Dutronome 1 - Bislama Bible Revised 2012

Fastok blong buk ya

1-5 (Oltaem, sipos man i aot long Sinae, i wokbaot i kam kasem Kadesbanea, taem blong wokbaot long rod ya leven dei nomo.) Nao biaen, olgeta oli stap wokbaot longtaem long draeples, gogo oli kamtru long kantri ya Moab. Mo taem oli stap kam klosap long ples ya, Hae God i mekem we olgeta oli winim King Sihon, king blong ol laen blong Amoro,* we hedkwota blong hem i stap long taon ya Hesbon, mo King Og, king blong kantri ya Basan, we tu bigfala taon blong hem Astarot mo Edrei. Nao oli kam stap long bigfala levelples ya long medel blong ol hil we Jodan Reva i pas long hem, long saed blong levelples ya long is we i haf blong kantri ya Moab yet. Long ples ya, taon ya Paran i stap narasaed, mo ol narafala taon ya Tofel mo Laban mo Hajerot mo Disahab oli stap narasaed.

Moses i stori long wokbaot blong olgeta mo long promes we Hae God i givim long olgeta fastaem

Nao long namba foti yia blong olgeta we oli aot long Ijip oli wokbaot i kam, long namba leven manis* blong hem, mo long fas dei blong manis ya, Moses i tekem ol laen* ya blong Isrel* oli kam wanples, nao hem i talemaot long olgeta evri samting we Hae God i talem long hem. Taem oli stap yet long narasaed Jodan Reva long is, hem i talemgud mining blong ol loa mo ol tok blong Hae God long olgeta.

6Hem i talem se, “Hae God i God blong yumi, mo bifo, taem we yumi stap long hil ya Sinae, hem i talem long yumi se, ‘Yufala i stap longtaem finis long hil ya.

7I gud yufala i tektekemaot ol haos tapolen blong yufala, yufala i aot, yufala i go. Bambae yufala i go stap long ples blong ol laen blong Amoro* long ples blong hil, mo long ol ples raonabaot long hem. Long saed i go long is, mak blong ples ya i stat long Jodan Reva, i finisim ol ples blong hil, i godaon long botom blong hil, i go kasem draeples long saot, i go kasem Mediterenian Si long wes, nao i go long not, i finisim kantri blong ol laen blong Kenan* wetem ol hil blong Lebanon gogo kasem bigfala reva ya Yufretes.

8Hemia kantri ya we mi mi promes* blong givim long trifala bubu ya blong yufala bifo, Ebraham mo Aesak mo Jekob,* wetem ol laen we bambae oli kamaot biaen long trifala. Naoia yufala i mas go tekem kantri ya i blong yufala.’ ”

Moses i putumap ol jaj(Eksodas 18.13-27)

9Nao Moses i talem long olgeta se, “Olgeta. Bifo, long taem ya we yumi stap long hil ya Sinae, mi mi talem long ol olfala blong yufala se, ‘Wok ya blong mi, we mi stap lidim yufala, hem i hevi tumas blong mi wan nomo mi karem.

10Hae God i God blong yumi, mo naoia hem i mekem we yumi kam plante we plante olsem ol sta long skae.

11Hem i God blong ol bubu blong yumi, mo hem bambae i mekem we yumi kam plante we plante moa, mo bambae hem i mekem we yumi kam rijman, we yumi gat plante samting, olsem we hem i promes.*

12Be wok ya blong jajem ol trabol blong yumi i bigfala tumas blong mi wan nomo mi karem.

13Naoia yufala i mas jusumaot sam man long olgeta laen* blong yumi we oli gat save, mo oli waes, mo oli gat gudnem long ol wok blong olgeta. Nao bambae mi mi putumap olgeta blong oli lukaot long yumi.’

14Nao olgeta i agri, oli talem se hemia i wan gudfala tingting blong folem.

15Nao olgeta oli jusumaot ol lida long ol laen blong yumi, we oli waes mo oli gat gudnem long ol wok blong olgeta, mo mi mi putumap olgeta blong oli lukaot long ol laen blong yumi. Sam long olgeta ya oli lukaot long wan taosen man, mo sam oli lukaot long wan handred man, mo sam oli lukaot long fifti man, mo sam oli lukaot long ten man. Mo mi putumap sam long olgeta tu oli haeman long ol laen ya blong yumi.

