1 Eks 27.1,2 Mo bakegen, King Solomon i wokem wan olta long bras, mo olta ya i skwea, we longfala blong ol fo saed blong hem i sem mak, i kasem naen meta, mo hae blong hem klosap i kasem fo meta haf.
2Hem i wokem wan raon tang tu we i wokem long bras we hae blong hem i bitim tu meta mo bigfala blong hem insaed klosap i kasem fo meta haf, mo bigfala blong hem afsaed i moa long totin meta.
3Long top blong tang ya, long afsaed blong hem, i gat ol pija blong bul long tu laen, we wan laen i goraon antap, mo narawan i goraon daon long hem. Ol pija ya, hem i wokem wantaem wetem tang ya, blong flasem.
4Mo hem i wokem twelef bul long bras, i mekem olgeta i stanap, we as blong olgeta i go wanples long medel, mo tri i lukluk i go long is, mo tri i lukluk i go long saot, mo tri i lukluk i go long wes mo tri i lukluk i go long not, mo tang ya i sidaon antap long baksaed blong olgeta.
5Bigfala tang ya, tik blong hem i samwe long eit sentemeta, mo top blong hem i open olsem maot blong kap. Top blong tang ya i ben i go afsaed olsem ol haf blong flaoa, mo tang ya i save holem samting olsem sikisti taosen lita blong wota.
6Eks 30.17-21Mo hem i wokem ten besin, mo i putum faef long saed blong haos ya i go long saot mo i putum faef long saed i go long not. Ol besin ya i blong ol pris oli yusum blong wasem ol mit blong anamol we i blong bonem blong mekem sakrefaes. Mo wota we i stap insaed long bigfala tang ya i blong ol pris oli yusum blong swim.
7-8 Eks 25.31-40 Eks 25.23-30 Mo hem i wokem ten Ples blong Putum Laet, olsem we oli stap wokem oltaem, mo i wokem ten tebol, nao i putum olgeta long bigfala rum blong haos ya, we i gat faef Ples blong Putum Laet wetem faef tebol i stap long saed i go long saot, mo faef Ples blong Putum Laet wetem faef tebol i stap long saed i go long not. Mo hem i wokem wan handred besin tu long gol.
9Mo bakegen, hem i wokem wan yad we i blong ol pris nomo, insaed long bigfala stonwol we i goraon long haos ya, mo i wokem wan narafala yad bakegen we i blong ol man. Ol doa long wol long medel blong tufala yad ya, hem i blokem olgeta long bras.
10Mo i putum tang ya klosap long haos ya long kona blong hem long saed i go long saot is.
11-16Mo antap long ol samting ya, Huram i wokem ol sospen wetem ol savel mo ol besin. Hem i finisimgud olgeta samting we hem i promes long king se bambae i wokem blong haos* ya blong Hae God. Lis blong ol samting we hem wokem i gat tufala pos, mo tufala spesel hed blong tufala, we hem i wokem tufala long bras, mo tufala pija blong jen we i goraon long tufala hed ya wanwan, mo tufala laen blong pija blong frut blong grenadin,* we i goraon long tufala hed blong pos ya, we i gat handred frut long wan laen, i mekem fo handred frut olgeta, mo ten kat, mo ten besin blong wota, mo wan bigfala tang, mo twelef bul we tang i sidaon long baksaed blong olgeta, mo ol sospen, mo ol savel, mo ol fok, mo ol narafala samting we i blong yusum wetem ol samting ya. Olgeta samting ya i blong yusum long haos blong Hae God, mo Huram we i nambawan man blong wok long han blong hem, hem i wokem olgeta, stret olsem we King Solomon i talem. Hem i wokem olgeta long bras we oli saenem gogo i saen gud.
17King i mekem olgeta oli wokem ol samting ya long ples blong wokem bras, long bigfala levelples ya klosap long Jodan Reva, long medel blong tufala taon ya Sukot mo Jaretan.
18Ol samting ya we oli wokem, oli plante we plante, nao i no gat man i skelem olgeta blong faenemaot wet blong bras we oli yusum.
19-22Mo king i wokem ol samting long gol tu we oli stap insaed long haos blong Hae God. Lis blong ol samting ya i gat Olta ya blong Bonem Insens,* mo ol tebol ya we ol pris oli stap putum bred ya long hem, we oli givim i go long Hae God, mo ol Ples blong Putum Laet wetem ol laet we oli wokem long gol we i beswan, we oli stap laet long doa blong Rum ya we i Tabu we i Tabu, olsem we oli putum long plan, mo ol flaoa we i blong flasem, mo ol laet, mo ol pinses, mo ol samting blong kilim laet, mo ol besin blong karem insens, mo ol savel blong karem sakol we i stap laet. Olgeta samting ya, olgeta oli wokem long gol we i beswan. Mo ol doa blong haos ya blong Hae God, wetem ol doa blong Rum ya we i Tabu we i Tabu, oli blokem olgeta evriwan long gol.
Who We AreWhat We EelieveWhat We Do
2025 by iamachristian.org,Inc All rights reserved.
