2 Kronikel 31 - Bislama Bible Revised 2012

King Hesekia i stretem ol fasin blong mekem wosip

1Nao biaen long ol lafet* ya, ol laen* blong Isrel* we oli kam long lafet ya oli go long evri taon long Juda,* oli brebrekem ol longlongfala ston we ol man oli stanemap blong mekem wosip long olgeta, mo oli katemdaon ol pija blong woman god ya Asera,* mo oli spolem ol olta mo ol ples blong mekem wosip long ol god ya. Mo biaen, oli mekem sem samting ya long ol narafala ples long Juda, mo long ol ples long distrik ya Benjamin,* mo long distrik ya Efrem,* mo long distrik ya Manase,* nao biaen oli gobak long ol hom blong olgeta bakegen.

2Nao King Hesekia i stanemap bakegen fasin ya we ol pris mo ol Livaet* oli seraot long ol grup blong mekem ol spesel wok blong olgeta long haos* blong Hae God. Ol wok ya, hemia we oli stap mekem ol sakrefaes we i blong bonem i bon evriwan, wetem ol sakrefaes we i blong pris i bonem haf, ol man oli kakae haf blong soemaot we oli stap fren gud wetem Hae God, mo oli stap lidim wosip long haos blong Hae God, mo oli stap presem hem mo oli stap talem tangkiu long hem.

3Nam 28.1—29.39Nao king i karem sam anamol blong hem i kam, i givim long olgeta blong oli save mekem ol sakrefaes ya we i blong bonem i bon evriwan, we oli stap mekem evri dei long moning mo long sapa, mo long Sabat* dei, mo long Lafet* blong Niumun,* mo long ol narafala lafet we tok blong olgeta i stap long Loa* blong Hae God.

4 Nam 18.12,13,21 Mo antap long ol samting ya, king i talem long ol man long Jerusalem* blong oli tekem ol samting we i stret blong oli givim long ol pris mo ol Livaet, blong olgeta oli save fri blong mekem ol wok ya nomo we Loa blong Hae God i talem.

5Nao taem king i sanem tok ya i go long ol laen blong Isrel, wantaem nomo, olgeta oli tekem ol fas kakae blong ol garen blong olgeta, wetem ol waen, mo ol olifoel,* mo ol hani,* mo ol narafala kakae blong garen, mo oli tekem ol taet* tu blong olgeta samting we oli gat, nao oli karem i kam.

6Nao ol man blong ol taon ya long Juda oli kaontem ol buluk mo ol sipsip blong olgeta, nao oli seraot ol taet blong olgeta, mo oli karem i kam blong givim i go long Hae God, from we hem i God blong olgeta, mo oli karem plante presen tu i kam, nao oli putum olgeta samting ya i tabu, i blong hem.

7Oli stat karem ol presen ya i kam long namba tri manis blong yia ya, mo oli stap hivimap gogo kasem namba seven manis, nao oli finis.

8Nao taem king ya wetem ol haeman blong hem oli luk plante presen ya we ol man ya oli givim, olgeta oli presem Hae God mo oli presem ol man ya blong hem tu from ol gudfala wok ya blong olgeta.

9Nao king i go luk ol pris wetem ol Livaet blong tokbaot ol presen ya,

10nao Hae Pris* ya Asaria we i kamaot biaen long pris ya Jadok, hem i talem long hem se, “I stat long taem ya we ol man oli stap karem ol presen ya i kam long haos blong Hae God i kam kasem tede, oltaem mifala i gat plante kakae blong mifala, mo ol kakae ya i no finis, i gat plante i stap yet. Mifala i gat ol samting ya from we yumi ya, yumi ol man blong Hae God, mo hem i stap blesem yumi.”

11Nao king i talem long olgeta blong oli mekemrere ol rum insaed long stonwol blong haos blong Hae God,

12mo taem oli mekemrere ol rum ya finis, oli karem ol presen ya wetem ol taet we ol man oli givim, oli kam putumgud insaed. Mo oli jusumaot wan Livaet we nem blong hem Konania, blong hem i stap lukaot long ol samting ya, mo oli putum brata blong hem Simei i kam namba tu blong hem.

13Nao oli jusumaot ten narafala Livaet blong oli stap wok aninit long tufala. Nem blong ol man ya, i gat Jehiel, mo Asasi, mo Nahat, mo Asahel, mo Jerimot, mo Josabad, mo Eliel, mo Jismakia, mo Mahat, mo Benaea. Nao king wetem hae pris, tufala i putumap olgeta.

14Nao wan narafala Livaet we nem blong hem Kore, we papa blong hem Jimnaha, hem i hedman blong ol gad long doa ya blong haos blong Hae God, saed i go long is, we nem blong hem Doa long Is. Nao tufala ya i putumap hem blong i tekem ol presen we ol man oli stap givim long Hae God long gladhat blong olgeta, mo blong i seraot olgeta i go long ol laen blong Livae.*

15Mo long ol narafala taon ya we i gat ol pris oli stap long olgeta, i gat ol Livaet we oli stap givhan gud long hem long wok ya. Nem blong olgeta ya, i gat Iden, mo Miniamin, mo Jesua, mo Semaea, mo Amaria mo Sekania. Olgeta ya oli stap seraot ol kakae ya i go long ol pris mo ol Livaet, be oli no makem kakae we oli givim long olgeta folem ol laen blong olgeta, oli makem folem ol wok we oli stap mekem.

16Mo antap long olgeta ya, oli stap givim kakae tu long ol laen blong Livae we oli gat tri yia i go antap, we bambae oli gat raet blong go wok evri dei long haos blong Hae God.

17Long taem ya, oli makemaot wok blong ol pris ya folem ol olfala blong olgeta bifo we oli stap kamaot biaen long olgeta, mo we oli stap karem nem blong olgeta. Be ol Livaet, oli seraot olgeta we oli gat twanti yia i go antap, oli go joen long ol grup blong olgeta blong mekem wok, mo oli makemaot wok blong olgeta folem ol grup ya.

18Mo oli raetemdaon nem blong olgeta ya evriwan, wetem ol woman blong olgeta, mo ol pikinini blong olgeta, mo ol narafala man tu we oli stap wetem olgeta, from we olgeta oli mas rere oltaem nomo blong mekem ol wok blong olgeta long haos blong Hae God.

19Nao i gat ol pris* tu we oli stap lukaot long ol anamol blong olgeta long ol open ples raonabaot long ol taon ya we ol olfala bifo oli givim long ol laen blong Eron. Mo long ol taon ya, i gat ol man we wok blong olgeta, oli stap seraot kakae i go long ol pris wetem ol pikinini boe blong olgeta, mo long ol Livaet we oli raetemdaon nem blong olgeta finis long buk.

20Hae God i God blong King Hesekia, mo long evri ples long Juda, king ya i stap mekem ol samting we i stret, mo we i mekem Hae God i glad tumas from.

21Long olgeta wok we hem i stap mekem long haos blong Hae God, mo long fasin we hem i stap obei long Loa blong Hae God, oltaem nomo, hem i stap putum olgeta tingting blong hem i stap strong long Hae God, we i no gowe long hem nating. Nao from samting ya, oltaem nomo, hem i stap win.