Aesea 32 - Bislama Bible Revised 2012

Wan king we fasin blong hem i stret

1Bakegen, Profet Aesea i talem long ol man blong hem se, “!Olgeta! I gat taem i stap kam, we wan king bambae i stap rul long fasin we i stret olgeta, mo we ol haeman blong hem bambae oli stap mekem i stret nomo.

2Olgeta ya evriwan bambae oli stap mekem i gud long ol man. Bambae oli olsem strong sefples we man i save go haed long hem blong ronwe long hariken, no gudfala ples we i drae, we man i save go haed long hem blong ronwe long big ren. Bambae oli olsem reva we i ron, i pastru long ples we i drae olgeta, no sed blong bigfala ston, we i stanap hem wan long ples we i no gat tri long hem.

3Oltaem ae blong olgeta bambae i open blong luk ol trabol blong ol man blong olgeta, mo sora blong olgeta bambae i open blong harem ol problem blong olgeta.

4Olgeta ya bambae oli no save sotmaen long ol man blong olgeta, bambae oli stap mekem tingting blong olgeta i longfala, mo long ol tok blong olgeta, bambae oli stap talemaot i klia ol tingting blong olgeta.

5Bambae ol man oli no moa save ona long man we i no gat hed, mo oli no moa save presem rabis man, se fasin blong hem i stret.

6Man we i no gat hed, oltaem hem i stap talem ol krangke tok, mo i stap tingbaot ol rabis fasin, se bambae i mekem. Ol samting we hem i stap mekem, mo ol tok we hem i stap talem, oltaem oli stap spolem nem blong Hae God. Neva hem i save givim kakae long man we i hanggri, mo neva hem i save givim wota long man we i tosta.

7Rabis man, tingting blong hem i rabis, mo oltaem, hem i stap mekem ol rabis fasin. Hem i stap mekem plan blong giaman long ol puaman blong i save spolem olgeta, mo nating we oli gat raet blong win long kot, be hem i stap blokem olgeta.

8Be gudfala man, fasin blong hem i stret, mo oltaem hem i stap stanap strong blong holem ol stret fasin.”

Hae God bambae i jajem Jerusalem, be biaen, bambae i mekem ples ya i gud bakegen

9Bakegen, Profet Aesea i talem long ol woman se, “Olgeta. Oltaem, yufala i ting se yufala i gat isi laef. Yufala i ting se yufala i no gat problem. !Yufala i mas lesin long tok ya we Hae God i talem! Hem i talem se,

10‘Naoia, yufala i stap harem gud, tingting blong yufala i strong, be nekis yia, long sem taem olsem, tingting blong yufala bambae i kam nogud, from we bambae i no moa gat grep* long ol plantesen blong yufala, blong yufala i wokem waen long hem.

11Kam kasem naoia, yufala i gat isi laef, yufala i no gat problem, be naoia, i taem blong yufala i fraet, we yufala i seksek from. Naoia, i gud yufala i tekemaot ol klos blong yufala, yufala i parpar long ol rabis klos nomo,

12mo yufala i stap kilim jes blong yufala blong soemaot we yufala i harem nogud, from we long taem ya we i stap kam, ol garen ya we oli gat fulap kakae, mo ol plantesen blong grep ya we oli gat fulap frut, bambae oli no moa stap.

13Long taem ya, ol ropnil mo ol rabis gras bambae oli stap gru long graon blong ol man blong mi. Yufala i mas krae from ol haos ya, we ol man insaed long olgeta, oltaem oli stap hapi, mo from bigfala taon ya, we ol man blong hem, oltaem oli stap harem gud tumas, from we olgeta evriwan bambae oli no moa stap.

14Long taem ya, haos blong king we i gudfala tumas, bambae i stap nating nomo, mo taon ya we i kaptel blong yumi, bambae i no gat man long hem. Ol haos blong ples ya bambae oli brobrok olgeta, mo ol wajhaos* blong ol soldia we oli stap gad long ples ya, bambae oli brobrok olbaot, mo bambae i no gat man samtaem we i save stanemap olgeta bakegen. Bambae ples ya i kam wan ples we ol dongki oli stap pleplei long hem, mo we ol sipsip oli stap kakae long hem.’ ”

15Mo profet i talem se, “Be biaen, Hae God bambae i givim Spirit blong hem long yumi, nao draeples bambae i kam gudfala ples blong wokem garen, mo ol ples blong wokem garen bambae oli kam gud moa, we bambae oli fulap gud long ol bigbigfala tri.

16Olbaot long kantri ya, long evri haf blong hem, ol man bambae oli folem ol stret fasin, mo bambae oli stap mekem i stret nomo long ol narafala man.

17Mo frut blong ol stret fasin ya, ol man bambae oli stap olwe long pis, we oli stap kwaet, oli stap gud, mo oli stap trastem Hae God.

18-19Long bus, ol ston blong aes* bambae oli folfoldaon olsem ren, oli flatemdaon ol tri, mo long taon, ol enemi bambae oli flatemdaon olgeta samting, be olgeta ya, bambae i no moa gat wan samting blong spolem tingting blong olgeta. Bambae olgeta oli no moa wari, oli save stap gud long ol haos blong olgeta, we i no gat samting i save spolem olgeta, laef blong olgeta bambae i stap gohed gud nomo.

20Long taem ya, bambae ol man blong hem oli save harem gud, from we bambae oli save wokem garen long saed blong reva we i gat plante wota, mo ol dongki mo ol buluk blong olgeta bambae oli gat plante gudfala kakae, mo oli save wokbaot long weples oli wantem go long hem.”