Levitikas 25 - Bislama Bible Revised 2012

Namba seven yia(Dutronome 15.1-11)

1 Eks 23.10,11 Nao long taem ya we Moses i stap antap long hil ya Sinae, Hae God i givim tok blong hem long hem

2blong i go talemaot long ol laen* blong Isrel.* Hem i talem se, “Mi mi Hae God. Taem yufala i go stap long kantri ya we mi mi promes* finis blong givim long yufala, oltaem long namba seven yia, bambae yufala i no mas yusum ol graon blong yufala blong planem kakae long hem. Ol graon blong yufala bambae i mas spel. Yufala i mas mekem olsem blong ona long mi.

3Oltaem, long sikis yia, yufala i save planem kakae long ol garen* blong yufala, mo yufala i save lukaot gud long ol plantesen blong grep* blong yufala, mo yufala i save tekemaot ol kakae long garen, yufala i putumgud olgeta.

4Be long namba seven yia blong hem, yufala i no mas yusum ol graon ya, yufala i mas livim i spel. Namba seven yia ya, yufala i mas mekem i tabu i blong mi. Long yia ya, yufala i no mas planem kakae long ol graon ya, mo yufala i mas livim ol plantesen blong grep blong yufala i stap.

5Ol kakae ya we i stap gru hem wan long ol olfala garen blong yufala, yufala i no mas go tekemaot olgeta blong kam putumgud long haos, yufala i mas livim i stap. Mo yufala i no mas go karemaot ol frut blong grep long ol plantesen blong yufala. Yia ya, hem i wan yia we ol graon ya blong yufala i mas spel gud.

6Nating we yufala i no wokem garen long yia ya, be graon ya bambae i save givim kakae long yufala wetem ol slef* blong yufala, mo ol man blong wok blong yufala, mo ol narafala man we oli stap wetem yufala,

7mo ol anamol blong yufala wetem ol wael anamol we oli stap olbaot long open ples. Evri kakae we i kamaot long graon ya, bambae yufala i save kakae, we bambae yufala i no sot.”

Yia blong Givimbak ol graon mo blong letem ol slef oli go fri

8Mo Hae God i talem se, “Bambae yufala i kaontem ol namba seven yia ya, go kasem seven taem, nao bambae i kasem foti naen yia.

9Nao long namba foti naen yia ya, long namba seven manis, long namba ten dei blong hem, long Dei* blong Stretem* Sin, bambae yufala i mas sanem ol man oli go blu pupu olbaot long kantri blong yufala.

10Nao long fasin ya, bambae yufala i makemaot namba fifti yia, se hem i wan spesel yia blong mi, from we hem i yia blong talemaot long olgeta man long kantri blong yufala, se olgeta graon wetem olgeta narafala samting bambae i mas gobak long ol man we i blong olgeta fastaem. Long yia ya, olgeta graon we man i salem long narafala man bambae i mas kambak long man we i blong hem fastaem, no long ol pikinini blong hem, no long olgeta we oli kamaot biaen long hem. Mo long yia ya, olgeta laen* blong Isrel* we oli slef* oli mas go fri, oli mas gobak long ol famle blong olgeta.

11Long yia ya, yufala i no mas planem ol kakae blong yufala, mo yufala i no mas go long ol plantesen blong grep* blong yufala blong karem ol frut blong hem.

12Yia ya, hem i tabu, i blong mi, mo yufala i mas kakae ol kakae ya nomo we i stap gru hem wan long ol graon ya.

13“Nao sipos man i bin salem graon blong hem i go long narafala man long foti naen yia we i pas, be long namba fifti yia ya, graon ya bambae i mas kambak long hem bakegen.

14From samting ya, sipos wan long yufala i wantem salem graon long wan long yufala bakegen, no i wantem pem graon olsem, be yufala i no mas ravem yufala.

15Oltaem yufala i mas makem praes blong graon long namba blong ol yia we graon ya i save givim kakae long man we i pem, go kasem yia we bambae graon ya i mas gobak fri nomo long man blong hem bakegen.

16Sipos i gat plante yia i stap, bambae praes blong graon ya i save go antap moa, be sipos i gat tutri yia nomo i stap, bambae praes blong hem i mas daon nomo, from we praes ya i no praes blong graon, i praes blong ol kakae we bambae i save gru long graon ya we man ya i save tekemaot long hem.

17Mi mi Hae God, mi God blong yufala, mo yufala i no mas trikim yufala blong stilim yufala. Bambae yufala i mas ona long mi mo yufala i mas obei long mi.”

Promes blong Hae God blong blesem graon blong olgeta

18Mo Hae God i talem se, “Bambae yufala i mas obei long ol loa blong mi mo yufala i mas folem ol tingting blong mi, nao bambae yufala i save stap gud long kantri ya we bambae yufala i go stap long hem.

