1Nao King Deved i stap gud long haos blong hem, mo Hae God i stap lukaot gud long hem, oltaem i stap blokem olgeta enemi blong hem blong oli no kam spolem hem.
2Nao king i talem long Profet Natan se, “Naoia mi mi stap long wan gudfala haos we oli wokem long wud ya sida,* be Bokis ya we i Saen blong Promes* blong Hae God, hem i stap long wan haos tapolen nomo.”
3Nao profet i talem long hem se, “King. Sipos yu tingbaot blong mekem wan samting, yu gohed, yu mekem, from we Hae God i stap wetem yu.”
4Be long naet ya, Hae God i talem long profet ya se,
5“Yu go talemaot long king ya we mi mi talem se, ‘Deved, yu yu man blong wok blong mi, be i no yu we bambae i wokem wan haos blong mi, blong mi stap long hem, narafala man bambae i wokem.
6I stat long taem ya bifo we mi tekemaot ol bubu blong yufala long Ijip, kam kasem tede, mi mi no stap long wan haos olsem. Oltaem mi stap wokbaot wetem olgeta, mo mi stap long wan haos tapolen nomo.
7Mo long olgeta ples we mi mi pas long hem wetem olgeta, mi mi stap jusumaot ol lida blong olgeta, be neva mi talem long wan long ol lida ya se, “?From wanem yu no wokem wan haos blong mi long wud ya sida?” ’ ”
8Mo bakegen, Hae God i talem long profet ya se, “Mo yu go talemaot long hem tu we mi mi talem se, ‘Deved. Mi mi Hae God, mi gat olgeta paoa, mo yufala ol laen* blong Isrel,* yufala i man blong mi. Mo yu ya, mi mi tekemaot yu long wok blong yu we yu stap lukaot long ol sipsip long open ples, mi putumap yu yu kam king blong ol man ya blong mi.
9I stat bifo i kam, long weples we yu yu pas long hem, oltaem mi mi stap wetem yu, mo taem yu stap go long faet, oltaem mi stap winim ol enemi blong yu. Bambae mi mekem nem blong yu i go antap, blong olgeta man bambae oli save nem blong yu, olsem we oli save nem blong ol narafala bigbigfala lida olbaot long wol.
10-11Bifo olgeta, mi mi bin jusumaot wan kantri blong yufala, mo mi putum yufala finis long kantri ya. Mo long ples ya, bambae i no gat man i save mekem yufala i harem nogud bakegen. I stat long taem ya bifo we yufala i kam stap long kantri ya, oltaem i gat ol strong man blong faet oli stap kam blong mekem faet long yufala, be samting ya bambae i no moa save kasem yufala bakegen. Naoia mi mi promes* blong lukaot gud long yu, mo blong blokem olgeta enemi blong yu blong oli no kam spolem yu, mo oltaem bambae mi mekem we yu yu gat plante pikinini we bambae oli stap kamaot biaen long yu.
12Sam 89.3,4; 132.11; Jon 7.42; Wok 2.30Mo sipos yu ded, yu go stap long beregraon wetem ol olfala bubu blong yu, bambae mi mekem wan long ol pikinini blong yu i kam king, mo bambae mi stap lukaot gud long kingdom blong hem blong i stanap strong oltaem.
13King ya nao bambae i wokem haos blong mi, mo oltaem, ol man we bambae oli kam king blong yufala, bambae oli stap kamaot long olgeta ya we bambae oli stap kamaot biaen long hem.
14Sam 89.26,27; 2 Kor 6.18; Hib 1.5Bambae mi mi kam papa blong hem, mo hem bambae i kam pikinini blong mi. Mo sipos hem i mekem i nogud, bambae mi panisim hem olsem we wan papa i panisim pikinini blong hem.
15Be ol samting we bambae mi mekem blong givhan long hem, bambae mi no save tekemaot long hem bakegen, olsem we mi tekemaot long King Sol bifo, blong mekem rod, blong yu yu kam king.
16Sam 89.36,37Olgeta ya we bambae oli stap kamaot biaen long yu, oltaem bambae mi mekem olgeta oli stap gud, mo bambae mi mekem kingdom blong yu i stap oltaem, gogo i no save finis. Mo oltaem, ol king blong yufala bambae oli stap kamaot long olgeta ya we bambae oli stap kamaot biaen long yu.’ ”
17Nao olgeta tok ya we Hae God i talem long profet ya, profet i go talemaot long king.
