Sam 60 - Bislama Bible Revised 2012

Prea blong ol man we oli lus long faet(Sam 108.6-13)(Sing ya, Deved i wokem blong tijim ol man. Hem i mekem long taem ya we hem i faet agens long ol man Aram we oli kamaot long Naharaem mo Joba. Hemia long semtaem ya we Joab wetem ol soldia blong hem oli tanemraon oli gobak long bigfala levelples ya we nem blong hem “Ples blong Tekem Sol”, nao oli kilim twelef taosen man Edom oli ded long ples ya.)(Tok i go long God.)

1God,

bifo, yu yu lego mifala,

yu mekem we mifala i lus long faet.

Bifo, yu yu kros long mifala,

be naoia,

plis yu kambak long mifala bakegen.

2Bifo, yu yu mekem graon i seksek,

nao i brok i open bigwan.

Naoia, plis yu mekem i gud bakegen,

from we hem i stap folfoldaon yet.

3Mifala ol man blong yu,

be yu mekem we mifala i harem nogud tumas,

mifala i stap wokbaot krangke,

olsem we mifala i drong.

4Mifala i stap ona long yu,

nao yu givim saen long mifala

blong mifala i ronwe,

trabol i no kasem mifala.

5Yu yu lavem mifala tumas.

Plis yu sevem mifala long paoa blong yu,

yu ansa long prea blong mifala,

blong mifala i save stap gud.

(Tok i go long ol man.)

6Olgeta.

God i stap long tabu ples blong hem,

i talem se, “Bambae mi mi win,

nao mi seraot ples ya Sekem

i go long ol man blong mi,

mo bambae mi makemaot ol haf blong bigfala levelples ya Sukot

i go long olgeta.

7Ples ya Gilead i blong mi,

mo ples ya Manase* tu i blong mi,

Ples ya Efrem* i olsem hat blong faet blong mi,

mo ples ya Juda* i olsem wokingstik blong mi

we mi mi King.

8Be bambae mi yusum kantri ya Moab

olsem besin blong wasem fes blong mi,

mo bambae mi sakem sus blong mi

i go stap long kantri ya Edom, olsem saen we ples ya i blong mi.

Mi mi winim ol man Filistia

nao mi singsingaot from.”

(Tok i go long God.)

9God.

?Hu nao bambae i lidim mifala

i go long kantri ya Edom?

?Hu nao bambae i tekem mifala i go insaed

long taon ya blong olgeta

we i strong tumas?

10?Olsem wanem?

?I tru we yu yu lego mifala finis?

?Bambae yu no moa go

wetem ol soldia blong mifala

bakegen long faet?

11Plis yu halpem mifala,

yu agensem ol enemi blong mifala,

from we ol samting

we ol man nomo oli save mekem

blong givhan long mifala

i blong nating nomo.

12God,

sipos yu yu stap wetem mifala,

bambae mifala i wi n,

from we yu bambae yu winim ol enemi blong mifala.