Eksodas 27 - Bislama Bible Revised 2012

Olta blong Bonem Sakrefaes(Eksodas 38.1-7)

1-4Nao Hae God i talem long Moses se, “Moses. Bambae yufala i mas wokem wan Olta, we haf blong hem antap, bambae yufala i wokem long ol plang blong wud ya kasis* we yufala i blokem long bras, mo haf blong hem daon, bambae yufala i wokem long bigfala netwaea, we ol waea blong hem oli bras, mo oli bigbigwan. Olta ya bambae i skwea, we bigfala blong hem i kasem tu meta twanti sentemeta, mo hae blong hem i kasem klosap wan meta foti sentemeta. Bambae yufala i wokem fo samting olsem hon* blong buluk oli stanap long ol fo kona blong hem, we bambae oli haf blong Olta ya nomo, mo bambae yufala i blokem olgeta wud blong Olta ya long bras. Mo bambae yufala i wokem wan baket blong hem, blong karemaot asis wetem gris we i kamaot long hem. Mo bambae yufala i wokem ol smol savel, mo ol besin, mo ol fok, wetem ol baket blong karemaot sakol faea we i stap laet. Olgeta samting ya evriwan oli blong yusum long Olta ya, mo bambae yufala i wokem olgeta long bras. Nao bambae yufala i wokem bigfala netwaea long bras, we ol waea blong hem oli bigbigwan, mo yufala i wokem haf blong ol fo saed blong Olta ya daon, long hem. Mo bambae yufala i wokem fo ring long bras, yufala i hangem long ol fo kona blong netwaea ya, blong tu stik we i blong karem Olta ya bambae i gotru long olgeta.

5Olta ya bambae i gat strap long bras i goraon long medel blong ol fo saed blong hem, nao netwaea ya i stat long ples ya, i godaon kasem graon.

6Bambae yufala i wokem tu stik blong karem Olta ya long wud ya kasis, mo bambae yufala i blokem tufala long bras.

7Nao sipos yufala i wantem karem, bambae yufala i pusum tufala stik ya i gotru long ol ring ya, we wan stik i stap wan saed, wan stik i stap wan saed.

8Haf blong Olta ya antap, bambae yufala i wokem long ol plang blong kasis, mo bambae yufala i wokem we i gat hol blong hem olsem bokis. Bambae yufala i mas wokem Olta ya stret long plan ya we mi stap talemaot long yu naoia long hil ya.”

Fenis blong yad blong Haos Tapolen blong Hae God(Eksodas 38.9-20)

9Mo Hae God i talem se, “Bambae yufala i mas wokem wan fenis i goraon long Haos Tapolen ya blong mi we bambae yufala i stap kam long hem blong mit wetem mi. Bambae yufala i somap long waet kaliko ya linen,* we i beswan blong blokem ples ya. Long saed blong hem i go long saot, longfala blong kaliko ya bambae i kasem foti fo meta.

10Mo bambae i gat twanti pos long hem, wetem twanti spesel stamba blong olgeta we bambae oli stanap long olgeta, we evriwan, bambae yufala i mas wokem long bras, mo ol huk mo ol rel we evriwan, yufala i mas wokem long silva, we kaliko ya bambae i hang long olgeta.

11Mo long saed blong hem i go long not, olgeta samting blong hem bambae i sem mak nomo.

12Mo long saed blong hem i go long wes, longfala blong kaliko blong hem bambae i kasem twanti tu meta, mo bambae i gat ten pos wetem ten spesel stamba blong olgeta we kaliko ya bambae i hang long olgeta.

13Mo long saed blong hem i go long is, we i gat doa long hem, bigfala blong ples ya tu bambae i kasem twanti tu meta.

14Nao long saed blong doa ya go kasem kona, longfala blong kaliko blong hem bambae i kasem moa long sikis meta haf, mo bambae i gat tri pos wetem tri spesel stamba blong trifala, we kaliko ya bambae i hang long trifala,

15mo long narasaed blong doa ya, olgeta samting blong hem bambae i sem mak nomo.

16Mo blong blokem doa ya, bambae yufala i wokem wan kaliko we longfala blong hem bambae i kasem naen meta. Man we i gat gudhan blong wivim kaliko we i gat pija long hem, bambae i tekem gudfala tred ya linen* we i waet, mo tred we i blu, mo tred we i pepol, mo tred we i red, nao i wivim kaliko blong blokem doa ya we i gat ol pija olbaot long hem. Mo bambae i gat fo pos wetem fo spesel stamba blong olgeta, we kaliko ya bambae i hang long olgeta.

17Bambae yufala i wokem ol rel long silva, blong hangem olgeta long ol pos blong yad ya blong wokem fenis. Mo bambae yufala i wokem ol huk long silva, blong ol kaliko ya oli hang long olgeta, mo bambae yufala i wokem ol spesel stamba long bras, blong ol pos ya oli stanap long olgeta.

18Longfala blong yad ya bambae i kasem foti fo meta, mo bigfala blong hem bambae i kasem twanti tu meta, mo hae blong kaliko ya we i goraon long hem bambae i kasem moa long tu meta. Ol kaliko blong fenis ya, bambae yufala i wokem long waet kaliko ya linen,* we i beswan. Mo ol spesel stamba blong ol pos ya, bambae yufala i wokem olgeta long bras.

19Olgeta samting we bambae yufala i yusum long Haos Tapolen ya blong mi, wetem olgeta aean ya we bambae yufala i fasemtaet ol rop blong Haos Tapolen ya long olgeta, mo we bambae yufala i fasemtaet ol rop blong holem fenis ya long olgeta, bambae yufala i wokem olgeta evriwan long bras.”

Fasin blong lukaot long laet insaed long Haos Tapolen ya(Levitikas 24.1-4)

20Mo Hae God i talem se, “Bambae yu mas talem long ol man ya, se oltaem bambae oli mas tekem ol nambawan olifoel* blong olgeta, oli givim long yu blong yu save yusum long ol laet ya blong Haos Tapolen blong mi, blong yufala i save laetem ol laet ya evri naet.

21Bambae Eron wetem ol pikinini blong hem oli tekem ol laet ya, oli kam putum long Haos Tapolen ya. Bambae oli putum long Rum we i Tabu, narasaed long kaliko ya saed i kam, we Bokis ya we i Saen blong Promes* blong mi i stap narasaed long hem saed i go. Long Haos ya we bambae mi mi stap long hem, oltaem bambae ol laet ya oli stap laet, i stat taem san i godaon, i go kasem moning. Rul ya i blong olwe, mo yufala wetem ol pikinini blong yufala, mo olgeta we bambae oli kamaot biaen long yufala, bambae yufala i mas folem oltaem.”