19Sipos yufala i mekem olsem, bambae graon blong yufala i karem fulap kakae, we yufala i no save sot, mo yufala i save stap gud long ples ya.

20Be maet wan man i talem se, ‘?Sipos long namba seven yia ya, mifala i no planem kakae long ol garen* blong mifala, mo mifala i no hivimap ol kakae long haos, bambae mifala i kakae wanem?’

21Mi mi Hae God, mo mi bambae mi blesem graon ya blong yufala long namba sikis yia blong hem, nao bambae i save karem fulap kakae we i naf blong tri yia.

22Ol kakae ya blong namba sikis yia, bambae yufala i stap kakae gogo kasem namba eit yia blong hem, we bambae yufala i save planem ol niufala kakae long ol garen blong yufala bakegen. Mo bambae yufala i stap kakae yet ol kakae ya, gogo kasem namba naen yia blong hem we bambae yufala i tekemaot ol kakae long ol garen blong yufala.”

Yia blong Givimbak graon mo ol narafala samting

23Mo Hae God i talem se, “Sipos wan long yufala i wantem salem graon blong hem long narafala man, bambae i no mas salemaot we i go we i go olgeta, from we graon ya i no blong hem, i blong mi. Mi mi givim long yufala blong yufala i yusum, be yufala i olsem strenja nomo long hem.

24“Sipos wan long yufala i salemaot graon blong hem long narafala man, bambae yufala i mas tingbaot we man we i salemaot, hem i gat raet blong pemaot graon ya bakegen blong holem i blong hem.

25Sipos wan long yufala i kam pua tumas, nao i salemaot graon blong hem, bambae wan famle blong hem we i klosap moa long hem i mas kam pemaot graon ya bakegen.

26Mo sipos man olsem i no gat wan famle blong hem i stap we i save pemaot graon ya blong hem, be biaen, laef blong hem i kam gud, mo hem i gat mane, bambae hem nomo i save kam pemaot graon ya bakegen.

27Mo sipos hem i wantem mekem olsem, hem i mas kaontem hamas yia i stap blong go kasem yia ya we graon ya i mas kambak fri nomo long han blong hem bakegen, nao i mas pemaot long man we i holem, long praes we i stret long namba blong ol kakae we man ya i save karemaot long graon ya go kasem long yia ya.

28Be sipos mane blong man ya i no naf blong i pemaot graon ya blong hem, bambae graon ya i save stap long han blong man ya we i pemaot long hem gogo kasem long Yia ya blong Givimbak ol graon. Nao long yia ya, graon ya bambae i kambak fri nomo long han blong hem bakegen.

29“Mo sipos wan man i gat haos blong hem i stap long wan taon we i gat bigfala stonwol i goraon long hem, nao i salem haos ya long narafala man, be i stat long dei we hem i salemaot, go kasem wan ful yia, bambae hem i gat raet blong pemaot bakegen.

30Be sipos hem i no pemaot long yia ya, bambae hem i no moa gat raet biaen blong pemaot. Mo haos ya bambae i blong man ya oltaem wetem ol pikinini blong hem, mo olgeta we bambae oli kamaot biaen long hem. Mo long Yia ya blong Givimbak ol Samting, haos ya bambae i no moa save kambak bakegen long man ya we i blong hem fastaem.

31Be ol haos we oli stap long ol vilej we i no gat bigfala stonwol i goraon long olgeta, bambae yufala i mas mekem sem fasin long olgeta olsem we yufala i mekem long ol graon. Ol haos olsem, man we i salemaot bambae i no save lusum raet blong hem blong pemaot bakegen, mo sipos hem i no pemaot go kasem long Yia blong Givimbak ol Samting, long yia ya, haos ya i mas kambak fri nomo long han blong hem bakegen.

32Be ol laen* blong Livae* bambae oli stap long ol taon ya we bambae yufala i givim long olgeta, mo olgeta oli no save lusum raet blong olgeta blong pemaot ol haos blong olgeta bakegen.

33Sipos wan long olgeta i salemaot wan haos we i stap long wan taon olsem, nao i no pemaot bakegen go kasem long Yia ya blong Givimbak ol Samting, be long yia ya, haos ya bambae i mas kambak long hem bakegen, from we ol haos ya, yufala i givim long olgeta blong oli holem i blong olgeta.

34Be ol graon raon long ol taon ya we ol anamol blong olgeta oli stap kakae long hem, oli no gat raet blong salem. Graon ya bambae i blong olgeta gogo i no save finis.”

Lon we oli givim long puaman

35 Dut 15.7,8 Mo Hae God i talem se, “Sipos wan long yufala we i stap klosap long yufala i kam pua tumas we i no gat wan samting nating blong givhan long hem, bambae yufala i mas letem hem i karem lon long yufala long sem mak olsem we yufala i stap letem long ol strenja mo long ol narafala man we oli stap wok blong yufala. Oltaem yufala i mas givhan long man olsem, blong hem i save stap klosap long yufala.

