Ol Proveb 19 - Bislama Bible Revised 2012

1Sipos yu yu wan puaman we fasin blong yu i stret, laef we yu stap long hem i moa gud, i winim laef blong man blong giaman we i no gat hed.

2Fasin ya we man i hareap blong traem wokem wan samting, be i no save rod blong hem, hem i nogud. Man blong hareap bambae i kasem trabol nomo.

3Sam man oli stap spolem laef blong olgeta long ol rabis fasin blong olgeta, mo biaen, oli talem se Hae God nomo i stap spolem olgeta.

4Ol rijman, oltaem nomo oli gat ol niufala fren blong olgeta, be ol puaman oli no gat plante fren, mo oltaem nomo, ol fren ya oli stap ronwe long olgeta.

5Sipos yu go talem ol giaman toktok insaed long kot, bambae yu kasem panis from. Man we i giaman olsem bambae i no save ronwe long panis blong hem.

6Ol man oli stap traehad blong mekem ol haeman oli glad long olgeta, mo sipos wan man i man blong givhan long man, plante man oli wantem kam fren blong hem.

7Taem we man i kam puaman, nating we ol stret brata blong hem nomo, be oli no wantem hem, oli agens long hem, mo ol fren blong hem oli mowas, oli stap tanem baksaed long hem. Mo nating we hem i stap traehad tumas blong holem olgeta, be i no save mekem.

8I gud yu lanem olgeta samting we yu save lanem. Fasin ya i save givhan bigwan long yu, mo sipos yu no fogetem ol samting ya, bambae laef blong yu i save gohed gud.

9Sipos yu go talem ol giaman toktok insaed long kot, bambae yu no save ronwe long panis. Man we i giaman olsem bambae i ded from.

10I no stret blong man we i no gat hed i kam rijman, we i gat evri samting we hem i wantem, mo i no stret moa blong slef i kam bos long ol haeman.

11Sipos yu gat hed, bambae yu no save kros kwik. Sipos wan man i mekem i rong long yu, nao yu no tingbaot, hemia i wan gudfala fasin.

12Taem we king i kros long yu, i olsem we laeon i stap singaot bigwan blong kakae man, be taem we hem i glad long yu, i olsem ren long taem blong bigsan.

13Pikinini we i no gat hed i save spolem papa blong hem. Mo woman we oltaem i stap toktok tumas long man blong hem, hem i olsem paep we i lik, we wota i stap drop oltaem nomo, i no save finis.

14Man i save kasem haos mo mane long papa mo mama blong hem, be Hae God nomo i save givim woman long hem, we i waes.

15Sipos yu wantem, yu save les, yu save gohed blong slip, be biaen, bambae hanggri i meksave yu.

16Sipos yu stap holem ol loa blong Hae God, bambae yu gat longfala laef, be sipos yu tanem baksaed long olgeta, bambae yu ded.

17Taem yu givim samting long puaman, i olsem we yu letem Hae God i yusum fastaem, mo biaen, hem bambae i givim jenis blong samting ya long yu.

18Taem pikinini blong yu i yangfala, we i save lan yet, yu mas stretem hem. Sipos no, i olsem we yu stap givhan nomo long hem blong i kilim hem i ded.

19Sipos wan man i stap kros kwik, i gud hem i stap kakae frut blong kros ya blong hem bakegen. Sipos yu go givhan long hem blong tekemaot hem long trabol, be oltaem, bambae hem i wantem blong yu mekem olsem.

20Sipos yu stap lesin long ol gudfala tok we ol man oli givim blong givhan long yu, mo yu glad blong lan, bambae yu yu kam wan waes man.

21Ol man oli save mekem plan blong mekem ol naranarafala samting, be ol samting we Hae God i wantem, bambae oli mas kamtru.

22Laef blong puaman i nogud, be i moa gud, i winim laef blong man blong giaman. Mo man we i wantem tumas ol samting, bambae hem i sem long fes blong ol man.

23Sipos yu stap obei long Hae God, bambae yu gat longfala laef we yu glad long hem. Bambae yu save stap gud we i no gat wan samting i save spolem yu.

24Sam man oli les tumas, we kakae nomo, be oli no save putum i go long maot blong olgeta.

25Man we i stap flas, we i stap leftemap hem, i gud hem i kasem panis, blong man we save blong hem i smol nomo i save lan long hem. Sipos yu tok strong long man we i waes, blong stretem hem, bambae hem i save lan.

26Man we i spolem papa blong hem no i ronemaot mama blong hem i gowe long haos blong hem, hem i spolem nem blong hem, mo i stap pulum sem i kam long hem nomo.

27Pikinini blong mi, sipos yu kam we yu no moa wantem lan, bambae i no longtaem, yu no moa save mekem ol samting we yu lanem finis.

28Sipos wan witnes long kot i wantem tumas blong spolem wan man, kot ya bambae i no save wok long fasin we i stret. Ol man nogud oli laekem tumas blong mekem ol samting we i nogud.

29Man we i no gat hed, mo i stap flas, hem i stap leftemap hem, be bambae i no longtaem, ol man oli mas wipim hem.