Jeremaea 7 - Bislama Bible Revised 2012

Profet Jeremaea i prij long Jerusalem

1Nao Hae God i talem long Profet Jeremaea se,

2“Jeremaea. Yu go stanap long doa blong haos* blong mi, long ples we ol man Juda* oli stap pastru long hem blong kam mekem wosip long mi, yu talemaot ol tok we mi bambae mi talem long yu.”

3Nao profet i go long ples ya, i talemaot long olgeta se, “Hae God i gat olgeta paoa, mo hem i God blong yumi. Mo hem i talem se, ‘Ol laen* blong Isrel.* Yufala i mas jenisim fasin blong yufala, mo yufala i mas lego ol samting nogud we yufala i stap mekem, nao bambae mi save letem yufala i stap olwe long ples ya.

4Yufala i no mas bilif long ol giaman toktok blong ol man ya we oli stap talem se, “Yumi no mas fraet. !Hemia haos blong Hae God ya! !Haos blong Hae God ya! !Haos blong Hae God ya!”

5“ ‘Yufala i mas jenisim fasin blong yufala, mo yufala i mas lego ol rabis fasin we yufala i stap mekem. Yufala i mas mekmekem i stret long yufala.

6Fasin ya we yufala i stap ravem ol strenja mo ol wido mo ol pikinini we papa blong olgeta i lus, yufala i mas lego. Mo yufala i no moa kilim ol man long kantri ya oli ded, we oli no mekem wan samting nogud. Yufala i no moa stap mekem wosip long ol narafala god, from we fasin ya bambae i spolem yufala nomo.

7Sipos yufala i jenisim ol fasin ya blong yufala, mi bambae mi letem yufala i stap long kantri ya we mi givim finis long ol bubu blong yufala bifo, blong yufala i holem i blong yufala olwe.

8“ ‘!Yufala i luk! Yufala i stap trastem ol giaman toktok we oli no save givhan long yufala nating.

9Oltaem, yufala i stap stil, mo yufala i stap kilim man i ded, mo yufala i stap go long narafala woman. Oltaem, yufala i stap mekem strong promes blong yufala, mo biaen yufala i stap brekem bakegen. Yufala i stap mekem wosip long god ya Bal,* mo yufala i stap biaen long ol narafala god we neva yufala i save olgeta bifo.

10Oltaem, yufala i stap mekem ol samting we mi mi no laekem nating, nao biaen yufala i stap kam stanap long haos blong mi, yufala i talem se, “Naoia yumi stap gud.”

11 blong Heven.’ Mo oltaem, oli stap kafsaedem waen, blong givim i go long ol narafala god. Oli stap mekem ol samting ya blong mekem mi mi kros nomo.

19Oli ting se ol samting ya bambae i mekem mi mi harem nogud, be olgeta oli stap spolem olgeta bakegen, mo oli mekem sem long olgeta nomo.

20Mi mi Hae God, mi Masta* blong yufala, mo from samting ya, bambae mi soemaot kros blong mi long fasin ya we bambae mi spolemgud ples ya. Bambae mi spolem ol man mo ol anamol, mo ol tri, mo ol kakae long garen tu. Kros blong mi bambae i strong olsem faea we i laet, mo bambae i no gat man i save kilim.”

21Mo profet i talem se, “Hae God i gat olgeta paoa mo hem i God blong yumi. Hem i talem se, ‘Ol laen* blong Isrel.* Taem yufala i bonem ol sakrefaes long olta blong mekem wosip long mi, i gat sam we yufala i bonem i bon evriwan, mo sam we yufala i bonem haf yufala i kakae haf. Be mi mi luk se i moa gud yufala i kakae evriwan nomo.

22Bifo, taem mi mi tekemaot ol bubu blong yufala long Ijip, be mi no givim wan loa nating long olgeta, from ol rod blong bonem sakrefaes blong givim presen long mi, no from ol narafala sakrefaes we oli stap mekem.

23Fastaem, mi mi talem long olgeta, se oli mas obei long mi, blong mi mi God blong olgeta, mo olgeta oli man blong mi. Mo mi talem se oli mas folem ol tok blong mi, nao laef blong olgeta bambae i stap gud olwe.

24Be oli no lesin long ol tok we mi mi talem long olgeta, mo oli no obei long mi nating. Oli girap, oli gohed, oli folem stronghed blong olgeta, mo fasin blong olgeta i go nogud moa, i no kam gud nating.

25I stat long taem ya we ol bubu blong yufala oli aot long Ijip, kam kasem tede, oltaem nomo mi mi stap sanem ol profet, we oli man blong wok blong mi, oli kam toktok long yufala.

26Be i no gat wan long yufala nating we i lesin long olgeta, no i mekem ol samting we oli talem. Oltaem hed blong yufala i stap kam strong moa, mo oltaem yufala i stap girap agens long mi. Fasin blong yufala i mowas, i winim fasin blong ol bubu ya blong yufala bifo.’ ”

27Nao Hae God i talem long profet se, “Sipos yu talemaot ol tok ya long ol man ya blong mi, be bambae oli no save lesin long yu nating. Bambae yu save singaot olgeta, be oli no save ansa long yu.

28From samting ya, yu mas talemaot long olgeta, we mi mi God blong olgeta, be neva oli obei long mi, mo neva oli lan long panis ya we oli stap kasem. I no moa gat wan long olgeta, we i holem tok blong mi. Fasin ya, oli no moa tokbaot.”

Ol fasin nogud we ol man Juda oli mekem long krik ya Hinom

29Bakegen, Profet Jeremaea i talemaot we Hae God i talem se,

“Ol man Jerusalem.*

Yufala i mas krae bigwan.

Yufala i mas katemaot hea blong yufala,

yufala i sakem.

Yufala i go antap long hil, yufala i krae,

yufala i singsing long sing blong dedman,

from we naoia mi mi kros tumas,

mo mi lego yufala finis.

30“Ol man Juda.* Yufala i bin mekem wan samting, we i nogud we i nogud. Yufala i tekem ol aedol blong yufala we mi no laekem olgeta nating, nao yufala i kam putum olgeta long haos* blong mi, yufala i mekem haos ya i kam doti long fes blong mi.

312 King 23.10; Jer 32.35; Lev 18.21Mo long krik ya Hinom, yufala i wokem wan olta, we yufala i putum nem blong hem se Tofet, nao yufala i stap bonem ol boe mo ol gel blong yufala long hem, blong mekem sakrefaes long ol narafala god. Be mi mi no talem se bambae yufala i mekem olsem, samting ya i no kamaot long tingting blong mi nating.

32Nao from we yufala i mekem olsem, i gat taem i stap kam we bambae yufala i no moa talem nem blong ples ya se Tofet, no krik ya Hinom, bambae yufala i talem nem blong hem, se “Krik blong Kilim Man i Ded”. Bambae yufala i stap berem ol dedman long ples ya nomo, from we bambae i no moa gat narafala ples blong berem olgeta long hem.

33Ol dedbodi blong yufala, bambae ol pijin wetem ol wael anamol oli kakae, mo bambae i no moa gat man blong ronemaot olgeta.

34Jer 16.9; 25.10; Rev 18.23Kantri ya bambae i kam draeples nomo. Nao long olgeta taon long Juda, mo long ol bigrod long Jerusalem, bambae man i no moa save harem noes blong ol man we oli stap glad, mo ol noes blong ol lafet blong mared.