36Mo yufala i no mas mekem hem i pem intres long lon ya we yufala i letem long hem. Yufala i mas ona long mi, mo yufala i mas obei long mi, nao yufala i mas mekem rod blong man olsem i stap klosap long yufala oltaem.

37Eks 22.25; Dut 23.19,20Bambae yufala i no mas mekem man olsem i pem intres long lon ya we yufala i givim long hem, mo sipos yufala i salem kakae long hem, be yufala i mas salem long sem praes nomo olsem we yufala i pem.

38Mi mi Hae God, mi God blong yufala. Mi nao mi tekemaot yufala long Ijip, mi tekem yufala i kam, blong mi save givim kantri ya Kenan* long yufala, mo blong mi bambae mi God blong yufala.”

Ol man we oli slef bambae oli save go fri

39 Eks 21.2-6; Dut 15.12-18 Mo Hae God i talem se, “Sipos wan long yufala we i stap klosap long yufala i kam pua tumas, nao hem nomo i salem hem long wan long yufala, blong i kam slef* blong hem, bambae yufala i no mas mekem man olsem i wok olsem ol narafala slef blong yufala.

40Bambae yufala i mas mekem i gud long hem, olsem we yufala i stap mekem long ol man blong wok blong yufala we yufala i stap pem olgeta, mo long ol narafala man we oli stap wetem yufala, mo hem i mas wok blong yufala olsem, gogo kasem long Yia ya blong Givimbak ol Samting.

41Nao long yia ya, hem wetem ol pikinini blong hem oli mas go fri, oli mas gobak long ol famle blong hem, mo long graon blong ol bubu blong hem.

42!Yu luk! Mi mi tekemaot yufala long Ijip, mi tekem yufala i kam, mo yufala i slef blong mi nomo. From samting ya, i tabu blong yufala i salem wan long yufala i kam slef blong narafala man.

43Bambae yufala i no mas mekem i strong tumas long ol puaman olsem, blong mekem oli harem nogud long bodi blong olgeta. Yufala i mas ona long mi.

44Sipos yufala i wantem slef, bambae yufala i save go pemaot ol man mo ol woman long ol narafala man we oli stap raonabaot long yufala.

45Mo yufala i save pemaot ol pikinini blong ol narafala man we oli stap wetem yufala tu. Ol pikinini ya we oli bon long kantri blong yufala oli save kam slef blong yufala,

46mo taem yufala i mekem lastok blong yufala long olting blong yufala, yufala i save putum ol slef ya long han blong ol pikinini blong yufala, mo bambae oli mas wok slef* blong olgeta, gogo oli ded. Be yufala i no mas mekem i strong long ol puaman blong yufala, blong mekem oli harem nogud long bodi blong olgeta. Yufala i mo mas spolem olgeta.

47“Sipos wan narafala man we i stap wetem yufala i kam rijman, mo wan long yufala i kam pua, nao hem nomo i go salem hem blong i kam slef blong rijman ya, no long wan famle blong rijman ya,

48be hem i gat raet yet blong singaot brata blong hem i kam pemaot hem bakegen.

49Sipos no, wan papa blong hem, no wan narafala brata blong hem, no wan narafala famle blong hem i save kam pemaot hem bakegen. No sipos hem i save faenem mane, hem nomo i save pemaot hem bakegen blong i go fri.

50Mo blong wokemaot praes blong hem, hem i mas toktok gud wetem rijman ya, mo tufala i mas kaontem ol yia blong kontrak blong hem, i stat long yia we hem i salemaot hem long rijman ya go kasem long Yia ya blong Givimbak ol Samting. Mo tufala i mas wokemaot praes blong pemaot hem i go fri, long mak blong wejis blong man blong wok.

51-52Bambae hem i mas pembak haf blong mane we rijman ya i pem i kam long hem fastaem we i stret long wejis we man blong wok bambae i karem long ol yia we i stap yet,

53olsem we hem i kam man blong wok blong rijman ya, nao rijman ya i stap pem hem evri yia from wok blong hem. Mo yufala i mas lukaot gud blong rijman ya i no mekem i strong tumas long hem blong mekem hem i harem nogud long bodi blong hem.

54Sipos hem i no save go fri long wan long ol rod ya, bambae long Yia ya blong Givimbak ol Samting, hem wetem ol pikinini blong hem oli mas go fri.

55Mi mi Hae God, mi God blong yufala. Mi nao mi tekemaot yufala long Ijip, mi tekem yufala i kam, mo yufala i no save kam slef blong narafala man olwe, from we yufala i slef blong mi.”