1Nao Bejalehel olgeta oli tekem gudfala tred ya linen* we i waet, wetem tred we i blu, mo tred we i pepol, mo tred we i red, nao oli wivim ol gudgudfala klos blong ol pris,* blong oli werem taem oli kam mekem wok blong Hae God long Rum ya we i Tabu, long Haos Tapolen blong hem. Mo oli wokem ol spesel klos tu blong Eron i werem, olsem we Hae God i talem long Moses.
2Olgeta oli wivim spesel klos ya efod* long tred ya linen, wetem tred we i blu, mo tred we i pepol, mo tred we i red, mo tred we oli wokem long gol.
3Blong wokem tred ya long gol, oli tekem gol, oli hamarem i kam tintin, nao oli katem long ol longlongfala pis olsem tred, nao oli wivim wetem ol narafala tred ya blong wokem ol kaliko ya.
4Mo oli wokem tu strap blong hem, wan long wan saed, wan long nara saed, we tufala i pas antap long solda blong pris blong fasem.
5Mo oli wokem wan strap blong hem bakegen long sem tred ya yet, we i haf blong efod ya nomo, we i blong fasem long bel. Oli wokem olgeta samting ya stret olsem we Hae God i talem long Moses.
6Nao oli tekem tu gudfala ston ya kanilian,* oli katem ol nem blong ol twelef pikinini blong Jekob* i go long tufala, mo oli wokem tufala ples long gol, oli putum tufala ston ya i fas gud long tufala.
7Nao oli putum tufala ston ya wanwan long tufala strap blong solda blong klos ya, blong soemaot ol twelef laen* blong Isrel,* stret olsem we Hae God i talem long Moses.
8Nao oli wokem spesel paos ya we hae pris i stap hangem long jes blong hem. Mo taem oli wokem paos ya, ol tred blong wivim i sem mak long ol tred we oli yusum blong wivim klos ya efod. Mo ol pija tu we oli wokem long hem blong flasem, oli sem mak long ol pija we oli wokem long efod ya.
9Oli benem kaliko ya blong wokem paos ya, nao i skwea we bigfala blong hem i moa long twanti sentemeta.
10-14Nao oli tekem twelef gudfala ston blong flasem paos ya, mo long ol twelef ston ya, oli katem bakegen nem blong ol twelef pikinini blong Jekob, we wan i go long wan, wan i go long wan, blong soemaot ol twelef laen ya blong olgeta. Nao oli wokem twelef ples long gol, mo oli putum ol twelef ston ya oli fas gud wanwan long olgeta, mo oli somap olgeta long paos ya, we oli stap long fo laen. Long fas laen, oli putum trifala ston ya rubi,* mo topas,* mo ganet,* mo long seken laen oli putum trifala ston ya emeral,* mo safaea,* mo onikis,* mo long namba tri laen, oli putum trifala ston ya takwoes,* mo agat,* mo ametis,* mo long namba fo laen, oli putum trifala ston ya kalsedoni,* mo kanilian, mo jaspa.*
15Nao oli wokem ol smol jen long gol we i klin gud, mo oli tantanem blong mekem olsem tu smol rop long hem, blong hangem paos ya.
16Nao oli wokem tu ples long gol, blong tufala ston ya i fas gud long tufala, mo oli wokem tu ring long gol, oli fasem tufala long tufala kona blong paos ya antap,
17mo oli fasem tufala rop ya long tufala ring ya.
18Nao oli fasem narafala en blong tufala rop ya i go long tufala ples ya blong holem ston we i stap finis long tufala strap blong efod we i pas long solda, blong paos ya i save hang long fran blong efod ya.
19Mo oli wokem tu ring long gol bakegen, oli fasem tufala long tufala kona blong paos ya daon, long baksaed blong hem.
20Mo oli wokem tu narafala ring bakegen long gol, oli fasem tufala long fran blong efod, be daon, klosap long ples we gudfala strap ya blong hem i stap.
21Nao oli tekem tu rop we i blu, oli pusum tufala wanwan i gotru long tufala ring ya long paos daon, blong tufala i go fas long tufala ring ya long efod, stret olsem we Hae God i talem long Moses, blong paos ya bambae i save sidaon gud antap long strap blong efod, i no muvmuv olbaot.
22Nao oli wokem spesel kot ya blong Eron, we i blong putum fastaem, efod biaen. Kot ya, oli wivim evriwan long tred ya nomo we i blu.