16“Nao mi talem long olgeta se, ‘I stat naoia, oltaem yufala i mas mekem kot blong stretem ol rao we i stap kamaot long medel blong yumi. Mo taem yufala i jajem rao, yufala i mas mekem i stret, nating we i blong yumi nomo, no i blong yumi wetem ol strenja ya we oli stap wetem yumi.

17Mo taem yufala i jajem man, yufala i mas mekem long stret fasin nomo. Bambae yufala i no mas mekem wan fasin long wan man, mo narafala fasin long narafala man, yufala i mas jajem evri man long sem fasin, from we toktok we bambae yufala i talem i no kamaot long yufala, i kamaot long God nomo. Mo sipos wan trabol i strong tumas, we yufala i no naf blong stretem, bambae yufala i mas tekem i kam long mi, nao bambae mi mi stretem.’

18Mo long taem ya, mi mi tijim olgeta long ol narafala samting we bambae oli mas mekem.”

Moses i sanem sam man blong oli go lukluk ol ples(Namba 13.1-33)

19Nao Moses i talem se, “Hae God i God blong yumi mo hem i talem long yumi se, ‘Yufala i mas aot long hil ya Sinae, yufala i mas pastru long bigfala draeples ya we i nogud we i nogud, blong go long kantri blong ol laen* blong Amoro,* we i ples blong hil,’ mo yumi mekem olsem. Nao taem yumi kam kasem Kadesbanea,

20-21mi mi talem long ol olfala blong yufala se, ‘Hae God i God blong yumi mo hem i God blong ol bubu blong yumi bifo, mo naoia, yumi stap finis long hil ya long kantri ya blong ol laen blong Amoro, we hem i wantem givim long yumi. !Yufala i luk! !Hem i talem finis, se graon ya i blong yumi! !Yumi go stap long hem, yumi holem i blong yumi, olsem we hem i talem finis long yumi! Bambae yumi no mas fraet, tingting blong yumi i mas strong.’

22“Be biaen, olgeta oli kam luk mi, oli talem long mi se, ‘I gud yumi sanem sam man oli go lukluksave kantri ya fastaem. Nao taem olgeta oli kambak, bambae oli save talem long yumi, wanem rod bambae yumi folem mo ol taon ya oli olsem wanem.’

23“Mo taem mi harem tok ya, mi agri se hem i wan gudfala tingting we mifala i mas folem. Nao mi jusumaot twelef man wanwan long ol twelef laen blong yumi,

24mo olgeta oli aot oli go. Oli go insaed long ples ya we i ples blong hil, oli wokbaot gogo kasem krik ya Eskol, mo oli stap lukluksave olgeta ples ya.

25Mo taem oli kambak, oli tekem ol frut we oli faenem long ples ya, oli karem i kam. Mo oli givim ripot se, ‘Kantri ya we Hae God i givim long yumi i gudfala tumas, ol kakae i save gru gud long hem.’

26 Dut 9.23; Hib 3.16 “Be biaen, ol olfala ya blong yufala oli tanem baksaed long tok ya blong Hae God, nao oli no moa wantem go insaed long kantri ya.

27Olgeta oli stap tok agens long hem, oli talem se, ‘Naoia Hae God i no moa wantem yumi, i agens long yumi. ?Weswe hem i tekemaot yumi long Ijip blong putum yumi long han blong ol laen ya blong Amoro? !Olgeta ya bambae oli kilim yumi ya!

28?Blong wanem bambae yumi go long ples ya? Ol man ya we yumi sanem olgeta i go blong lukluksave ol ples ya oli kam talemaot se ol man blong ples ya oli strong moa, mo oli longlongfala winim yumi. Mo ol taon blong olgeta, ol stonwol blong olgeta i hae we i hae, i kasem skae. Mo i gat ol lariken man tu oli stap long ples ya. !Yumi no naf ya!’