King Deved i prea blong talem tangkiu long Hae God(1 Kronikel 17.16-27)18Nao King Deved i go long Haos Tapolen ya we ol man oli stap mit wetem Hae God long hem, mo i sidaon, i prea i talem se, “Hae God, yu yu Masta* blong mi. Ol samting ya we yu yu mekem finis long mi oli gudfala tumas. Mi mi no wan gudfala man, mo i no stret blong yu mekem long mi olsem. Mo ol famle blong mi tu oli olsem mi, mo i no stret blong yu mekem olsem long olgeta.
19Be ol samting we yu stap mekem long mi naoia, i gud moa, i winim ol samting ya we yu stap mekem long mi bifo. Hae God. Yu yu promes* se long ol yia we bambae i kam, bambae mi mi gat ol pikinini we bambae oli stap kamaot biaen long mi. !Mi mi man nomo, be yu letem mi mi luk samting ya!
20!I no moa gat tok we mi save talem, blong talem tangkiu long yu! Mi mi man blong wok nomo blong yu, be yu yu savegud mi.
21Ol bigbigfala samting ya we yu yu mekem long mi oli kamaot long plan blong yu nomo, mo oli kamaot stret olsem we yu yu wantem. Mo yu mekem olgeta, blong yu save tijim mi long fasin blong yu.
22“!Hae God, Masta blong mi, yu yu hae we yu hae! I no gat man we i olsem yu. Oltaem mifala i save we yu nomo yu God.
23Dut 4.34I no gat wan narafala neson long wol we oli olsem mifala ya, we i laen* blong Isrel.* Fastaem mifala i slef,* be yu yu mekem mifala i fri, blong mifala i kam ol man blong yu. Ol olfala ya blong mifala bifo we yu yu tekemaot olgeta long Ijip, yu mekem olgeta i fri, olgeta oli kam man blong yu, mo taem olgeta oli kam long kantri ya, yu yu stap ronemaot ol narafala man we oli stap long ples ya fastaem, wetem ol god blong olgeta.
24Yu yu mekem mifala i man blong yu finis, nao oltaem nomo, yu bambae yu God blong mifala mo mifala bambae i man blong yu, gogo i no save finis.
25“Hae God. Yu yu God blong mi. Promes ya blong yu we yu mekem from mi wetem ol pikinini blong mi we bambae oli stap kamaot biaen long mi, plis yu mekem i stanap naoia, we bambae i stap kamtru oltaem nomo. Mi mi wantem tumas blong yu mekem ol samting ya we yu talem se bambae yu mekem.
26-27Sipos yu mekem olsem, olgeta man bambae oli stap leftemap nem blong yu oltaem nomo. Bambae oli stap talem se, ‘!Hae God i gat olgeta paoa! !Hem nao i God blong ol laen blong Isrel ya!’
“Hae God. I tru we yu yu gat olgeta paoa, mo yu yu God blong mifala, mo oltaem nomo, ol king blong mifala bambae oli stap kamaot long ol olgeta we bambae oli stap kamaot biaen long mi. Mi mi man blong wok nomo blong yu, be mi no fraet nating blong kam mekem prea ya long yu, from we yu yu bin soemaot olgeta samting ya long mi, mo yu bin talem long mi, se bambae yu mekem ol pikinini blong mi we bambae oli stap kamaot biaen long mi oli kam king.
28“Hae God. Yu yu God blong mi, mo yu yu Masta blong mi. Oltaem yu stap holem ol promes blong yu, mo yu bin promes blong mekem samting ya long mi we i gudfala tumas.
29Naoia mi askem long yu blong yu blesem olgeta ya we oli stap kamaot biaen long mi, blong bambae oli stap harem gud oltaem nomo long ol gudgudfala samting we bambae yu yu stap givim long olgeta. Hae God, Masta blong mi. Yu yu mekem promes long samting ya finis, nao oltaem nomo, ol gudgudfala samting blong yu bambae oli stap kamtru long olgeta ya we bambae oli stap kamaot biaen long mi.”
Who We AreWhat We EelieveWhat We Do
2025 by iamachristian.org,Inc All rights reserved.
