1Nao biaen longtaem lelebet, long namba tri yia blong draetaem ya we i no gat ren nating, Hae God i talem long Profet Elaeja se, “Yu girap, yu go stanap long fes blong King Ehab. I no longtaem, bambae mi mi sanem ren i kam.”
2Nao profet i go blong luk king.
Draetaem ya, long Sameria i nogud we i nogud, i no gat kakae nating.
3Nao king i singaot Obadaea, man blong lukaot long haos blong hem, blong i kam luk hem. Man ya i wan man blong prea we oltaem i stap mekem wosip long Hae God.
4Mo bifo, long taem ya we Kwin Jesebel i stap kilim ol profet blong Hae God, hem i tekem wan handred long olgeta, i go haedem olgeta long tu hol blong ston. Hem i putum fifti long wan, fifti long wan, mo i stap givim kakae mo wota long olgeta.
5Nao king i talem long hem se, “I gud yumitufala i go lukluk olgeta krik mo springwota olbaot long kantri ya blong yumi, blong traem faenem gras we i naf blong fidim ol hos mo ol hafkas dongki* blong yumi. Maet yumi save sevem olgeta.”
6Ale, tufala i seraot, nao wan i go long wan haf blong kantri ya, wan i go long nara haf, blong tufala i save lukluk olgeta ples long hem.
7Nao taem Obadaea i stap wokbaot i go, hem i faenem Profet Elaeja, mo i luksave hem, nao i nildaon, i bodaon we fes blong hem i kasem graon, mo i askem se, “!Ei, Profet! ?I tru, yu ya?”
8Mo profet i talem se, “Yes. Yu go talem long king ya se mi mi stap long ples ya.”
9Nao Obadaea i talem se, “!Mi mi no mekem wan samting nogud! ?From wanem yu wantem putum mi long han blong hem, blong i kilim mi mi ded?
10Hae God i laef, i stap we i stap, mo long fes blong hem, mi mi talem tru long yu, se king i sanem tok i go olbaot finis long olgeta kantri long wol blong lukaot yu. Mo sipos wan king i talem se yu yu no stap long kantri blong hem, be hem i mas fosem hem blong i mekem wan strong tok blong soemaot we tok blong hem i tru.
11Naoia, yu wantem se mi go talemaot long hem we yu yu stap long ples ya, be yu luk.
12?Olsem wanem sipos mi aot long ples ya mi go, nao Spirit blong Hae God i tekemaot yu yu go long narafala ples we mifala i no save? Sipos mi talem long king we yu yu stap long ples ya, be hem i no save faenem yu, bambae hem i kilim mi mi ded ya. Yu mas tingbaot we mi tu mi man blong prea, mo mi stap mekem wosip long Hae God, i stat long taem we mi mi pikinini, kam kasem tede.
13Maet yu yu no harem, be long taem ya we Kwin Jesebel i stap kilim ol profet blong Hae God, mi ya nao mi haedem wan handred long olgeta long tu hol blong ston. Mi putum fifti long wan, fifti long wan, mo mi stap givim kakae mo wota long olgeta.
14?From wanem yu wantem sanem mi mi go blong talemaot long king se yu yu stap long ples ya? !Bambae hem i kilim mi mi ded ya!”
15Nao profet i talem se, “!Nogat! Hae God i laef, i stap we i stap. Hem i gat olgeta paoa, mo mi mi man blong wok blong hem. Long fes blong hem, mi mi talem tru long yu, se tede nomo, bambae mi mi go stanap long fes blong king ya.”
King Ehab i luk Profet Elaeja16Nao Obadaea i go luk King Ehab, i talemaot samting ya long hem, mo king i aot blong go luk Profet Elaeja.
17Nao taem hem i luk profet ya, hem i talem se, “!Aaa! !Yu ya nao! !Yu yu stamba blong olgeta trabol long Isrel*!”
