Levitikas 4 - Bislama Bible Revised 2012

Sakrefaes we man i mas mekem blong tekemaot sin blong hem we i no tingting blong mekem

1Nao Hae God i givim tok blong hem long Moses bakegen,

2blong i go talemaot long ol laen* blong Isrel.* Hem i talem se, “Mi mi Hae God. Sipos wan long yufala i mekem wan samting we i brekem Loa blong mi, be i no tingting blong mekem olsem, fasin blong mekem sakrefaes we hem bambae i mas folem i olsem.

3“Sipos hae pris i mekem sin olsem, sin ya blong hem bambae i mekem yufala evriwan i doti long fes blong mi. Mo bambae hem i mas tekem wan yang bul we i no gat wan samting i rong long bodi blong hem, i mas mekem sakrefaes long hem blong mekem wosip long mi, from sin ya blong hem.

4Hem i mas tekem bul ya i kam long fes blong mi long doa blong yad blong Haos Tapolen blong mi, long ples ya we Olta blong Bonem Sakrefaes i stap long hem, mo i mas putum han blong hem long hed blong bul ya blong soemaot we sakrefaes ya i blong hem, mo i mas kilim bul ya long ples ya long fes blong mi.

5Nao hem i mas tekem sam blad blong hem, i karem i kam insaed long Haos Tapolen ya,

6mo i mas pusum fingga blong hem i go long blad ya, i sakem smosmol seven taem i go long graon long fran blong kaliko ya we i stap blokem Rum ya we i Tabu we i Tabu, insaed long Haos Tapolen blong mi.

7Mo hem i mas tekem sam blad, i putum long ol fo hon* blong Olta blong Bonem Insens,* mo haf blad ya we i stap, i mas tekem i go afsaed, i kafsaedem i go long stamba blong Olta blong Bonem Sakrefaes.

8Nao hem i mas tekem olgeta gris blong hem, wetem ol gris blong gat blong hem,

9mo tufala kidni blong hem wetem ol gris blong tufala, mo gudfala haf blong leva blong hem daon,

10i bonem olgeta long Olta ya, long sem fasin we i stap mekem long gris blong ol anamol we ol man oli stap kilim blong mekem sakrefaes ya we i soemaot we oli stap fren gud wetem mi.

11-12Be olgeta narafala haf blong buluk ya, hem i mas karemaot long ples ya, i go bitim ples blong ol haos tapolen blong olgeta, i go bonem afsaed, long ples we oli stap kafsaedem asis faea blong Olta ya long hem. Ples ya i klin long fes blong mi, mo hem i mas tekem faeawud, i mekem faea long ples ya, mo i mas bonem olgeta haf blong buluk ya long hem, we hemia skin blong hem, mo olgeta mit blong hem, mo hed blong hem, mo tufala leg blong hem, mo tufala han blong hem, mo gat blong hem wetem olgeta samting we i stap long hem. Olgeta narafala haf blong hem, bambae hem i mas bonem olgeta evriwan long ples ya.

13“Sipos yufala evriwan i joen blong mekem wan samting we i brekem Loa blong mi, we yufala i no tingting se bambae yufala i mekem sin, nating we yufala i ting se i gud nomo, be samting ya bambae i mekem yufala evriwan i doti long fes blong mi.

14Nao taem yufala i luksave se yufala i mekem sin, bambae yufala i mas tekem wan yang bul i kam, blong mekem sakrefaes long hem blong tekemaot sin ya blong yufala. Yufala i mas tekem bul ya i kam long fes blong mi long fran blong Haos Tapolen blong mi,

15mo ol lida blong yufala oli mas putum han blong olgeta long hed blong hem blong soemaot we sakrefaes ya i blong yufala evriwan, nao long fes blong mi, oli mas kilim hem i ded.

16Nao hae pris i mas tekem sam blad blong hem, i karem i kam insaed long Haos Tapolen blong mi,

17mo i pusum fingga blong hem i go long blad ya, i sakem smosmol seven taem i go long graon long fran blong kaliko ya we i stap hang long ples ya.

18Mo hem i mas tekem sam blad, i putum long ol fo hon blong Olta blong Bonem Insens, mo biaen, i mas tekem haf blad ya we i stap, i go afsaed bakegen, i kafsaedem i go long stamba blong Olta blong Bonem Sakrefaes.

19Mo hem i mas tekem olgeta gris blong buluk ya, i bonem long Olta.

