Sam 11 - Bislama Bible Revised 2012

Sing blong man we i trastem Hae God(Sing ya, Deved i wokem.)(Tok i go long ol man.)

1-3Mi mi trastem Hae God,

nao mi mi stap gud long han blong hem.

Be yufala i no gat hed,

yufala i stap talem long mi se,

“Yu flae olsem pijin,

yu go antap long hil ya.

Ol man nogud

oli taetem string blong bonara blong olgeta finis.

Naoia oli stap haed long tudak,

we oli putumrere ara finis long bonara,

blong sutum ol stret man.

Taem evri samting i go olbaot olsemia,

gudfala man i no save mekem wan samting nating.”

?Be weswe yufala i stap toktok long mi olsem?

4Hae God i stap

long tabu haos* blong hem.

Hem i King,

i stap rulum olgeta man.

Hem i stap long heven,

i stap lukluk olgeta man long evri ples,

mo i save evri samting we oli stap mekem.

5God i stap skelem laef blong olgeta man,

ol gudfala man wetem ol man nogud.

Mo hem i no laekem nating olgeta

we oli laekem tumas blong mekem faet.

6Bambae hem i panisim ol man nogud,

i sanem faea we i stap laet,

wetem salfa* we i hot we i hot,

i kamdaon, i bonem olgeta.

Bambae hem i sanem win we i hot we i hot

blong panisim olgeta.

7Hae God,

hem i stret olgeta,

mo hem i laekem ol gudfala wok.

Olgeta we oli mekem ol wok olsem,

bambae oli go stap wetem hem.