1 Samuel 7 - Bislama Bible Revised 2012

1 2 Saml 6.2-4; 1 Kron 13.5-7 Nao ol man Kiriatsearim oli go tekem Bokis ya, oli kam putum long haos blong wan man, nem blong hem Abinadab, we haos blong hem i stap antap long hil. Nao oli putumap wan pikinini blong hem, we nem blong hem Eleasara, blong i lukaot long Bokis ya,

2mo i stat long taem ya, Bokis ya i stap longtaem lelebet long taon ya, i kasem samwe long twanti yia.

Profet Samuel i lida blong ol laen blong Isrel

Long taem ya ol laen* blong Isrel* oli stap singaot long Hae God blong hem i givhan long olgeta.

3Nao Profet Samuel i talem long olgeta se, “Olgeta. Sipos i tru we yufala i wantem kambak long Hae God long olgeta tingting blong yufala, be yufala i mas sakemaot ol aedol blong woman god ya Astate wetem ol narafala god, nao yufala i mas givim olgeta laef blong yufala long hem, mo yufala i mas mekem wosip long hem nomo. Nao hem bambae i sevem yufala, i tekemaot yufala long paoa blong ol man Filistia.”

4Nao ol man oli sakemaot ol aedol blong god ya Bal,* mo ol aedol blong woman god ya Astate, nao oli stap mekem wosip long Hae God nomo.

5Nao Profet Samuel i sanem tok i go long olgeta laen blong Isrel se, “Olgeta. Yufala i mas kam wanples long Mispa, nao long ples ya, bambae mi mi prea long Hae God from yumi.”

6Nao olgeta oli kam wanples long Mispa, mo oli tekem sam wota, oli kafsaedem blong givim i go long Hae God. Mo oli livim kakae long wan fuldei blong mekem wosip long hem, nao oli talemaot we oli mekem sin agens long hem.

Ples ya Mispa, hem i ples we profet ya i stap go long hem oltaem blong stretem ol rao blong ol laen blong Isrel.

7Taem ol man Filistia oli harem we ol laen blong Isrel oli kam wanples long Mispa, ol king blong olgeta oli kam wetem ol man blong olgeta blong mekem faet long olgeta. Mo taem ol laen blong Isrel oli harem nius ya, oli fraet tumas long olgeta.

8Nao oli talem long profet se, “Profet. Hae God i God blong yumi. Plis yu no spel, yu gohed, yu prea long hem, blong hem i tekemaot yumi long paoa blong olgeta ya.”

9Nao hem i kilim wan smol sipsip we i stap titi yet, mo i bonem we i bon evriwan blong mekem sakrefaes long Hae God, nao i prea long hem blong hem i givhan long olgeta. Nao Hae God i harem prea blong hem.

10Nao long taem ya we hem i stap mekem sakrefaes, ol man Filistia oli muf i kam blong statem faet, be semtaem nomo, Hae God i mekem tanda i faerap, i kam stret antap long olgeta. Nao oli fraet we oli lusum hed olgeta, nao oli ronronwe long ol laen blong Isrel.

11Nao ol laen blong Isrel oli girap, oli go ronem ol man Filistia ya, oli stap kilim olgeta oli ded gogo kasem klosap long taon ya Betkara.

12Nao profet i tekem wan bigfala ston, i stanemap long medel blong tufala ples ya Mispa mo Sen, nao i talem se, “Oltaem Hae God i stap givhan long yumi kam kasem tede.” Mo hem i putum nem blong ples ya se Ebenesa, we i min se “Ston blong makem we God i givhan”.

13Long taem ya, olgeta oli winimgud ol man Filistia, nao oltaem long taem blong Profet Samuel, Hae God i stap blokem ol man Filistia ya, i no letem olgeta oli kambak blong mekem faet bakegen.

14Mo ol taon ya blong ol laen blong Isrel we oli stap long medel blong tufala taon ya Ekron mo Gat, we ol man Filistia oli bin holem olgeta longtaem, ol laen blong Isrel oli tekembak olgeta, nao oli holem bakegen ol graon we i blong olgeta fastaem. Mo long taem ya, olgeta oli gat pis tu wetem ol man Kenan.*

15Profet Samuel, hem i lida blong ol laen blong Isrel oltaem long laef blong hem.

16Mo evri yia, hem i stap wokbaot, i stap pas long tri taon ya, Betel, mo Gilgal, mo Mispa. Long trifala taon ya, ol man oli stap kam long hem, oli stap talemaot ol trabol blong olgeta mo ol rao blong olgeta long hem, blong hem i stretem.

17Be oltaem, hem i stap kambak long Rama, from we ples ya i hom blong hem, mo hem i stap jajem ol trabol blong ol man long ples ya tu. Mo long ples ya, hem i wokem wan olta blong mekem wosip long Hae God.