18Be profet i talem se, “!Nogat! Mi mi no man blong mekem trabol. !Yu yes! !Yu mo papa blong yu wetem ol famle blong hem! Yufala i no stap obei long ol tok blong Hae God, mo yu yu stap mekem wosip long god ya Bal.*
19Naoia yu mas sanem tok i go long olgeta man blong kantri ya, blong oli kam mitim mi long bigfala hil ya Kamel. Mo yu mas tekem ol fo handred fifti profet ya blong Bal i kam, wetem ol fo handred profet blong woman god ya Asera,* we Kwin Jesebel i stap lukaot long olgeta.”
Profet Elaeja i traem ol profet blong Bal20Nao King Ehab i sanem tok i go long olgeta laen* blong Isrel* long not mo long ol profet blong Bal,* nao olgeta evriwan i kam wanples long bigfala hil ya Kamel.
21Nao Profet Elaeja i go klosap long olgeta, i talem se, “!Olgeta! ?Wetaem bambae yufala i mekemap tingting blong yufala? Sipos Hae God i God, i gud yufala i mekem wosip long hem. Be sipos Bal i God, i gud yufala i mekem wosip long hem.” Be ol man ya oli no talem wan samting nating.
22Nao hem i talem se, “I gat fo handred fifti profet ya blong Bal i stap, be mi wan nomo, mi profet blong Hae God we mi stap yet.
23Yufala i tekem tu bul i kam. Ol profet ya blong Bal bambae oli tekem wan, oli kilim, oli katem long ol smosmol pis mo oli putum long ol wud ya, be bambae oli no putum faea long hem. Mo mi tu bambae mi mekem sem samting long narawan.
24Nao olgeta ya bambae oli prea long god ya blong olgeta, mo mi bambae mi prea long Hae God. Mo hemia we i sanem faea i kam, hem nao i God.”
Nao ol man ya oli singaot bigwan se, “!I gud ya! !Yumi mekem olsem!”
25Nao hem i talem long ol profet ya blong Bal se, “Oraet, from we yufala i plante, yufala i wokem blong yufala fastaem. Yufala i tekem wan bul, yufala i mekem i rere, be yufala i no putum faea long ol wud ya, yufala i prea nomo long god ya blong yufala.”
26Nao ol profet ya oli tekem bul ya we ol man oli givim long olgeta, mo oli mekem i rere, nao oli prea long Bal gogo kasem medel dei. Oli stap singaot bigwan se, “!Bal! !Plis yu harem prea blong mifala!” Nao oli stap gohed, oli stap danis raon long olta ya we oli wokem, be i no gat wan ansa nating i kam.
27Nao long medel dei, Profet Elaeja i stap jikim olgeta, i talem se, “!Ei! !Yufala i prea strong moa! !Yufala i singaot bigwan! !Hem i wan god ya! Ating hem i stap spel yet ya. Sipos no, hem i stap long smol haos. No hem i wokbaot i go samples. Sipos no, hem i stap slip yet. Yufala i mas wekemap hem.”
28Nao ol profet ya oli prea strong moa, oli stap singaot bigwan, mo oli folem kastom blong olgeta, oli tekem ol bigfala naef blong faet wetem ol smosmolwan, nao oli stap katkatem bodi blong olgeta, gogo blad i ron.
29Oli stap gohed, oli singsingaot olsem we oli krangke, gogo kasem samwe long tri klok, we i taem blong ol laen blong Isrel blong mekem sakrefaes, be i no gat wan ansa i kam, mo oli no harem wan tok nating.
Hae God i soemaot we hem nomo i God30Nao Profet Elaeja i talem long ol man se, “Yufala evriwan i kam klosap long mi.” Ale, olgeta oli kam hivap raon long hem, nao hem i stat mekemgud bakegen olta ya blong Hae God we oli bin brekemdaon bifo.
31Jen 32.28; 35.10Hem i tekem twelef ston, we ol ston ya oli makem ol twelef laen* ya we oli kamaot biaen long ol twelef pikinini blong Jekob,* man ya we Hae God i bin putum nem ya Isrel* long hem.