29“Be mi mi talem long olgeta se, ‘Bambae yufala i no fraet long ol man ya.

30Hae God i God blong yumi, mo hem bambae i lidim yumi, i faet long saed blong yumi, olsem we yumi luk finis long Ijip

31Wok 13.18mo long draeples. !Yumi luk finis, se taem hem i tekem yumi i kam long ples ya, i no gat wan samting nating i spolem yumi long rod! Hem i mekem long yumi stret olsem we wan papa i stap karem smol pikinini blong hem.’

32-33Hib 3.19Nao nating we mi mi stap tok long olgeta olsem wanem, be oli no save trastem Hae God. Oltaem hem i stap lidim yumi i kam long ol gudgudfala ples blong spel, mo i stap soemaot rod long yumi we long naet i stap go fastaem long yumi long wan bigfala faea we i stanap stret, mo long dei i stap go fastaem long yumi long wan bigfala klaod we i stanap stret, be oli no save trastem hem nating.”

Hae God i panisim ol laen blong Isrel(Namba 14.20-45)

34 Hib 3.18 Mo Moses i talem se, “Nao taem Hae God i harem ol toktok ya we oli stap talem agens long hem, hem i kros tumas long olgeta. Nao hem i mekem wan strong tok se,

35‘!Yufala i man nogud ya! !Bambae i no gat wan long yufala i save go insaed long gudfala kantri ya we mi mi promes* blong givim long ol bubu blong yufala!

36Keleb we papa blong hem Jefune, hem nomo bambae i go insaed long kantri ya, from we tingting blong hem i stap strong oltaem long mi. Graon ya we hem i go lukluk finis, bambae mi mi givim i go long hem wetem ol pikinini blong hem.’

37Mo hem i kros tumas long mi tu from fasin ya blong olgeta, mo hem i talem se, ‘Mo yu tu yu no save go insaed long kantri ya.

38Josua we papa blong hem Nun, we i stap givhan long yu, hem nao bambae i lidim ol man ya oli go insaed long kantri ya. Mo yu yu mas givhan gud long hem blong mekem tingting blong hem i strong blong i holem wok ya.’

39“Nao hem i talem long mifala se, ‘Ol smosmol pikinini blong yufala we oli no naf yet blong makem fasin we i stret mo fasin we i no stret, we yufala i talem se bambae ol man Kenan* oli holem olgeta oli karem olgeta i go, be olgeta ya nao bambae oli go insaed long kantri ya. Mi bambae mi givim kantri ya long olgeta, nao bambae oli go stap long hem, oli holem i blong olgeta.

40Be yufala ya, yufala i mas tanemraon, yufala i mas folem rod ya we i gotru long Akaba Bei, yufala i gobak long draeples.’

41“Be ol olfala ya blong yufala oli girap, oli talem se, ‘Hae God i God blong yumi, mo mifala i mekem sin agens long hem. Be naoia, bambae mifala i go mekem faet long ol enemi ya blong yumi, stret olsem we hem i talem.’ Nao olgeta evriwan oli mekemrere blong go faet, oli ting se bambae i isi nomo blong go mekem faet long ples ya antap long hil.

42“Be Hae God i talem long mi se, ‘Moses. Yu mas tok strong long olgeta, yu mas blokem olgeta blong oli no go faet, from we mi bambae mi no stap wetem olgeta, mo ol enemi blong olgeta bambae oli winim olgeta.

43Nao mi mi talemaot tok ya long olgeta we Hae God i talem, be oli no lesin nating. Oli tanem baksaed long hem, oli wokbaot i go antap long ples long hil, from we oli stap mekem hed.

44Nao long semtaem, ol laen* ya blong Amoro* we oli stap antap long ples ya oli kam kavremap olgeta, oli faet long olgeta, nao oli ronem olgeta gogo kasem ples ya Homa long Edom, mo oli flatemgud olgeta long ples ya.

45Nao from samting ya, olgeta oli krae long Hae God blong i givhan long olgeta. Be hem i no lesin long olgeta, mo i no tingbaot ol samting ya we oli kasem.

46“Nao yumi stap longtaem long Kadesbanea.