Josua 8 - Bislama Bible Revised 2012

Josua olgeta oli winim ol man Eae

1Nao Hae God i talem long Josua se, “Yu no fraet, mo tingting blong yu i no foldaon. Yu tekem olgeta soldia blong yu, yufala i go antap long Eae. Mi bambae mi mekem yufala i winim ol man blong ples ya wetem king* blong olgeta. Graon blong olgeta wetem olting blong olgeta bambae oli blong yufala.

2Bambae yufala i mas kilim ol man ya wetem king blong olgeta, olsem we yufala i kilim ol man Jeriko wetem king blong olgeta. Be ol anamol blong olgeta wetem olting blong olgeta, yufala i save holem i blong yufala. Be fastaem, yu mas putum sam soldia oli go haed long narasaed taon ya.”

3Nao Josua i mekemrere blong go mekem faet long taon ya. Hem i jusumaot toti taosen soldia we oli strong man blong faet, blong i sanemaot olgeta long naet.

4Hem i talem long olgeta se, “Yufala i go, yufala i haed long narasaed long taon ya, be bambae yufala i no stap longwe tumas long hem. Mo yufala i mas stanbae blong kam mekem faet.

5Mi wetem ol man blong mi, bambae mifala i kam stret nomo long doa* blong bigfala stonwol blong taon ya. Nao taem olgeta oli kamaot blong mekem faet long mifala, olsem we oli mekem lastaem, bambae mifala i tanemraon, mifala i ronwe.

6Nao bambae oli ronem mifala gogo mifala i pulum olgeta oli stap longwe long taon ya. Bambae oli ting se mifala i stap ronwe long olgeta olsem we yumi mekem lastaem.

7Nao bambae yufala i kamaot wantaem long ples we yufala i stap haed long hem, yufala i go insaed long taon ya, yufala i holem. Hae God i God blong yumi, mo hem bambae i putum taon ya long han blong yufala.

8Mo taem yufala i holem, yufala i mas putum faea long hem, olsem we Hae God i talem. Hemia nao ol samting we yufala i mas mekem.”

9Nao hem i sanem olgeta i go.

Nao olgeta oli aot, oli go haed long ples ya we hem i talem, long narasaed taon ya long wes, long medel blong taon ya mo Betel, mo oli stap wet long ples ya. Be hem wetem ol narafala soldia oli stap yet long ples blong olgeta.

10Nao long nekis dei, long eli moning, hem i girap, i singaot ol soldia blong hem oli kam wanples, nao hem wetem ol narafala lida oli lidim olgeta i go long taon ya.

11Nao olgeta oli wokbaot blong go long doa blong bigfala stonwol blong taon ya, nao oli putumap ol haos tapolen blong olgeta klosap long hem, long saed ya long not. I gat wan krik we i stap klosap long taon ya, nao olgeta oli stap narasaed long hem.

12Hem i tekem samwe long faef taosen man, i putum olgeta oli stap haed long narasaed taon ya long wes long medel blong taon ya mo Betel.

13Nao hem wetem bighaf blong ol soldia oli stap rere long ples ya we oli stap long hem long saed blong taon ya long not. Be ol narafala soldia oli stap stanbae long saed blong taon ya long wes. Nao long naet, hem i tekem bighaf ya oli kamdaon, oli stap long krik ya klosap long taon.

14Nao taem king blong taon ya i luk olgeta, hem i hareap, i tekem ol man blong hem oli kam blong mekem faet long olgeta long rod we i blong godaon long Jodan Reva, long sem ples ya we oli faet long hem fastaem. Be hem i no save nating we i gat ol man blong Josua oli stap haed long narasaed blong taon.

15Nao Josua olgeta oli giaman se oli fraet long olgeta, nao oli ronwe, oli resis blong go long draeples.

16Nao king ya i singaot olgeta man long taon ya blong ronem olgeta. Be taem oli stap ronem olgeta, olgeta ya oli stap pulum olgeta oli go longwe moa long taon blong olgeta.