32Nao hem i yusum ol ston ya blong wokem olta ya bakegen blong mekem wosip long Hae God. Hem i digim wan hol blong wota i goraon long olta ya, we i naf blong holem fotin lita wota.
33Nao hem i putum ol wud long olta ya, mo i katem bul ya long ol smosmol pis, i putum antap long ol wud ya. Nao hem i talem se, “Yufala i go fulumap wota long fo bigfala botel, yufala i kafsaedem i go olbaot long mit ya wetem ol wud ya.” Nao oli mekem olsem we hem i talem.
34Nao hem i talem se, “Yufala i mekem bakegen,” mo oli mekem bakegen. Hem i talem se, “Ale, wan taem moa,” mo oli mekem bakegen.
35Nao wota ya i stap rondaon long olta, i go long hol ya, gogo i fulap gud.
36Nao stret long taem ya we oltaem ol laen blong Isrel oli stap mekem sakrefaes long aftenun, hem i go klosap long olta ya, nao i prea se, “Hae God. Yu yu God blong Ebraham mo Aesak mo Isrel we mifala i laen blong hem. Plis yu soemaot naoia, we yu yu God blong mifala, mo we mi mi man blong wok blong yu, mo we mi mekem ol samting ya from we yu yu talem olsem.
37Hae God, plis yu ansa long mi, blong ol man ya bambae oli save we yu nomo yu God, mo we yu stap tekem olgeta i kambak long yu bakegen.”
38Nao Hae God i sanem faea i kamdaon, i bonem sakrefaes ya we i bon evriwan. Ol wud wetem ol ston mo graon tu i bon olgeta, mo wota ya we i stap long hol raon long olta ya i kam drae evriwan.
39Nao taem ol man ya oli luk samting ya, oli foldaon we fes blong olgeta i godaon long graon, nao oli singaot, oli talem se, “!Hae God ya nomo, hem i God! !Hae God ya nomo, hem i God!”
40Nao Profet Elaeja i talem se, “Yufala i holem ol profet blong Bal,* yufala i no letem wan i ronwe.” Nao oli holem olgeta evriwan, mo hem i lidim olgeta i godaon long Kison Reva, nao oli kilim olgeta evriwan i ded long ples ya.
Draetaem ya i finis41Nao Profet Elaeja i talem long King Ehab se, “Ale, yu go. Naoia yu save kakae. Mi mi harem noes blong bigfala ren i stap kam.”
42Jem 5.18Taem we king i go blong kakae, profet i klaem i go antap long bigfala hil ya bakegen, nao i nildaon, i bodaon we fes blong hem i kasem ni blong hem, i prea.
43Nao hem i talem long man blong wok blong hem se, “Yu go traem lukluk i godaon long solwota, se i gat saen blong ren, no nogat.”
Nao man ya i go lukluk, mo i kambak, i talem se, “No, mi no luk wan samting.”
Nao profet i sanem hem i gobak seven taem, blong i lukluk.
44Nao long namba seven taem blong hem, hem i kambak, i talem se, “Mi jes luk wan smol klaod nomo i kamaot long solwota, be i smol nomo olsem han blong man.”
Nao profet i talem long hem se, “Yu go luk king, yu talem long hem, se i gud hem i go mekemrere kat blong hem, i gohom kwiktaem. Sipos no, bambae ren i blokem hem.”
45Nao i no longtaem, klaod blong ren i kam kavremap olgeta ples, mo win i stat blu, nao bigfala ren i stat foldaon. Ale, king i klaem long kat blong hem, nao i gobak long Jisrehel.
46Mo paoa blong Hae God i kam long profet ya, nao hem i fasemstrong klos blong hem long bodi blong hem blong i save resis kwik, nao i resis fastaem long king, i go kasem Jisrehel.
Who We AreWhat We EelieveWhat We Do
2025 by iamachristian.org,Inc All rights reserved.
