be hem i talem long mi se bambae mi mi gat bel, mo bambae mi bonem wan pikinini we i boe. Mo hem i blokem mi tu, se bambae mi no dring waen mo ol narafala dring olsem, mo bambae mi no mas kakae ol samting ya we Loa i blokem, from we boe ya bambae i wan Nasiraet olwe long laef blong hem. Bambae hem i tabu, i man blong God.”

8Nao Manoa i prea, i talem se, “Hae God. Plis yu sanem man ya blong yu we yu sanem i kam fastaem, i kambak long mitufala bakegen. I gud hem i kam talemaot long mitufala ol samting ya we bambae mitufala i mas mekem long boe ya, taem hem i bon.”

9Nao God i mekem samting ya we Manoa i askem. Wan dei, taem woman blong Manoa i stap long garen, enjel ya i kamtru long hem bakegen. Long taem ya, man blong hem i no stap wetem hem,

10nao woman ya i resis kwik, i go luk man blong hem, i talem long hem se, “!Ei! !Man ya we i kamtru long mi las taem ya, hem i kamtru bakegen!”

11Nao Manoa i girap, i folem woman blong hem, tufala i go. Mo taem hem i luk man ya, hem i askem long hem se, “?Yu nao yu kam toktok wetem woman blong mi las taem ya?”

Mo hem i talem se, “Yes, mi ya nao.”

12Nao Manoa i askem long hem se, “?Sipos tok ya blong yu i kamtru, be boe ya bambae i mas mekem wanem samting? ?Laef blong hem bambae i mas olsem wanem?”

13Nao enjel ya i talem se, “Woman blong yu i mas folemgud ol samting ya we mi mi talem finis long hem.

14Bambae hem i no mas kakae wan frut blong grep* nating. Bambae hem i no mas dring waen mo ol narafala dring olsem, mo bambae i no mas kakae ol samting ya we Loa i blokem. Hem bambae i mas mekem olgeta samting ya we mi mi talem long hem.”

15-16Manoa i no save we man ya i enjel blong Hae God, nao i talem long hem se, “Plis, yu stap smol fastaem. Bambae mitufala i go kukum wan yang nani blong yu yu kakae.”

Be enjel ya i talem se, “Sipos mi mi stap, be bambae mi no save kakae kakae ya we yutufala i mekem. Be sipos yutufala i wantem mekem, bambae yutufala i bonem nomo blong mekem sakrefaes long Hae God.”

17Nao Manoa i talem se, “I gud yu talemaot nem blong yu long mitufala, blong taem ol samting ya we yu talem oli kamtru, bambae mitufala i save ona long yu.”

18Be hem i talem se, “?From wanem yutufala i wantem save nem blong mi? Save blong man i no naf blong kasem nem blong mi.”

19Nao Manoa i go tekem wan yang nani wetem wit* mo bale* we oli granem finis, mo i kam bonem antap long wan bigfala ston we i olsem olta, blong mekem sakrefaes long Hae God. Nao stret long fes blong man ya wetem woman blong hem, Hae God i mekem wan bigfala samting.

20-21Taem laet blong faea ya we i stap long olta i laet i go antap, tufala i luk we enjel ya blong Hae God i go antap long medel blong laet blong faea ya. Nao Manoa i jes save nao, we man ya i enjel blong Hae God. Nao hem wetem woman blong hem, tufala i bodaon we fes blong tufala i godaon i kasem graon. Mo biaen, tufala i no moa luk enjel ya bakegen.

22Nao Manoa i talem long woman blong hem se, “Tru, bambae yumitufala i ded from samting ya, from we yumitufala i luk God stret long ae blong yumitu.”

23Be woman blong hem i talem se, “Sipos Hae God i wantem kilim yumitufala, bambae hem i no save glad long sakrefaes ya we yumitufala i mekem long hem. Mo hem i no save soemaot ol samting ya long yumitufala, mo hem i no save talemaot ol samting ya tu.”

24Nao biaen, tufala i stap gogo, nao woman ya i bonem pikinini blong hem, mo tufala i putum nem blong hem se Samson. Nao pikinini ya i gruap, i stap kam bigwan, mo oltaem Hae God i stap blesem hem.

25Long taem ya, olgeta oli stap long wan ples long medel blong tufala taon ya Jora mo Estaol, we ol laen blong Dan oli stap long hem bifo, taem oli stap wokbaot blong go long not, mo oltaem Spirit blong Hae God i stap mekem hem i kam strong moa.