Ol Proveb 17 - Bislama Bible Revised 2012

1Fasin ya we man i stap kakae drae nomo be tingting blong hem i stap kwaet, hemia i moa gud, i winim we oltaem hem i stap kakae ol gudgudfala kakae be haos blong hem i fulap long rao.

2Sipos pikinini blong wan masta i stap mekem ol krangke fasin, mo wan man blong wok blong masta ya i gat hed, man ya i save kam bos long pikinini ya, mo bambae i save kasem haf blong olting blong masta ya, olsem we ol narafala pikinini blong masta ya bambae oli kasem.

3Gol mo silva, man i save bonem long faea blong faenemaot se i gud no i nogud, be tingting blong man, Hae God nomo i save mekem olsem long hem blong faenemaot se i gud no i nogud.

4Oltaem, man nogud i stap lesin long ol rabis tingting, mo man blong giaman i stap lesin long ol giaman toktok.

5God i mekem ol puaman, mo sipos yu stap laf nogud long olgeta, be yu stap mekem i nogud long hem. Mo sipos yu glad from we narafala man i kasem trabol, bambae yu yu kasem panis from.

6Ol olfala oli glad tumas long ol smol bubu blong olgeta, olsem nomo we pikinini i glad tumas long papa blong hem.

7I no stret blong man we i no gat hed i traem yusum ol flas tok, mo long sem fasin, i no stret nating blong haeman i traem giaman.

8Man we i stap pem wan haeman blong i mekem samting we i no stret blong i givhan long hem, hem i ting se fasin ya i olsem wan tabu ston we i save mekem hem i gat laki. Hem i bilif se fasin ya i save mekem hem i win long evri samting.

9Sipos yu wantem ol man oli laekem yu, yu mas fogivim olgeta long taem we oli mekem i no stret long yu. Sipos yu stap tokbaot ol fasin nogud we narafala man i mekem long yu, fasin ya bambae i mekem we yutufala i no moa fren gud.

10Man we i gat hed, sipos yu tok strong long hem blong stretem hem, nating we wan taem nomo, be bambae hem i lan moa, i winim krangke man we yu kilim hem plante taem blong stretem hem.

11Man nogud we oltaem nomo i stap tingting blong mekem trabol, Hae God bambae i sanem ded i kam long hem, olsem man blong karem tok blong hem.

12Sipos yu go klosap long dog we i kros tumas from we man i stilim ol pikinini blong hem, hemia i nogud, be i moa gud, i winim we yu go klosap long wan krangke man we i stap gohed long krangke tingting blong hem.

13Sipos yu givimbak fasin nogud long man we i mekem i gud long yu, fasin nogud bambae i no save finis long haos blong yu samtaem.

14Stat blong rao i olsem wan smol hol long bigfala tang, we wota i stap lik smosmol long hem. Yu mas blokem kwik. Sipos no, bambae i kam nogud olgeta.

15Sipos man blong mekem kot i letem wan man nogud i go fri, no i mekem wan stret man we i no mekem samting nogud i kasem panis, be Hae God i no laekem nating tufala fasin ya, i agens long tufala.

16Krangke man i save spenem mane blong hem blong kasem save, be fasin ya i no save givhan long hem nating, from we hem i no gat hed.

17Fren blong yu, oltaem hem i stap soemaot we hem i lavem yu, mo ol brata blong yumi oli stap, blong yumi save givgivhan long yumi long taem blong trabol.

18Man we i no gat hed, hem nomo i save promes blong pemaot ol kaon blong narafala man.

19Man we i laekem sin, hem i man blong laekem trabol. Mo man we i stap tok flas oltaem, hem i stap singaot trabol i kam long hem nomo.

20Man we i stap tingbaot ol samting nogud, mo we oltaem i stap tokbaot ol samting olsem, hem i no save kasem wan gud samting nating. Hem bambae i save kasem trabol nomo.

21Pikinini we i stap mekem ol krangke fasin, hem i stap mekem we papa blong hem i harem nogud, gogo tingting blong hem i foldaon.

22Sipos yu yu stap glad oltaem, sik i no save spolem yu. Be sipos tingting blong yu i stap kam nogud oltaem, bambae yu stap long rod blong ded nomo.

23Sipos man blong mekem kot i no wan stret man, bambae hem i save letem narafala man i pem hem blong i folem tingting blong hem, nao bambae i no moa gat stret fasin long kot ya.

24Man we i gat hed, hem i stap putum tingting blong hem long ol fasin nomo we i waes, be man we i no gat hed i stap lukluk long plante narafala rod.

25Pikinini we i no gat hed, hem i mekem mama mo papa blong hem, tufala i harem i nogud we i nogud olgeta.

26I no stret we man blong mekem kot i jajem wan stret man we i no mekem samting nogud se i mas pem faen. Sipos man we i no gat poen long hem i stap kasem panis, hemia i min se fasin blong mekem kot i krangke.

27Man we i savegud ol samting we i stap mekem, hem i no save toktok tumas, i save stap kwaet. Man olsem, hem i man blong luksave mining blong ol had samting.

28Be i tru, nating we man i no waes, be sipos hem i stap kwaet, i no toktok, bambae ol man oli save ting se hem tu i waes, i gat hed.