23Oli wokem we i wan pis nomo, we i gat hol blong nek long medel, mo oli wivim wan gudfala baesbaending, oli putum i goraon long nek blong hem, blong i no brok.
24-26Nao oli wokem ol pija blong frut blong grenadin* long tred we i blu, mo tred we i pepol, mo tred we i red, mo oli wokem ol smosmol bel long gol. Nao olbaot long en blong kot ya daon, oli hangem wan bel, wan pija, wan bel, wan pija, gogo i goraon, stret olsem we Hae God i talem long Moses.
27Nao oli wivim ol spesel sot ya blong Eron, mo blong ol pikinini blong hem, long tred ya linen,
28mo oli wivim spesel hat blong hem, mo ol hat blong ol pikinini blong hem, mo ol bigfala kalsong blong olgeta.
29Mo oli wivim ol spesel strap blong olgeta tu long tred ya we i waet, mo oli wokem ol pija long olgeta long tred we i blu, mo tred we i pepol, mo tred we i red, stret olsem we Hae God i talem long Moses.
30Mo oli tekem smol gol we i klin gud, i beswan, oli wokem wan smol brasplet* long hem. Oli hamarem i flat gud, nao oli katem tok ya long hem, se “Man ya, hem i tabu, i blong Hae God.”
31Mo oli tekem rop we i blu, oli fasem brasplet ya long hem, blong i hang long fran blong spesel hat ya we hae pris i stap werem, stret olsem we Hae God i talem long Moses.
Bejalehel olgeta oli karem ol samting we oli wokem i kam long Moses(Eksodas 35.10-19)32Nao ol laen* blong Isrel* oli finisim olgeta wok blong Haos Tapolen ya blong Hae God, mo oli wokem evri samting blong hem stret olsem we Hae God i talem long Moses.
33Ol samting ya we oli karem i kam long Moses i olsem. I gat Haos Tapolen ya wetem olgeta samting blong hem, we hemia ol huk blong hem, mo ol frem* blong hem wetem ol stamba blong olgeta, mo ol rel blong hem, mo ol pos blong hem wetem ol stamba blong olgeta,
34mo tapolen ya blong hem we oli wokem long skin blong man sipsip we oli wokem i red, mo narafala tapolen ya we i blong putum antap long hem bakegen we oli wokem long nambawan leta ya we oli wokem long skin blong sikao, mo kaliko ya blong blokem Rum we i Tabu we i Tabu,
35mo Bokis ya we i Saen blong Promes* blong Hae God, we i gat tufala ston i stap insaed wetem tufala stik blong karem, mo Lid ya blong hem we i Ples we Hae God i stap Tekemaot Sin blong olgeta,
36mo Tebol ya blong Bred wetem ol samting blong hem, mo Bred ya we i blong givim i go long Hae God,
37mo Ples ya blong Putum Laet we oli wokem long gol we i klin gud, i beswan wetem ol samting blong hem, mo ol laet blong hem wetem oel blong olgeta,
38mo Olta ya blong Bonem Insens we oli blokem ol wud blong hem long gol, mo tabu oel ya we i blong makemaot man we Hae God i jusumaot, mo insens* ya we i gat gudfala smel blong hem, mo bigfala kaliko ya we i blong blokem Haos Tapolen ya long fran,
39mo Olta blong Bonem Sakrefaes we oli wokem long bras we haf blong hem daon oli wokem netwaea blong hem long bras, wetem tufala stik blong karem mo ol narafala samting blong hem, mo Bras Besin ya wetem ples blong hem,
40mo ol kaliko ya blong fenis we i blong goraon long Haos Tapolen ya, wetem ol pos blong fenis ya mo ol stamba blong olgeta, mo kaliko ya blong blokem doa blong yad ya, mo ol rop blong ol pos blong fenis ya wetem ol aean we i blong taetem ol rop ya long olgeta, mo ol narafala samting blong yusum long Haos Tapolen ya,
41mo ol gudgudfala klos ya we i blong ol pris* oli werem taem oli go insaed long Rum ya we i Tabu, we hemia ol spesel klos blong Hae Pris ya Eron mo blong ol pikinini blong hem.
42Olgeta oli wokem olgeta samting ya stret olsem we Hae God i talem long Moses.
43Nao Moses i lukluk gud long evri samting, mo i luk we oli wokem olgeta samting ya stret olsem we Hae God i talem long hem, nao i blesem ol man ya.
Who We AreWhat We EelieveWhat We Do
2025 by iamachristian.org,Inc All rights reserved.
