2 Kronikel 17 - Bislama Bible Revised 2012

Jehosafat i kam king

1Nao taem King Asa i ded, pikinini blong hem Jehosafat i tekem ples blong hem, i kam king long Juda.* Nao hem i stap mekem kantri ya i kam strong moa, blong ol man Isrel* oli no save kam mekem faet long hem.

2Hem i putum ol grup blong ol soldia blong hem long ol taon blong kantri blong hem we oli gat stonwol i goraon long olgeta, mo long ol narafala ples olbaot long kantri ya, mo long ol taon long distrik ya Efrem* we papa blong hem i bin holem olgeta bifo.

3Mo Hae God i stap blesem hem, from we hem i stap folem ol gudfala fasin ya we papa blong hem i stap soemaot long fas haf blong laef blong hem we hem i rul. Hem i no mekem wosip long god ya Bal,*

4mo i no folem ol fasin we ol king blong Isrel oli stap mekem. Hae God i God blong papa blong hem, mo oltaem hem i stap wok blong hem, mo i stap obei long ol tok blong hem.

5Nao Hae God i givim paoa long hem blong i rul gud long kingdom blong hem, mo ol man blong hem oli stap kam givim ol presen long hem. Nao hem i kam wan rijman, we olgeta man oli stap ona gud long hem.

6Hem i stap mekem tingting blong hem i strong oltaem blong mekem wok blong Hae God, mo olbaot long kantri ya, hem i stap brekemdaon olgeta ples blong mekem wosip long ol narafala god, mo i stap katemdaon ol aedol blong woman god ya Asera.*

7Nao long namba tri yia blong hem we hem i king, hem i sanem ol haeman blong hem oli wokbaot, oli go long ol taon blong Juda, blong oli tijim ol man blong hem long Loa* blong Hae God. Nem blong ol haeman ya i gat Benael, mo Obadaea, mo Sekaraea, mo Netanel, mo Mikaea.

8Mo hem i sanem tu pris, wetem naen Livaet* oli go wetem olgeta. Tufala pris ya, nem blong tufala, Elisama mo Jehoram. Mo ol Livaet ya, nem blong olgeta, Semaea, mo Netania, mo Sebadia, mo Asahel, mo Semiramot, mo Jehonatan, mo Adonia, mo Tobia mo Tobadonia.

9Olgeta ya oli tekem Buk blong Loa blong Hae God, nao oli go pas long olgeta taon long Juda blong tijim ol man long hem.

King Jehosafat i stap kam strong moa

10Nao long taem ya, Hae God i stap mekem we olgeta king we oli stap raonabaot long Juda* oli fraet blong kam mekem faet long King Jehosafat.

11Mo from samting ya, i gat ol man Filistia oli karem plante silva wetem ol narafala presen, oli kam givim long hem, mo i gat ol man Arab oli karem seven taosen seven handred man sipsip mo seven taosen seven handred man nani oli kam givim long hem se presen blong hem.

12Nao long fasin ya, oltaem, king ya i stap kam strong moa. Olbaot long Juda, hem i wokem ol strong ples blong haed mo ol taon

13we i stap putumgud ol kakae wetem ol samting blong faet i stap long olgeta.

Mo hem i putum ol nambawan komanda blong ol soldia blong hem oli stap long Jerusalem.*

14Nem blong ol komanda ya i olsem. Long laen* blong Juda, i gat Adnaha, we i hed komanda, mo i gat tri handred taosen soldia blong laen ya oli biaen long hem.

15Mo i gat Jehohanan, we i namba tu komanda, mo i gat tu handred eiti taosen soldia blong laen ya oli biaen long hem,

16mo i gat Amasia, we i namba tri komanda, mo i gat tu handred taosen soldia blong laen ya oli biaen long hem. Amasia ya, we papa blong hem Sikri, hem i talemaot hem wan, se hem i glad blong mekem wok ya blong Hae God.

17Mo long laen blong Benjamin,* i gat Eliada, we i hed komanda. Hem i wan nambawan soldia, mo i gat tu handred taosen soldia blong laen ya oli biaen long hem, we oli stap karem ol smol sil* mo ol bonara.

18Mo i gat Jehosabad, we i namba tu komanda, mo i gat wan handred eiti taosen man blong laen ya oli biaen long hem, we oli tren gud mo oli rere blong faet.

19Olgeta soldia ya blong king oli stap mekem wok blong olgeta long Jerusalem, mo antap long olgeta ya, king i putum ol narafala soldia blong hem long ol narafala taon ya long Juda we oli gat stonwol i goraon long olgeta.