Sam 6 - Bislama Bible Revised 2012

Prea we man i mekem long taem blong trabol(Sing ya, Deved i wokem. Hemia i blong sing wetem mandolin.)(Tok i go long Hae God.)

1 Sam 38.1 Hae God.

Nating we yu yu kros long mi,

be plis yu no tok strong long mi.

Yu yu kros tumas long mi,

be plis yu no panisim mi.

2Hae God.

Mi mi slak tumas.

Plis yu sore long mi.

Mi mi wik we mi wik,

plis yu mekem mi mi strong bakegen.

3Long olgeta laef blong mi naoia,

mi mi harem i nogud we i nogud.

Hae God.

?Bambae yu stap wet blong givhan long mi

gogo kasem wetaem?

4Hae God,

plis yu kam, yu sevem mi.

Fasin blong yu,

oltaem yu lavem man tumas,

plis yu sevem mi blong mi no save ded.

5Long Hom* blong ol Dedman,

i no gat man we i save tingbaot yu.

I no gat wan man nating long ples ya

we i save presem yu.

6Mi mi stap harem nogud

gogo mi slak from.

Evri naet mi stap krae

gogo bed blong mi i wetwet

long wota blong ae blong mi.

Oltaem pilo blong mi i wetwet gud

long wota blong ae blong mi.

7Ol enemi blong mi

oli stap mekem mi mi krae gogo

ae blong mi i solap from,

nao mi no moa save lukluk.

(Tok i go long ol man.)

8 Mat 7.23; Luk 13.27 Yufala ol man nogud,

yufala i gowe long mi.

Hae God i harem krae blong mi finis.

9Taem mi stap krae long hem

blong i givhan long mi,

hem i stap lesin long mi,

hem bambae i harem prea blong mi.

10Ol enemi blong mi bambae oli sem,

bambae oli harem nogud tumas.

Hae God bambae i ronemaot olgeta,

we kwiktaem nomo bambae oli sem gud,

oli ronwe.