17Olgeta man blong Eae mo Betel evriwan oli stap ronem olgeta ya, oli livim taon ya i stap olsem nomo, we i no moa gat man i stap blong blokem.

18Nao Hae God i talem long Josua se, “Josua. Yu holem spia blong yu antap, yu poen i go long Eae. Naoia mi mi givim ples ya long yufala.” Nao Josua i mekem olsem we Hae God i talem.

19Nao taem hem i leftemap spia blong hem, wantaem nomo ol narafala man ya we oli stap haed longwe oli girap, oli resis i go insaed long taon ya, oli bonem.

20-21Nao taem Josua olgeta oli luk we olgeta ya we oli stap haed longwe oli go insaed long taon ya finis, oli bonem, olgeta oli tanemraon, oli stat kilim ol man Eae. Mo taem ol man Eae oli lukluk biaen, oli luk bigfala smok we i stap go antap. Nao oli no moa gat rod blong ronwe, from we olgeta ya we oli resis i go long draeples oli tanemraon finis blong kam mekem faet long olgeta.

22Mo olgeta ya we oli stap bonem taon ya, oli kam joen long faet ya, oli kam long baksaed blong ol man Eae ya, oli stap kilim olgeta. Nao ol man Eae oli no moa save ronwe. Josua olgeta oli raonemgud olgeta, mo oli kilim olgeta evriwan oli ded. I no gat wan long olgeta we i ronwe, no i stap laef,

23king blong olgeta nomo oli no kilim, oli holem hem, oli tekem i kam long Josua.

24Olgeta oli kilim olgeta man Eae ya long draeples, stret long ples ya we ol man ya oli bin ronem olgeta i go long hem fastaem. Nao biaen, oli kambak long taon ya, oli kilim olgeta evriwan we oli stap long ples ya.

25-26Josua i stap holem spia blong hem antap i stap poen i go long taon ya yet. Hem i stap holem olsem gogo kasem we olgeta man Eae evriwan oli ded. Olgeta man mo woman blong taon ya we oli ded long dei ya, namba blong olgeta i kasem twelef taosen evriwan.

27Be ol anamol, oli no kilim, oli holem i blong olgeta wetem ol narafala samting blong ples ya, stret olsem we Hae God i talem long Josua fastaem.

28Josua i bonemgud taon ya, mo ples ya i kam nogud olgeta. Mo i stap olsem kam kasem tede.

29Mo long taem ya, hem i hangem king blong olgeta antap long wan tri, mo bodi blong hem i stap hang gogo kasem sapa. Nao long sapa, hem i talem long ol man blong hem blong oli tekemaot bodi blong king ya, oli sakem long ples ya we doa blong bigfala stonwol blong taon ya i stap long hem. Mo oli hivimap ol ston long bodi blong hem, mo ol ston ya oli stap yet olsem kam kasem tede.

Josua i ridimaot Loa klosap long bigfala hil ya Ebal

30 blong hem oli stap karem, hem i stap long medel blong tufala kampani ya, we tufala kampani ya i stap lukluk i kam long hem. Ol man blong wan kampani, baksaed blong olgeta i go stret long bigfala hil ya Gerisim, mo narafala kampani, baksaed blong olgeta i go stret long bigfala hil ya Ebal. Moses i bin putum tok ya finis long olgeta, se bambae oli mas mekem olsem taem oli kasem ples ya, blong ol pris bambae oli blesem olgeta.

34Nao Josua i ridimaot Loa ya wetem ol tok blong hem we i talemaot ol gudgudfala samting we Hae God bambae i givim long olgeta sipos oli stap folem Loa ya, mo ol trabol we bambae oli kasem, sipos oli no folem. Hem i ridimaot ol tok ya stret olsem we i stap long Buk blong Loa ya.

35Long taem ya, olgeta evriwan oli kam wanples, wetem ol woman, mo ol pikinini, mo olgeta strenja ya tu we oli stap wetem olgeta, mo hem i ridimaot olgeta tok ya long olgeta.