Sam 4 - Bislama Bible Revised 2012

Prea we man i prea long hem long naet(Sing ya, Deved i wokem. Hemia i blong sing wetem gita.)(Tok i go long Hae God.)

1God,

oltaem yu stap mekem mi mi kasem ol samting

we mi gat raet blong kasem.

Sipos mi mi prea long yu,

plis yu ansa long mi.

Taem we mi mi stap long trabol,

yu yu stap halpem mi.

Naoia, plis yu kaen long mi,

yu harem prea blong mi.

(Tok i go long ol man.)

2Olgeta.

?Bambae yufala i stap spolem nem blong mi

gogo kasem wetaem?

?Bambae yufala i stap laekem samting we i nogud

gogo kasem wetaem?

?Mo bambae yufala i stap folem fasin blong giaman

gogo kasem wetaem?

3Yufala i mas tingbaot

we Hae God i bin jusumaot ol stret man

oli blong hem,

mo taem mi mi prea long hem

hem i stap harem mi.

4

Taem yufala i stap long bed blong yufala,

i gud yufala i stap kwaet,

yufala i tingting gud long ol samting ya.

5Yufala i mas mekem ol sakrefaes long Hae God,

olsem we loa i talem,

mo yufala i mas trastem hem.

(Tok i go long Hae God.)

6Hae God.

I gat plante man we oli stap prea se,

“Hae God.

Plis yu givim plante gudfala samting moa long mifala.

Yu luk long mifala,

yu kaen long mifala.”

7Taem olgeta ya oli kasem

plante kakae mo plante waen,

oli harem gud tumas.

Be yu yu mekem mi mi glad,

mi harem gud moa, i winim olgeta.

8Hae God.

Taem mi mi ledaon,

tingting blong mi i kwaet,

nao mi slip gud,

from we yu nomo yu stap lukaot gud long mi,

nao mi mi sef.