20-21Bambae hem i mas mekem sem fasin long buluk ya, olsem we i mas mekem long buluk we i mekem sakrefaes long hem blong tekemaot sin blong hem, mo biaen, hem i mas karemaot buluk ya, i go bonem afsaed, long sem fasin ya bakegen. Hemia nao fasin we hae pris bambae i mas folem blong mekem sakrefaes ya. Buluk ya i sakrefaes blong tekemaot sin blong yufala evriwan, mo long fasin ya, mi bambae mi fogivim yufala, mi tekemaot sin blong yufala.

22“Sipos wan lida blong yufala i mekem wan samting we i brekem Loa blong mi we i no tingting se bambae i mekem sin, be samting ya bambae i mekem hem i doti long fes blong mi.

23Nao taem hem i luksave se i mekem sin, bambae hem i mas tekem wan man nani we i no gat wan samting i rong long bodi blong hem, i mas kam long fes blong mi blong mekem sakrefaes long hem,

24mo i mas putum han blong hem long hed blong nani ya blong soemaot we sakrefaes ya i blong hem. Nao hem i mas kilim i ded klosap long Olta blong Bonem Sakrefaes, long saed blong hem i go long not, long ples blong kilim anamol blong mekem sakrefaes we i blong bonem i bon evriwan, from we hemia i wan sakrefaes blong tekemaot sin.

25Nao pris i mas tekem blad blong hem, i pusum fingga blong hem i go long blad ya, mo i mas putum long ol fo hon blong Olta ya, mo i mas kafsaedem haf blad we i stap i go long stamba blong Olta ya.

26Mo hem i mas bonem olgeta gris blong hem long Olta ya, olsem we i stap bonem ol gris blong ol anamol ya we ol man oli stap kilim blong mekem sakrefaes ya we i soemaot we oli stap fren gud wetem mi. Hemia nao fasin we pris i mas folem blong mekem sakrefaes blong tekemaot sin blong man we i lida, mo long fasin ya, mi bambae mi fogivim hem, mi tekemaot sin blong hem.

27 Nam 15.27,28 “Sipos wan man nating i mekem wan samting we i brekem Loa blong mi, we i no tingting se bambae i mekem sin, be samting ya bambae i mekem hem i doti long fes blong mi.

28Nao taem hem i luksave we i mekem sin, bambae hem i mas tekem wan woman nani we i no gat wan samting i rong long bodi blong hem, i mas kam long fes blong mi blong mekem sakrefaes long hem.

29Nao hem i mas putum han blong hem long hed blong nani ya blong soemaot we sakrefaes ya i blong hem, mo i mas kilim klosap long Olta ya long saed blong hem i go long not, long ples blong kilim anamol blong mekem sakrefaes we i blong bonem i bon evriwan.

30Nao pris i mas tekem blad blong hem, i pusum fingga blong hem i go long hem, mo i putum long ol fo hon blong Olta ya, mo i mas kafsaedem haf blad we i stap i go long stamba blong Olta ya.

31Nao man ya i mas katemaot olgeta gris blong nani ya, olsem we ol man oli stap katemaot ol gris blong ol anamol we oli kilim blong mekem sakrefaes ya we i soemaot we oli stap fren gud wetem mi, mo pris i mas bonem long Olta blong bambae gudfala smel blong hem i mekem mi mi glad long hem. Hemia nao fasin we pris i mas folem blong mekem sakrefaes blong tekemaot sin blong man olsem, mo long fasin ya, mi bambae mi fogivim hem, mi tekemaot sin blong hem.

32“Sipos man ya i wantem tekem wan sipsip i kam blong i mekem sakrefaes blong tekemaot sin ya blong hem, bambae i mas tekem wan woman sipsip we i no gat wan samting i rong long bodi blong hem, i mas kam long fes blong mi blong mekem sakrefaes long hem.

33Nao hem i mas putum han blong hem long hed blong sipsip ya blong soemaot we sakrefaes ya i blong hem, nao i mas kilim i ded klosap long Olta ya, long saed blong hem i go long not, long ples ya blong kilim anamol blong mekem sakrefaes ya we i blong bonem i bon evriwan.

34Nao pris i mas tekem blad blong hem, i pusum fingga blong hem i go long hem, mo i mas putum long ol fo hon blong Olta ya, mo i mas kafsaedem haf blad ya we i stap i go long stamba blong Olta ya.

35Nao man ya i mas katemaot olgeta gris blong sipsip ya, olsem we ol man oli stap katemaot ol gris blong ol sipsip we oli kilim blong mekem sakrefaes ya we i soemaot we oli stap fren gud wetem mi, mo pris i mas bonem long Olta, wetem ol presen we i blong bonem blong givim i kam long mi. Hemia nao fasin we pris i mas folem blong mekem sakrefaes blong tekemaot sin blong man olsem, mo long fasin ya, mi bambae mi fogivim hem, mi tekemaot sin blong hem.”